—Jaach jin Diosal, jaꞌton wal jun tiꞌ jix jin naꞌ yet ey jin to ecꞌ bꞌey jin conobꞌ, yuxan jix woche jix jin ela ja sattaj yet jix jin too can bꞌey conobꞌ Tarsis. Yutol caw wal wotaj, tol Dios jaach, caw ey ja mimancꞌulal, man yin oj eymanil chi tit ja jowal. Jaꞌ yet cha waloni tol oj ja waoc junoj syaꞌilal, jun txolan chi snaꞌ pax sbꞌa ja cꞌul, yutol caw ey ja mimancꞌulal. 3 Yu jun tuꞌ, yuxan chi wal ey jaach an, tol chin ja wiꞌel bꞌey yul yibꞌankꞌinal tiꞌ, yel xacꞌal mi watxꞌ tol chin cami, yintaj pax tol iquis jin to ecꞌoj, yutol ma eloc tzet jaxca jix yun walon tet ebꞌ, ẍi naj Jonás.

4 Catuꞌ jix takꞌwi Dios tet naj jaxca tiꞌ:

—¿Tumi watxꞌ cha wute ja naꞌbꞌal, yuxan chi tit ja jowal? ẍi Dios tet naj.

5 Catuꞌ jix eltoj naj Jonás stiꞌel conobꞌ yetcꞌulal bꞌey chi aol cꞌu. Jaꞌ tituꞌ jix stzokꞌel wan skꞌabꞌ teꞌ naj, catuꞌ jix swaꞌne a naj yibꞌan, catuꞌ jix ey chotan naj yalan yenel teꞌ, catuꞌ jix yechbꞌanen cꞌal tzet oj jul yibꞌan jun conobꞌ tuꞌ. 6 Jaꞌ Dios jix akꞌon chꞌibꞌa jun teꞌ tzꞌusup, yet chi oc yeneloj naj Jonás tuꞌ. Caw wal chi tzala naj yetoj jun teꞌ teꞌ tuꞌ. 7 Jaxa yet jix kꞌinibꞌi a yet junxa cꞌual, jix akꞌle pitzcꞌu a jun noꞌ bꞌaj noꞌ yu Dios. Jix kꞌuxletoj teꞌ yu noꞌ, catuꞌ jix tajel teꞌ. 8 Jaxa yet jix aol cꞌu, jaꞌ Dios jix aontej jun kaꞌeꞌ caw caj yetcꞌulal bꞌey chi aol cꞌu. Jix oc sjowal yajan cꞌu yin sjolom naj Jonás tuꞌ, caw jix el yip naj yu jun kꞌakꞌ tuꞌ, catuꞌ chi yochen xacꞌal naj chi cami.

—Yel xacꞌal mi watxꞌ tol chin cami, yintaj pax tol iquis jin an, ẍi naj.

9 Catuꞌ jix takꞌwi pax Dios tet naj jaxca tiꞌ:

—¿Tumi watxꞌ cha wute ja naꞌbꞌal, yuxan chi tit ja jowal, yu cꞌal tol jix tajel teꞌ teꞌ jix wakꞌ chꞌibꞌa ja weneloj tuꞌ? ẍi Dios tet naj.

—Yel ton jaach jin Diosal, watxꞌ, caxcꞌal chin cam yu jin jowal tiꞌ, ẍi naj tet Dios.

10 Jix yalon pax Dios tet naj jaxca tiꞌ:

—Tumi jaach jix ja waw jun teꞌ tiꞌ, man pax jaach oj jix ja wakꞌ chꞌibꞌa teꞌ. Yet jun skꞌejbꞌintajil jix chꞌibꞌa teꞌ, jaxa yet junxa skꞌejbꞌintajil jix tajel teꞌ. Caw wal chi cus xacꞌal ja cꞌul yu jun teꞌ tiꞌ. 11 Jajxam wal jin jain tiꞌ, ¿tumi man oj cus jin cꞌul yin jun miman conobꞌ Nínive tiꞌ cha naꞌ, ilaꞌ tol ecꞌbꞌan 120,000 ebꞌ unin cꞌam snaꞌbꞌal, cꞌam chi naꞌcha el yu ebꞌ ta watxꞌ ma pena tzet chi swaꞌne, catuꞌ caw miman pax sbꞌisil noꞌ jobꞌbꞌeal noꞌ? ẍi Dios tet naj Jonás.