2 Ma ẍaꞌ yabꞌ ebꞌ tzet jix yal Jehová, tam wal jix ẍaꞌ scꞌul ebꞌ tol chi akꞌle cuenta. Ma yaoc sDiosal ebꞌ yipoj scꞌul, tam wal jix yaoc sbꞌa ebꞌ yul skꞌabꞌ Dios.

3 Jaꞌ ebꞌ yaaw yeoc yul sconobꞌ ebꞌ, laan ebꞌ jaxca noꞌ bꞌalam chi el yaw yu wail. Jaꞌ ebꞌ juez yeoc xol ebꞌ, laan ebꞌ jaxca noꞌ ooj tol cꞌamxa junojxa sbꞌajil chiꞌbꞌe chi yakꞌ can yet junxa cꞌual.

4 Jaꞌ ebꞌ chi yaloc sbꞌa ẍejabꞌoj Dios yaloni, chi smeyne sbꞌa ebꞌ; comon cꞌal chi yal junoj kꞌane ebꞌ yul yet. Jaꞌ ebꞌ yakꞌomal xaambꞌal, chi yetnetoj scalubꞌal Jehová ebꞌ, chi sqꞌuexontoj ebꞌ tzet chi yal sley Dios.

5 Jal pax Jehová xin, eyecꞌ bꞌey conobꞌ tuꞌ. Jichan cꞌal tzet chi yun Naj, watxꞌ cꞌal chi eloc masanil tzet chi yunne. Junjun cꞌal skꞌinibꞌalil chi xꞌoxel sjichanil Naj, jal pax ebꞌ pena sbꞌeybꞌal xin, caw cꞌam chi qꞌuixwi niꞌoj ebꞌ.

6 Chi yalon Jehová jaxca tiꞌ: Tuxa jix wakꞌ lawoj masanil nacionlaj, tuxa jix wuchey storreal smuroal sconobꞌ ebꞌ. Tzꞌinini xacꞌal jix wute can bꞌey yul-laj scalleal, cꞌamxa junoj mac chi ecꞌabꞌ tituꞌ. Cꞌamxa junoj ánima caan bꞌey wan conobꞌ tuꞌ.

7 Jix jin naꞌon jaxca tiꞌ: Tala jaꞌ ebꞌ a Jerusalén tiꞌ ey weloc apnoj yul sat ebꞌ, yet chi wakꞌon cuenta ebꞌ. Ta jaxca tuꞌ, man oj wuch lawoj sna ebꞌ, tam wal waon oc syaꞌilal yibꞌan ebꞌ jaxca jix yun jin naꞌoni. Jaxa wal jix yunne, tol caw yelcꞌulal jix a can ebꞌ yunen spenail.

8 Yu jun tuꞌ xin, echbꞌanewej sjul jun scꞌual yet oj jin a waan yin jin txꞌoxon el spenail masanil ebꞌ penawom tiꞌ. Jain caw Jehová jin chi walaꞌ: Tuxa jix jin naꞌ tol oj jin yambꞌa oc masanil conobꞌlaj bꞌey chi apni oc smoonal junjun conobꞌ, yet oj wiꞌon el sjowal jin cꞌul yibꞌan ebꞌ. Masanil yul yibꞌankꞌinal oj lawoj eyoj yu skꞌakꞌal sjowal jin cꞌul.

9 Jaꞌ yet oj apnoj oc jun cꞌual tuꞌ, asan xacꞌal watxꞌ kꞌane oj wakꞌ yal masanil ebꞌ ánima, yet watxꞌ masanil conobꞌ oj yal sbꞌa ey jin, junxane oj yun jin yakꞌon servil ebꞌ.

10 Jaꞌ bꞌey skꞌaxepal ecꞌtoj wan jaꞌ yet Etiopía, oj tit ebꞌ jin conobꞌ sajleminaj ye cantoj, oj jul yal sbꞌa ebꞌ ey jin, cꞌal yiꞌontej yofrenda ebꞌ.

11 Jex jin conobꞌ, jaꞌ yet jun cꞌual tuꞌ, manxa oj jex qꞌuixwoj yu je pena bꞌeybꞌal, jaꞌton bꞌey jix je pitne je bꞌa ey jin. Jaꞌ yet jun cꞌual tuꞌ, oj wiꞌel ebꞌ chꞌaan cꞌal ebꞌ chi smeyne sbꞌa je xol, cꞌamxa bꞌakꞌin oj je meyne je bꞌa bꞌey jun tzalan bꞌey chi oc eyilal ey jin.

12 Asanxane ebꞌ ánima chi yiꞌey sbꞌa, cꞌal ebꞌ yeynajil chi yute sbꞌa, jaꞌ ebꞌ oj wakꞌcan caey bꞌey jin conobꞌ tiꞌ. Asanxane win oj yaoc snaꞌbꞌal ebꞌ.

13 Jaꞌ ebꞌ Israel oj to iquisbꞌoj can ecꞌoj, manxa oj sbꞌeybꞌalne spenail ebꞌ, tam wal oj to yakꞌ lekꞌtiꞌal ebꞌ; cꞌamxa cꞌal bꞌakꞌin oj yetne yet animail ebꞌ. Tol oj low ebꞌ yin tzalacꞌulal, cꞌamxa cꞌal bꞌey oj xiw ebꞌ, ẍi Jehová.

15 Tuxa jix yiꞌcan el sjowal scꞌul Jehová eyoc je yibꞌan, tuxa jix yintajne can el ebꞌ chi jowi oc je yin. Jaꞌ Jehová Naj je Reyal eyecꞌ je yetoj. Cꞌamxa cꞌal bꞌey oj jex xiwoj.

16 Jaꞌ yet jun cꞌual tuꞌ, oj al-le tet ebꞌ a Jerusalén jaxca tiꞌ: Jex a Sión, cꞌamxa cꞌal chex xiwi, cꞌam ojabꞌ xacꞌal chi pax yip je kꞌabꞌ yu xiwcꞌulal.

17 Jaꞌ Jehová cu Diosal eyecꞌ ketoj. Jaꞌ yipalil Naj chex coloni. Caw oj tzala Naj je yetoj yutol camcꞌulnebꞌil jex yu. Yu scamcꞌulal Dios je yin, yuxan cꞌamxa cꞌal tzet oj yalaꞌ. Jaꞌ yu stzalacꞌulal tuꞌ, yuxan oj bꞌitnoj,

18 jaxca chi yun yoc bꞌit yet scꞌual kꞌin, ẍi ebꞌ oj yalon ebꞌ.

Chi yalon cꞌal pax Jehová jaxca tiꞌ: Oj wiꞌel tzetyetal ey smey tꞌinan sjul je yibꞌan, oj wiꞌon cꞌal pax el qꞌuixwilal chex ioni.

19 Jaꞌ yet jun cꞌual tuꞌ, oj wakꞌ sowalil tet ebꞌ jix jex etneni. Oj jin colwa yin ebꞌ yaꞌtaj yeocoj, cꞌal yin ebꞌ sajleminaj ye cantoj. Oj wiꞌa can je bꞌinabꞌilal bꞌey jix jex intajnele el bꞌey yul yibꞌankꞌinal tiꞌ.

20 Jaꞌ yet jun cꞌual tuꞌ, oj jex wiꞌtej, oj jin yambꞌa ocoj, catuꞌ oj jin qꞌuexon tzetyetal eyoc je yibꞌan. Oj wiꞌon a can je bꞌinabꞌilal, yet watxꞌ tol ey je yeloc apnoj bꞌey xol masanil conobꞌlaj bꞌey yul yibꞌankꞌinal tiꞌ. Oj je yil wal yet oj jex wiꞌon a can junelxa tuꞌ, ẍi Dios.