2 yet cꞌamto chi jul jun scꞌual tol naꞌbꞌilxa yu Jehová, jun scꞌual tol eyxa smey yeocoj, yet oj jex sajlem cantoj yu, jaxca chi yun xuꞌletoj smatzꞌical ixim tiriw yu kaꞌeꞌ.

3 Awej oc je bꞌa yul skꞌabꞌ Jehová je masanil, jex tol yeynajil che yute je bꞌa yin je jijen sjichanil bꞌey yul yibꞌankꞌinal tiꞌ. Aanwej can yin sjichanil cꞌal yin yeynajilal, tala chito ilcha je colbꞌanil yet oj jul scꞌual sjowal scꞌul Jehová.

5 Jantaj jex titnaj jex bꞌey Creta, mac jex tol caan jex bꞌey stiꞌlaj jaꞌ mar, tuxa jix yal Jehová tzetyetal oj jul je yibꞌan. Jaꞌcaw chi alon jaxca tiꞌ: Oj wakꞌ lawoj ey Canaán cꞌal xꞌotxꞌal ebꞌ Filisteo; cꞌamxa junoj mactxequel oj caey can ecꞌ tituꞌ, ẍi Dios.

6 Jaꞌ masanil txꞌotxꞌ stiꞌlaj jaꞌ mar, slowbꞌal noꞌ meꞌ oj yun canoj. Jaxa cꞌal tituꞌ oj swaꞌne a spat na ebꞌ ilom meꞌ, cꞌal scolalil smeꞌ ebꞌ.

7 Jaꞌ ebꞌ iquisto ecꞌ bꞌey conobꞌ Judá, oj yiꞌ smajul ebꞌ tituꞌ. Jaꞌ tituꞌ oj steyne smeꞌ ebꞌ; jaxa yet akꞌbꞌalil, jaꞌ bꞌey xol-laj na bꞌey conobꞌ Ascalón oj wey ebꞌ, yutol jaꞌ Jehová sDiosal ebꞌ, jaꞌ oj teynen ebꞌ, cꞌal yiꞌle a can ebꞌ.

8 Jaꞌcaw Jehová, Naj Yaaw yibꞌan masanil, jaꞌton cu Diosal jaon Israel jon tiꞌ, jaꞌ chi aloni: Jix wabꞌ sbꞌuchwal kꞌane ebꞌ Moabita, cꞌal ebꞌ Amonita yin jin conobꞌ, tol oj iꞌle ecꞌ xꞌotxꞌ ebꞌ jin conobꞌ yu ebꞌ yaloni.

9 Yu jun tuꞌ, yuxan jain caw Jehová jin chi walaꞌ, tol jaꞌ Moab tiꞌ laan oj yun jaxca jix yun conobꞌ Sodoma. Jal pax conobꞌ Amón xin, laan oj yun jaxca conobꞌ Gomorra bꞌey chi chꞌibꞌa teꞌ qꞌuix, cꞌal bꞌey chi waꞌxi atzꞌam. Tzꞌinini xacꞌal oj yun can yin junelne. Jaꞌ ebꞌ iquisto ecꞌ bꞌey conobꞌ tiꞌ, jaꞌ ebꞌ oj iꞌon eltej stzetyetal ebꞌ. Jaꞌ ebꞌ oj majon can oc xꞌotxꞌ ebꞌ tuꞌ, ẍi Jehová.

10 Jaꞌton wal spajtzebꞌal oj ẍaꞌ Moab cꞌal Amón tiꞌ yu smeynebꞌail, cꞌal yu sbꞌuchwal ebꞌ yin sconobꞌ Jehová Naj Yaaw yibꞌan Masanil.

11 Eyxa smey oj yun xꞌoxon yipalil Jehová tet ebꞌ. Oj yakꞌ lawoj comon dios bꞌey masanil yul yibꞌankꞌinal tiꞌ. Tol tax jaꞌ ebꞌ caan bꞌey skꞌaxepal ecꞌtoj jaꞌ mar, jatuꞌ oj oc ebꞌ yin eyilal tet Naj.

12 Yetoj cꞌal pax jaex tiꞌ, jex a Etiopía, oj jex yasitoj yu chꞌen yespada Jehová, catuꞌ oj jex eyqꞌueyoj.

13 Oj yaon cꞌal pax toj skꞌabꞌ Jehová yin ebꞌ ey bꞌey yetcꞌulal norte, yet chi yakꞌon lawoj ey conobꞌ Asiria. Tzꞌinini xacꞌal oj yun can conobꞌ Nínive yu, cusiltaj txꞌotxꞌ xacꞌal oj yun cantoj.

14 Jaꞌ tituꞌ oj eecꞌ noꞌ jobꞌbꞌeal noꞌ, yetoj cꞌal masanil noꞌ xol-laj teꞌal noꞌ. Jaxa cꞌal noꞌ tonton, yetoj noꞌ xotx oj okꞌ bꞌey ẍumuclaj yoyal tuꞌ; jaxa cꞌal bꞌey yul-laj swentanail na oj bꞌitnoj eltej noꞌ. Tuxa cꞌal oj ey bꞌulan noꞌ bꞌey yul-laj stiꞌ spuertail. Jaꞌ ẍemteꞌal eyoc yul, jaꞌton teꞌ kꞌuteꞌ, tuxa cꞌal oj cancan jajanoj.

15 Jaxca tuꞌ oj utele jun conobꞌ cꞌam tzet chi snaꞌ tinaniꞌ, yutol caw chi yaoc smeynebꞌail ebꞌ yipoj scꞌul, chi yalon ebꞌ jaxca tiꞌ, tol cꞌam junojxa conobꞌ laan yetoj ebꞌ. Caw tzꞌinini xacꞌal oj yun canoj, asanxane noꞌ chiꞌwawom noꞌ oj caey can ecꞌ tituꞌ. Jaꞌ mactxequel oj ecꞌ bꞌey scawilal tuꞌ, oj bꞌuchwa ebꞌ yin ebꞌ.