—Jaach Jehová jin Diosal, akꞌ mimancꞌulal kin jaon yicꞌaal jon Jacob tiꞌ, tol yaliẍ conobꞌ jon chꞌan. ¿Tzet wal oj yun stecha jun tiꞌ ku jon? jin chi.

3 Catuꞌ jix snaꞌon Jehová yin jun tiꞌ, jix yalon jaxca tiꞌ:

—Jaꞌ jun tiꞌ man oj yunne, ẍi Dios.

4 Jix xꞌoxon cꞌal pax Jehová wilaꞌ, tol jix yatej jun kꞌakꞌ yin yaon oc syaꞌilal, tuxa cꞌal caj xininaj yili stzakꞌakꞌil, jix tantoj jaꞌ miman mar yu, jix tajtoj txꞌotxꞌ txꞌotxꞌ tiꞌ. 5 Catuꞌ jix walon jaxca tiꞌ:

—Jaach Jehová jin Diosal, toloj wal chi el yin ja cꞌul, ocan tucanoj. ¿Tumi oj techa ku jaon yicꞌaal jon Jacob tiꞌ? Ilaꞌ tol yaliẍ conobꞌ jon chꞌan, jin chi tet.

6 Catuꞌ jix snaꞌon Jehová yin tzetyetal naꞌbꞌil yu, jix yalon jaxca tiꞌ:

—Jaꞌ jun tiꞌ, man oj yunne, ẍi Dios.

7 Jix xꞌoxon cꞌal pax Jehová jun tiꞌ ey jin. Jatuꞌ eyecꞌ Naj yibꞌan jun muro waꞌnebꞌil, lacbꞌil a jun chꞌen plomo chi skꞌan ebꞌ waꞌnem na yu. 8 Catuꞌ jix skꞌanlen Naj ey jin jaxca tiꞌ:

—¿Tzetyetal jun cha wil tuꞌ, jaach Amós? ẍi Naj ey jin.

—Ey jun chꞌen plomo yet ebꞌ waꞌnem na chi wilaꞌ, jin chi tet.

—Jaxca chi yun yil-le junoj xaanil na yet chi latzꞌlei, chi ale oc junoj chꞌen plomo yin ta tol jichan yeocoj, queytuꞌ oj yun wilon tzet utbꞌil yeoc ebꞌ jin conobꞌ Israel tiꞌ, ta tol jichan yeoc sbꞌeybꞌal ma cꞌamaj. Ta pena, ma xacꞌal wakꞌ mimancꞌulal yibꞌan ebꞌ junelxa.

9 Jaꞌ wan wonan naat eyaoj, bꞌey chi yal sbꞌa ebꞌ yicꞌaal Isaac yin eyilal, oj lawoj eyoj. Jaꞌ wan stemplo comon dios yet ebꞌ Israel, oj uchle eyoj, catuꞌ oj wakꞌon qꞌueyle el ebꞌ yicꞌaal Jeroboam yetoj espada, ẍi Jehová.

10 Jaꞌ naj Amasías tuꞌ, yakꞌomal xaambꞌal yeoc naj bꞌey Betel, jaꞌ jix alontoj tet Jeroboam, sreyal Israel jaxca tiꞌ: Jaach rey, jaꞌ naj Amós lalan yecꞌ naj xol ebꞌ ket conobꞌ, yet chi meltzo oc naj cu cajatoj yin cu conobꞌ tiꞌ. Caw cꞌamxa chi techa yu ebꞌ ánima tzet chi yalel naj tuꞌ. 11 Chi ecꞌ naj yal cu xol jaxca tiꞌ: Oj cam Jeroboam yu chꞌen espada, catuꞌ oj iꞌle cantoj masanil conobꞌ Israel tiꞌ jaxca presowomal bꞌey txꞌoj conobꞌal, ẍi Amós, ẍi toj naj Amasías tuꞌ.

12 Jix yalon Amasías tet Amós jaxca tiꞌ:

—Elan titiꞌ jaach ẍejabꞌ Dios, jaꞌ bꞌey Judá chach toocanoj. Jaꞌ tituꞌ oj ilcha ja loꞌbꞌe, yu wan ja kꞌane cha wal tuꞌ, 13 cꞌam ojabꞌ tzet cha wal yin conobꞌ Betel tiꞌ, yutol jaꞌ titiꞌ chi oc naj rey yin eyilal, yutol caw miman yeloc apnoj jun templo cꞌal scalubꞌal naj rey bꞌey chi yakꞌ yaawil, ẍi naj Amasías tuꞌ.

14 Catuꞌ jix takꞌwi Amós jaxca tiꞌ:

—Jain tiꞌ, man ẍejabꞌoj jin cꞌaltaꞌ Dios, tam wal chi woche chi wunne. Watxꞌ chin low yin ilo meꞌ, cꞌal yin jin teynen teꞌ xol-laj teꞌal higo. 15 Asan xin, tol jaꞌ Jehová jix jin iꞌon el yin jin teynen noꞌ meꞌ tuꞌ, catuꞌ jix yalon ey jin jaxca tiꞌ: Asiꞌ, catuꞌ chi too ja walon jin kꞌane bꞌey jin conobꞌ Israel, ẍi Naj ey jin. 16 Yu jun tuꞌ, yuxan chi cam ja wabꞌen skꞌane Jehová tinaniꞌ. Jaꞌton wan kꞌane cha wal jaach tiꞌ, tol cꞌam cha walel skꞌane Dios yin ebꞌ Israel yicꞌaal Isaac, ja chi ey jin. 17 Yu jun tuꞌ, jaꞌton wan tiꞌ chi yal Jehová ey jaach: Sattaj wal ebꞌ conobꞌ, oj oc ix ja wistil yin amul ixal. Jaꞌ ebꞌ ja cꞌaal, cꞌal ebꞌ ix ja cutzꞌin oj tzokꞌle cam ebꞌ. Oj poꞌole can ecꞌ ja txꞌotxꞌ. Jaꞌ bꞌey xꞌotxꞌ ebꞌ txꞌoj conobꞌal oj jaach camoj, catuꞌ naat tacꞌal oj iꞌle cantoj ebꞌ ket Israelal jaxca presowomal, ẍi Jehová, ẍi naj Amós.