Oj Qꞌueyle El Conobꞌ Israel
9
Jix lawi tuꞌ xin, jix wilon yin Dios, tol eyecꞌ bꞌey jun yet xaambꞌal, catuꞌ jix yalon ey jin jaxca tiꞌ:Makꞌ wejcha jun yoyal templo tiꞌ, masantaꞌcꞌal chi bꞌilwi a sjolom yoyal tuꞌ, catuꞌ chi eyqꞌuey wejlabꞌoj yibꞌan ebꞌ ánima. Ta eyto mactxequel cꞌam chi cami, jaxa yetoj chꞌen espada, oj wakꞌ makꞌle xacꞌal camoj. Caxcꞌal chi ela ebꞌ yaloni, cꞌamxa cꞌaltaꞌ junoj ebꞌ oj colcha can eloj.
2 Caxcꞌal mi chi yewbꞌa el sbꞌa ebꞌ bꞌey snaatil yalan txꞌotxꞌ txꞌotxꞌ, oj skeꞌ wiꞌon atej ebꞌ tituꞌ. Caxcꞌal chi atoj ebꞌ bꞌey satcan yaloni, oj skeꞌ wiꞌon eytej ebꞌ tituꞌ.
3 Ta chi too yewbꞌa el sbꞌa ebꞌ bꞌey sjolom wonan Carmelo, jaꞌ tituꞌ oj toj jin mitxꞌ eytej ebꞌ. Ta chi too yewbꞌa el sbꞌa ey jin bꞌey yich jaꞌ mar yaloni, oj jin chejtoj noꞌ mimej noꞌ ey yul jaꞌ mar tuꞌ, catuꞌ oj chiꞌle eytoj ebꞌ yu noꞌ tituꞌ.
4 Caxcꞌal oj jex iꞌletoj jaxca presowomal yu ebꞌ je cajat, oj jex toj tzokꞌle cam yetoj espada, oj jin oc xacꞌal ian yin waontoj syaꞌilal je yibꞌan, catuꞌ manaj swatxꞌilal oj watoj je yibꞌan, ẍi Jehová.
5 Jaꞌ Jehová Dios, Naj tol ey yipalil, jaꞌ yet chi oc mitxꞌan yin txꞌotxꞌ txꞌotxꞌ tiꞌ, chi ulitoj txꞌotxꞌ yu, catuꞌ oj okꞌa masanil ebꞌ ánima caan bꞌey txꞌotxꞌ txꞌotxꞌ tiꞌ. Chi iꞌle a txꞌotxꞌ, catuꞌ chi iꞌle ey txꞌotxꞌ yu yipal Naj, jaxca chi yun sbꞌilwi jaꞌ miman Nilo.
6 Jaꞌ Jehová jix swaꞌne scalubꞌal bꞌey satcan, jaꞌ txꞌotxꞌ txꞌotxꞌ tiꞌ eyoc sbꞌatxlubꞌal yalan yu. Jaꞌ Naj chi iꞌon a jaꞌ jaꞌ bꞌey jaꞌ mar, catuꞌ chi tit secna nabꞌ yibꞌan txꞌotxꞌ txꞌotxꞌ tiꞌ. Jehová ton yoc sbꞌi Naj.
7 Jaꞌcaw Jehová chi alon jaxca tiꞌ: Jaꞌ yul jin sat, jaex Israel jex tiꞌ, laan jex cꞌal yetoj ebꞌ a Etiopía. Jaxca jix yun jex wiꞌon eltej bꞌey txꞌotxꞌ Egipto jaxca jix yun wiꞌon cꞌal pax tej ebꞌ Filisteo bꞌey Creta, cꞌal ebꞌ Arameo bꞌey Quir, ẍi Jehová.
8 Jain Jehová jin chi wil jun nación tiꞌ yetoj sreyal, tol caw pena tzet chi yun ebꞌ, yuxan jain chi wal jaxca tiꞌ: Oj jin qꞌueyel ebꞌ, cꞌal jin joꞌon tan sbꞌi ebꞌ bꞌey sat txꞌotxꞌ txꞌotxꞌ tiꞌ. Jal pax ebꞌ yicꞌaal Jacob tiꞌ xin, Jain caw Jehová jin chi walaꞌ, tol man oj jin qꞌueyel ebꞌ yin junelne.
9 Oj wakꞌ txayele el ebꞌ yicꞌaal Israel tiꞌ xol-laj nación, jaxca chi yun xayele ixim tiriw yul txaybꞌal, catuꞌ cꞌam cꞌal junoj sbꞌakꞌ ixim chi pujcanoj.
10 Masanil ebꞌ penawom bꞌey xol ebꞌ jin conobꞌ tiꞌ, oj tzokꞌle cam ebꞌ yu chꞌen espada, jaꞌton ebꞌ chi alon jaxca tiꞌ: Jaꞌ wan syaꞌilal tuꞌ, man oj jul kibꞌan, man oj jon michꞌcha yu, ẍi ebꞌ, ẍi Dios.
Oj Caꞌ Waꞌnele A Conobꞌ Israel Yet Bꞌakꞌin
11 Jix yalon pax Jehová jaxca tiꞌ: Jaꞌ yopiso naj rey David jix lawi ey jaxca junoj na uchbꞌil eyoj, asan xin, ey jun cꞌual oj jin caꞌ waꞌne a junelxa; oj wakꞌon pax yopiso tet ebꞌ yicꞌaal, jaxca yeoc yet peyxa. 12 Yet watxꞌ, jaꞌ jantaj to ebꞌ a Edom chi to cancanoj, cꞌal masanil wanxa conobꞌlaj tol wet cꞌaltaꞌa, oj oc can ebꞌ yul skꞌabꞌ yicꞌaal Israel, ẍi Jehová, jaꞌton Naj chi cꞌal yun tzet chi yalaꞌ.
13 Chi yalon Jehová jaxca tiꞌ: Ey jun tiempoal oj juloj tol cꞌam tocꞌal chi lawi skꞌuple a ixim tiriw, catuꞌ chi jul pax stiempoal yawle ixim tiriw junelxa. Cꞌam tocꞌal chi lawi stecꞌle el yal an uva, catuꞌ chi oc pax awo tiriw junelxa. Jaꞌ bꞌey sjolomlaj wonan cꞌal bꞌey txꞌotxꞌ tzalquiltaj, caw miman sat an uva oj yakꞌa, tol oj bꞌey xacꞌal yel sne jaxca jaꞌ snukꞌ jaꞌ. 14 Yutol oj wiꞌtej jin conobꞌ Israel bꞌey eyoc ebꞌ yin presowomal, catuꞌ oj caꞌ waꞌnele a wan conobꞌ tol uchchanajtoj, jaxa scaey ecꞌ ebꞌ tituꞌ, catuꞌ oj yawon yuva ebꞌ, cꞌal yuqꞌuen svino ebꞌ. Oj yawon teꞌ awbꞌeal teꞌ ebꞌ, catuꞌ oj sloꞌon sat teꞌ teꞌ tuꞌ ebꞌ. 15 Jain Jehová je Diosal jin chi walaꞌ, tol oj wakꞌ caey ecꞌ ebꞌ bꞌey sconobꞌal. Cꞌamxa bꞌakꞌin oj el ebꞌ bꞌey sat txꞌotxꞌ jix wakꞌ tet tuꞌ junelxa, ẍi Dios.