3 Oj wakꞌ lawoj ebꞌ ánima yetoj noꞌ noꞌ, noꞌ tzꞌiquin, cꞌal yetoj noꞌ pescado ey yul-laj jaꞌ jaꞌ. Oj wakꞌon lawoj spenail yetoj ebꞌ penawom, catuꞌ oj wiꞌon el ebꞌ ánima bꞌey sat txꞌotxꞌ txꞌotxꞌ tiꞌ.

4 Oj waoc syaꞌilal yibꞌan conobꞌ Judá, yetoj cꞌal masanil ebꞌ caan bꞌey Jerusalén. Catuꞌ oj wakꞌon lawoj bꞌey chi oc eyilal tet comon dios Baal bꞌey conobꞌ tiꞌ. Cꞌamxa bꞌey oj txeclocanoj; tol tax oj jin joꞌqꞌuey sbꞌi ebꞌ yakꞌomal xaambꞌal tet Baal.

5 Catuꞌ oj wakꞌon lawoj ebꞌ chi atoj txaloj bꞌey yibꞌanlaj na tet weycan, yetoj ebꞌ chi ey kaan yin jin yakꞌon bꞌina jin bꞌi; chi yakꞌon bꞌina cꞌal pax sbꞌi sdiosal ebꞌ chi yij Milcom.^a

6 Oj wakꞌon cꞌal pax lawoj ebꞌ chin intajnen eloj, jaꞌton ebꞌ cꞌam chi jul jin sattaj jain Jehová jin tiꞌ, yet chi jul skꞌanlen snaꞌbꞌal ebꞌ ey jin an.

7 Tzꞌin ojabꞌ cꞌal je chi jin sattaj, jain Jehová Yaaw jin tiꞌ, yutol jaꞌ scꞌual sjowal jin cꞌul cawilxa ey. Tuxa jix jin waꞌne el noꞌ xaambꞌal yet watxꞌcꞌulal. Tuxa jix jin sicꞌ can el mactxequel awtebꞌil low wu an.

8 Jaꞌ yet jun cꞌual tuꞌ, oj waoc syaꞌilal yibꞌan ebꞌ yaaw yeocoj, yetoj cꞌal yibꞌan ebꞌ scꞌaal rey, yetoj cꞌal yibꞌan wanxa ebꞌ chi yaoc spichil ebꞌ txꞌoj conobꞌal.

9 Oj wa cꞌal pax oc syaꞌilal yibꞌan ebꞌ comon cꞌal chi oc yul-laj na, jaꞌton ebꞌ chi yakꞌ noel yul-laj sna spatrón yu bꞌeomal chi yiꞌ yin elkꞌan, cꞌal yu yetnen yet animail.

10 Jain Jehová jin chi walaꞌ: Tol jaꞌ yet jun cꞌual tuꞌ, oj abꞌle yel yaw ebꞌ ánima bꞌey spuertail bꞌey chi octoj ebꞌ txonom pescado bꞌey yet scaabꞌ tujan conobꞌ. Oj abꞌle cꞌal pax yel yaw ebꞌ ánima yet oj eltej seclabꞌoj mimej jootxꞌ bꞌey txꞌotxꞌ tzalquiltaj.

11 El ojabꞌ je yaw jantaj jex caan jex bꞌey yul-laj txombꞌal, yutol oj cam masanil ebꞌ txonwom, yetoj cꞌal masanil ebꞌ chi akꞌon tumin yin maanil.

12 Jaꞌ yet jun cꞌual tuꞌ, oj jin sey wil Jerusalén yetoj tzejtebꞌal jaxca chi yun seyle junoj tzetyetal chi qꞌueytoj. Oj waoc syaꞌilal yibꞌan ebꞌ ánima tol cꞌam tzet chi snaꞌ tinaniꞌ, catuꞌ chi yalon ebꞌ yul yet jaxca tiꞌ: Jaꞌ Jehová, toj ey tzetyetal chi spajtze ey jon yin swatxꞌil, tam wal yin syaꞌtajilal, ẍi ebꞌ.

13 Yu jun tuꞌ, yuxan jaꞌ jantaj masanil bꞌeomal ey yul skꞌabꞌ ebꞌ, oj iꞌle ecꞌoj, cꞌal sna ebꞌ oj uchle eyoj. Oj swaꞌne a sna ebꞌ, manxa oj caey ecꞌ ebꞌ yul sna. Oj yaw yuva ebꞌ, manxa oj yucꞌ svinoal yuva ebꞌ tuꞌ, ẍi Jehová.

14 Cawilxa chi jul jun scꞌual sjowal scꞌul Jehová, caw miman yeocoj. Cawilxa ey, yelcꞌulal xacꞌal chi bꞌey sjuli. Abꞌwej, jaꞌ yet jun cꞌual tuꞌ, jaꞌ ebꞌ soldado caw jelan yakꞌon jowal, oj okꞌ ebꞌ yu xiwcꞌulal.

15 Jaꞌ yet jun cꞌual tuꞌ, scꞌual wal sjowal scꞌul Jehová, syaꞌilal, cꞌal cuscꞌulal. Jaꞌ yet tuꞌ, oj uchchatoj conobꞌlaj, tzꞌinini xacꞌal oj yun canoj. Jaꞌ yet tuꞌ oj kꞌejbꞌoj, kꞌej jolinaj xacꞌal oj yun can eloj. Oj oc moyan bꞌey satcan. Kꞌejkꞌinal xacꞌal oj yun can el masanil.

16 Jaꞌ yet jun cꞌual tuꞌ, scꞌual xuꞌle chꞌen trompeta yet jowal cꞌal yel yaw ebꞌ soldado yakꞌon jowal yin conobꞌ tol eyoc smuroal, cꞌal wan conobꞌ naat yea storreal.

17 Chi yalon Jehová jaxca tiꞌ: Oj waoc ebꞌ ánima yin bꞌiscꞌulal, yuxan laan xacꞌal oj yun yecꞌabꞌ ebꞌ jaxca yecꞌabꞌ ebꞌ cꞌam cꞌaltaꞌ chi skeꞌ yilwani, yutol jix oc spenail ebꞌ jin sattaj. Jaꞌ ẍiqꞌuil ebꞌ, tuxa cꞌal oj malcan ey jaxca jaꞌ; jaꞌ smimanil ebꞌ, tuxa cꞌal oj a can bꞌulan jaxca stzaꞌ noꞌ noꞌ, ẍi Jehová.

18 Jaꞌ yet jun cꞌual tuꞌ oj yaeytej sjowal scꞌul Jehová, man oj colcha el ebꞌ ánima yu chꞌen tumin, chꞌen plata, tam wal yu chꞌen oro. Yutol jaꞌ sjowal scꞌul Jehová oj akꞌon lawoj masanil conobꞌlaj. Yin jun txolan oj lawoj ey masanil ebꞌ caan bꞌey yul yibꞌankꞌinal tiꞌ, jaxca chi yun tzꞌaꞌtoj junoj tzetyetal yu kꞌakꞌ.