Oj Uchcha Ey Conobꞌ Israel
6
Okꞌbꞌal cꞌul mactxequel tol subꞌo xacꞌal chi yun yecꞌ tiempo yu bꞌey Sión.Okꞌbꞌal cꞌul ebꞌ cꞌam tzet chi snaꞌ bꞌey Samaria, ebꞌ syaawil nación tol asanxane miman yeloc apnoj yaloni, jaꞌton wan chi yaoc ebꞌ Israel yipoj scꞌul.
2 Che yalon tet ebꞌ je yet conobꞌ jaxca tiꞌ: Asiꞌwej bꞌey conobꞌ Calné, catuꞌ chi cam je yiloni. Chi lawi tuꞌ, catuꞌ chex too pax bꞌey miman conobꞌ Hamat, catuꞌ chex eyol bꞌey Gat yul yet ebꞌ Filisteo. ¿Tumi yel xacꞌal watxꞌ wan conobꞌlaj tuꞌ yintaj cu conobꞌ tiꞌ? ¿Tumi yel xacꞌal mimej wan nación tuꞌ yintaj cu nación tiꞌ? je chi.
3 Jaex tiꞌ cꞌam che naꞌ wal niꞌoj, ta tol lalan sjul jun scꞌual syaꞌilal. Yu cꞌal ton tzet che yun tuꞌ, yuxan lalanxa sjul scꞌual syaꞌilal tuꞌ.
4 Jaex tiꞌ, eyxa smey yili bꞌey chex ey chotan lowoj. Mimej loꞌo che yaoc yet che chiꞌon noꞌ yuneꞌ meꞌ, cꞌal noꞌ achꞌe wacax caw bꞌakꞌech.
5 Tucꞌal chi ecꞌ je tiempo je waꞌnen wan bꞌit cꞌam niꞌoj yeloc apnoj, chex bꞌitni yetoj sonal teꞌ arpa, che naꞌon je cuyon a wanojxa son, jaxca jix yun naj rey David.
6 Che yuqꞌuen je vino yul mimej vaso. Jaꞌ perfume caw ey stool che kꞌanaꞌ; cꞌam chex oc il niꞌoj, ta tol lalan yetex el yul je nación tiꞌ.
7 Jaex tiꞌ, bꞌabꞌel oj jex tojcan preso bꞌey txꞌoj conobꞌal, catuꞌ oj lawoj ey je kꞌin bꞌey tuxa cꞌal chex wejlabꞌi tuꞌ.
8 Tuxa jix yakꞌ stiꞌ Jehová, jaꞌton Naj Miman Yeloc Apnoj. Jaꞌ chi alon jaxca tiꞌ:
Caw cꞌam chi ẍaꞌ jin cꞌul jantaj smeynebꞌail jun conobꞌ yicꞌaal Jacob tiꞌ. Caw cꞌam chi ẍaꞌ jin cꞌul wan mimej sdespacho ebꞌ, yuxan oj waoc jun conobꞌ tiꞌ yul skꞌabꞌ ebꞌ scajat, yetoj masanil tzettaj yetal ey tet, ẍi Dios.
9 Yu jun tuꞌ xin, ta ey laonwan winaj yul junoj na, tꞌinan cꞌal oj cam ebꞌ slaonwanil. 10 Jaꞌ junoj yican wan camnaj tuꞌ, jaꞌton jun tuꞌ oj iꞌon eltej wan mimanile yul na yet oj akꞌle tzꞌaꞌoj, oj yalon tet junojxa mactxequel ey can bꞌey yul na tuꞌ jaxca tiꞌ: ¿Ey tom mactxequel jaꞌjun ja wetoj? ẍi. Catuꞌ oj takꞌwoj jun tuꞌ jaxca tiꞌ: Cꞌamxa mactxequel, ẍi. Catuꞌ oj yalon pax junxa tuꞌ tet: Tzꞌin cꞌal ja chi xin, yutol ey smey kakꞌon bꞌina sbꞌi Jehová, ẍi. 11 Yutol jaꞌ Jehová, oj yatej syaꞌilal yibꞌan masanil mimej na, cꞌal yibꞌan niẍtej na, pilan oj etex cantoj masanil.
12 ¿Tumi chi skeꞌ yatoj noꞌ che bꞌey satlaj chꞌen? ¿Tumi chi skeꞌ yoc mulnail yetoj chꞌen kꞌubꞌal txꞌotxꞌ bꞌey yibꞌan jaꞌ mar? Jal jaex tiꞌ xin, tol jix je qꞌuexbꞌone oc sjichanil yin spenail, caw che yetne je yet animail, caw pena xacꞌal chi yabꞌ ebꞌ ánima yet man watxꞌoj chi yun je waꞌnen yeoc junoj kꞌane.
13 Jaex tiꞌ, tuxa cꞌal che meyne je bꞌa, yu jix eyqꞌuey conobꞌ Lodebar je yu, tumi ey niꞌoj yeloc apnoj, catuꞌ che yalon xacꞌal tol chi skeꞌ je yu je yaloni, yet jix je yiꞌon cꞌal pax oc yaliẍ conobꞌ Carnáin.
14 Chi cam wal je yilon jaex Israel jex tiꞌ. Jaꞌ Jehová cu Diosal, Naj Tol Miman Yeloc Apnoj, jaꞌ chi alon jaxca tiꞌ: Oj jin chej junoj nación, yet chex yakꞌ eyqꞌueyoj, chi too tacꞌal bꞌey Hamat, yul moon bꞌey yetcꞌulal norte, masantaꞌcꞌal chi apni bꞌey jaꞌ jaꞌ eyoc smoonal bꞌey yetcꞌulal sur, ẍi Dios.