3 Catuꞌ jix too naj Jonás bꞌey conobꞌ Nínive jaxca jix yun yalon Dios. Jaꞌ jun conobꞌ tuꞌ, caw miman conobꞌ yeocoj, ey oxebꞌ cꞌual stecꞌbꞌanil masanil yul jun conobꞌ tuꞌ. 4 Catuꞌ jix octoj naj Jonás yul jun conobꞌ tuꞌ. Yet bꞌabꞌel cꞌu, jix cꞌoli yalon el naj yin ipeal jaxca tiꞌ: ¡Yet wal 40 cꞌu tinaniꞌ catuꞌ chi akꞌle lawoj ey jun conobꞌ tiꞌ! ẍi naj.

5 Jaꞌ masanil ebꞌ ánima caan bꞌey jun miman conobꞌ tuꞌ, ebꞌ icham ánima, ebꞌ unin, ebꞌ bꞌeom cꞌal ebꞌ mebꞌa jix yaoc scꞌul ebꞌ yin Dios, catuꞌ jix yijle nocha sbꞌa ebꞌ, catuꞌ jix yaon oc an eel pichile ebꞌ. Jaxca tuꞌ chi yun xꞌoxon el scuscꞌulal ebꞌ. 6 Jaꞌ yet jix apni oc skꞌaneal jun tiꞌ tet naj sreyal conobꞌ Nínive tuꞌ, caw jix a jucna naj yul sdespacho, jix yiꞌon el spichil naj yet yopiso, jix yaoc an eel pichile naj, catuꞌ jix ey chotan naj xol stikꞌakꞌil taan sat txꞌotxꞌ, jaxca tuꞌ jix yun ebꞌ yet chi xꞌoxon el ebꞌ tol jix snaꞌ sbꞌa scꞌul ebꞌ. 7 Jix lawi tuꞌ, jix yaoc jun ley naj rey yetoj ebꞌ yet yaawil, jix yalon naj tol cꞌam junoj mactxequel chi lowi, cꞌam chi akꞌle low noꞌ jobꞌbꞌeal noꞌ cꞌal yuqꞌuen jaꞌ noꞌ. 8 Jaꞌ tinaniꞌ, awej oc an eel pichile yu cu txꞌoxon el cu cuscꞌulal; txalanwej tet Dios, catuꞌ che bꞌejon can je pena bꞌeybꞌal cꞌal je pena naꞌbꞌal. 9 Tala cꞌuxan chi yil Dios cu naꞌbꞌal, catuꞌ chi oc tucan jun sjowal scꞌul tiꞌ, yet cꞌam chi cu qꞌueyle el yu yin junelne, ẍi naj rey tuꞌ tet ebꞌ conobꞌ tuꞌ.

10 Jaꞌ yet jix yilon Dios tol jix sqꞌuex snaꞌbꞌal ebꞌ ánima a Nínive tuꞌ, catuꞌ jix sbꞌejoncan yunen spenail ebꞌ, ma xa qꞌueyle el masanil jun conobꞌ tuꞌ yu Dios.