2-3 Jain Jehová jin tiꞌ, yaaw jin yibꞌan masanil, caw yelcꞌulal jix tit jin jowal yin ebꞌ je mam icham, yu jun tuꞌ, jaꞌ tzet chi wal ey jaach tiꞌ, al tet ebꞌ jin conobꞌ jaxca tiꞌ: Tol jain caw Jehová jin chi walaꞌ, meltzaanwejtej ey jin, yet che yalon je bꞌa ey jin, jain xa oj jin colwa je yin. 4 Cꞌam ojabꞌ che pitnewej je bꞌa, jaxca jix yun spitnen sbꞌa ebꞌ je mam icham tuꞌ. Jix yal ebꞌ jin chejabꞌ yet peyxa tuꞌ tet ebꞌ jaxca tiꞌ: Jaꞌ Jehová, Naj ey yipalil, jaꞌ chi alon ey jex jaxca tiꞌ: Naꞌwej je bꞌa yin je pena bꞌeybꞌal, cꞌal yu masanil spenail che yunne, ẍi Dios, ẍi ebꞌ jin chejabꞌ tuꞌ, ma cꞌal ẍaꞌ yabꞌ ebꞌ, tam wal jix sjije ebꞌ. 5 Yuxan jaꞌ tinaniꞌ xin, ¿Bꞌeytuꞌ eyoc ebꞌ je mam icham tuꞌ? Ilaꞌ tax ebꞌ jin chejabꞌ, ¿tumi iquisto cꞌal ecꞌ ebꞌ tinaniꞌ? 6 Jaꞌ jin kꞌane, cꞌal jin chejbꞌanil jix wal tet ebꞌ jin chejabꞌ tuꞌ, jix eloc yunen yin ebꞌ je mam icham tuꞌ, yuxan jix snaꞌ sbꞌa scꞌul ebꞌ, catuꞌ jix yalon ebꞌ jaxca tiꞌ: Tuxa jix cu yute Jehová, jaxca jix yun snaꞌoni, jatacꞌalaꞌ smooal cu chaꞌon yu cu pena bꞌeybꞌal, cꞌal yu jantaj spenail chi el kuneni, ẍi ebꞌ, ẍi Jehová, ey jin.

7 Jain Zacarías jin tiꞌ, scꞌaal jin Berequías, yitxiquin jin Idó, jix jin chaꞌ wan kꞌane tiꞌ tet Jehová, yet 24 yoc yet 11 xꞌaaw (jaꞌton jun xꞌaaw chi yij Sebat,) yet xa scaabꞌ abꞌil yoc naj Darío yin reyal. 8 Jaꞌ yet akꞌbꞌalil, jix txꞌoxle wil jun tiꞌ: Jix wil jun winaj eya yibꞌan jun cajin che, jix oc tucan noꞌ bꞌey spananil stiꞌ jun jobꞌe, xol teꞌ arrayán, jaꞌ bꞌey yintaj jun tuꞌ ey junxa bꞌulan noꞌ che ey mac eya yibꞌan noꞌ. Jaꞌ xol noꞌ tuꞌ ey noꞌ cajin, ey noꞌ saj wejinaj, ey cꞌal pax noꞌ txenne wal sajinal. 9 Jix jin kꞌanle tet jun ángel tuꞌ jaxca tiꞌ: Jaach Waawil, ¿mactxequel wan eyoc yibꞌan che tuꞌ? jin chi. Jix takꞌwi jun ángel chi kꞌanabꞌ wetoj tuꞌ jaxca tiꞌ: Oj jin txꞌox ey jaach, mactxequel ebꞌ, ẍi. 10 Yu jun tuꞌ xin, jix yalon naj eyecꞌ bꞌey snan xol wan teꞌ arrayán tuꞌ jaxca tiꞌ: Jaꞌton ebꞌ tiꞌ jix chejletoj yu Jehová yu stoo yilon ebꞌ bꞌey masanil yul yibꞌankꞌinal, ẍi.

11 Jix yalon ebꞌ eyoc yibꞌan che tuꞌ tet Naj yángel Jehová eyecꞌ xol teꞌ arrayán tuꞌ jaxca tiꞌ: Tuxa jix cu ecꞌ bꞌey masanil yul yibꞌankꞌinal. Watxꞌ cꞌal jix kilaꞌ, caw ey cꞌal watxꞌcꞌulal, ẍi ebꞌ. 12 Jix yalon Naj yángel Jehová tuꞌ jaxca tiꞌ: Jaach Jehová jin Diosal, tol Yaaw jaach yibꞌan masanil, jaꞌ tax yet eytej sjowal ja cꞌul yin Jerusalén, cꞌal yin Judá, eyxa 70 abꞌil tinaniꞌ. ¿Jantaj to wal tiempo catuꞌ oj okꞌ ja cꞌul yin ebꞌ ja conobꞌ tiꞌ? ẍi.

13 Catuꞌ jix takꞌwi Jehová tet jun ángel chi kꞌanabꞌ wetoj tuꞌ, catuꞌ jix akꞌle smimanil scꞌul. 14 Yin xacꞌal eymanil jix yal naj ángel tuꞌ, tol chi walel wan kꞌane tiꞌ: Jaꞌton wan jix yal Jehová, Naj Yaaw yibꞌan masanil: Caw ey jin camcꞌulal yin Jerusalén, cꞌal yin wonan Sión. 15 Yu jun tuꞌ, yuxan caw jix tit jin jowal yin wanxa conobꞌ tuꞌ tol cꞌam niꞌoj chi oc il ebꞌ. Jaꞌ yet txenne wal jix yun stit jin jowal yin Jerusalén, yel xacꞌal jix ecꞌ ebꞌ yibꞌan yakꞌon syaꞌtajilal yin jin conobꞌ tuꞌ. 16 Yu jun tuꞌ, jain Jehová jin chi wal jaxca tiꞌ: Jaꞌ tinaniꞌ oj jin meltzo bꞌey Jerusalén, yin jin txꞌoxon jin camcꞌulal. Oj wakꞌon caꞌ waꞌnele a jin templo tituꞌ, catuꞌ oj caꞌ waꞌnele cꞌal pax a Jerusalén tuꞌ, ẍi Jehová, ẍi jun ángel tuꞌ. 17 Jix yalon cꞌal jun ángel tuꞌ ey jin jaxca tiꞌ: Al cꞌal pax el wanxa tiꞌ: Jaꞌ Jehová, Naj caw ey yipalil, jaꞌ chi alon jaxca tiꞌ: Oj wiꞌ pax a can wan jin conobꞌ tiꞌ, oj jin mimancꞌulne Sión junelxa. Oj walel junelxa tol jaꞌ Jerusalén tiꞌ, jin conobꞌ tol sicꞌbꞌil el wu, ẍi Jehová, ẍi naj ángel tuꞌ.

18 Jix jin a tꞌananoj, catuꞌ jix wilon canebꞌ yucꞌaꞌ noꞌ noꞌ. 19 Jix jin kꞌanle tet jun ángel chi kꞌanabꞌ wetoj tuꞌ jaxca tiꞌ: ¿Tzet chi yal yeloc apnoj canebꞌ yucꞌaꞌ noꞌ tuꞌ? jin chi tet. Jix yalon ey jin: Jaꞌ wan yucꞌaꞌ noꞌ tuꞌ, chi xꞌoxtej yipalil wan conobꞌ jix yujte sajlemtoj ebꞌ a Judá, ebꞌ a Israel, cꞌal ebꞌ a Jerusalén, ẍi.

20 Jix lawi tuꞌ, jix xꞌoxon pax Jehová wil canwan ebꞌ tenom chꞌen. 21 Jix jin kꞌanlen jaxca tiꞌ: ¿Tzet chi jul yun wan tenom chꞌen tiꞌ? jin chi. Jix yalon ey jin jaxca tiꞌ: Jaꞌ wan tenom chꞌen tiꞌ, jix jul ebꞌ yu jul xibꞌteni, cꞌal yakꞌon lawoj yipalil wan nación jix uchon ey conobꞌ Judá, yet jix sajlemnen cantoj ebꞌ ánima caan tituꞌ, ẍi.