Jaꞌ Jun Xuc Sat Awo Tol Ekꞌomxa
8
Jaꞌ tzet jix xꞌox Jehová wilaꞌ: Jaꞌton jun xuc sat awo, tol caw ekꞌomxa. 2 Catuꞌ jix skꞌanlen Jehová ey jin jaxca tiꞌ:—¿Jaach Amós, tzetyetal cha wil tituꞌ? ẍi Naj ey jin.
—Jaꞌ jun xuc sat awo tol caw ekꞌomxa chi wilaꞌ, jin chi tet.
Catuꞌ jix yalon Jehová ey jin jaxca tiꞌ:
—Jaꞌ Israel, jaxca tol tuxa jix kꞌanbꞌi eloj. Man xacꞌal oj wakꞌ mimancꞌulal yin junelojxa. 3 Jaꞌ yet oj waon oc syaꞌilal yibꞌan ebꞌ tuꞌ, jaꞌ wan bꞌit chi oc bꞌey templo, jaꞌ oj meltzo oc yin cuscꞌulalil. Ecꞌal ánima oj camoj, tzꞌin xacꞌal ẍi ebꞌ. Ecꞌal mimanile oj cancan telan tituꞌ, ẍi Jehová.
Tuxa Chi Jul Scꞌual Snaꞌle Oc Yibꞌan Conobꞌ Israel
4 Chi cam je yabꞌen wan kꞌane tiꞌ, mac jex che yetne ebꞌ yeynajil ánima, cꞌal ebꞌ mebꞌa bꞌey je conobꞌ tiꞌ. 5 Che yalon pax jaxca tiꞌ: ¿Bꞌakꞌin wal chi eyol kꞌin cꞌal yet chi ali xꞌaaw, catuꞌ oj skeꞌ cu txonon cu tiriw? ¿Bꞌakꞌin wal chi eyol scꞌual xewilal, catuꞌ oj skeꞌ cu txonon sat kawo yin ey stool, cꞌal yetoj cu echbꞌal man tzꞌajanoj? 6 Oj cu txon ixim tiriw tol cꞌamxa swatxꞌil. Oj ketne wan mebꞌa ánima tiꞌ, masantaꞌcꞌal oj xonel sbꞌa ebꞌ ey jon, catuꞌ chi oc can ebꞌ yin cu yakꞌon servil. Queytuꞌ oj yun stoolane el sjec ebꞌ ey jon, caxcꞌal asan chꞌan junoj moan xanabꞌe chi sjec ebꞌ, je chi. 7 Yu jun tuꞌ, yuxan jix yakꞌ stiꞌ Jehová; Naj chi iꞌle a can sbꞌi yu Jacob, jaꞌ chi alon jaxca tiꞌ: Cꞌam bꞌakꞌin oj toj qꞌueycꞌulal spenail ebꞌ conobꞌ tiꞌ wu, ẍi Dios.
8 Oj bꞌilwoj a masanil txꞌotxꞌ txꞌotxꞌ tiꞌ, oj okꞌ masanil ebꞌ caan sat txꞌotxꞌ. Oj tzicoꞌtanele txꞌotxꞌ txꞌotxꞌ tiꞌ, naat oj iꞌle a txꞌotxꞌ, catuꞌ oj eyqꞌuey pax oj, jaxca chi yun jaꞌ miman Nilo, chi chꞌibꞌa jaꞌ, catuꞌ chi tan pax ey jaꞌ.
9 Jain Jehová jin chi wal yu jun cꞌual tuꞌ: Yet wal chuman cꞌu, catuꞌ oj waon oc kꞌejkꞌinal, yet caw ey yajan cꞌu, catuꞌ oj oc kꞌejkꞌinal yibꞌan sat txꞌotxꞌ tiꞌ.
10 Jaꞌ je kꞌin che yaocoj, oj yun can a yin cuscꞌulalil. Jaꞌ je bꞌit oj oc can yin okꞌil yu camich. Jaxa cꞌal an pichile yet cuscꞌulal oj je yaocoj, catuꞌ oj je tzujon el xil je jolom yu je txꞌoxon el je cuscꞌulal. Oj jex okꞌ jaxca junoj mactxequel chi okꞌ yu scamichal junoj qꞌuetxan yuninal, pena xacꞌal oj yun slawi can ey masanil.
11 Jain Jehová jin chi walaꞌ, tol ey jun cꞌual oj waeytej wail bꞌey yul yibꞌankꞌinal tiꞌ. Man wailoj yu loꞌbꞌe, tam wal tajin tiꞌal yu jaꞌ chi ukꞌlei, tol jaꞌton wail yu jin kꞌane.
12 Jaꞌ ebꞌ ánima, tuxa cꞌal oj ecꞌabꞌtoj ebꞌ, oj ecꞌ ebꞌ yin seyon ecꞌ mac chi alon el jin kꞌane tet ebꞌ. Oj toj ebꞌ bꞌey stiꞌlaj jaꞌ Camnaj Mar, masantaꞌcꞌal oj apnoj oc ebꞌ bꞌey stiꞌlaj jaꞌ Mar Mediterráneo, oj lawoj ecꞌ ebꞌ bꞌey scanpaqꞌuil yul yibꞌankꞌinal tiꞌ; cꞌamxa mac oj ilcha oc yu ebꞌ.
13 Jaꞌ ebꞌ ix kꞌopo ix caw sakꞌal yili, cꞌal ebꞌ achꞌe caw ey yip, oj pax yip ebꞌ yu tajin tiꞌal yet jun cꞌual tuꞌ.
14 Queyton tuꞌ oj yun mactxequel chi yakꞌ stiꞌ tet wan echele qꞌuixwiltaj yoc bꞌey Samaria, jaꞌton ebꞌ chi alon jaxca tiꞌ: Chi wakꞌ jin tiꞌ yin sbꞌi sdiosal ebꞌ a Dan, ma yin sbꞌi sdiosal ebꞌ a Beerseba, ẍi ebꞌ. Yu jun tuꞌ, yuxan oj eyqꞌuey ebꞌ, man xacꞌal oj skeꞌ ya waan ebꞌ, ẍi Jehová.