Yawtebꞌal Conobꞌ Israel Yet Chi Snaꞌon Sbꞌa Scꞌul Ebꞌ
5
Jex wet Israelal,abꞌwej jin kꞌane yet cuscꞌulal chi wal can el je yibꞌan tiꞌ:
2 Jaꞌ cu conobꞌ laan jaxca junoj ix kꞌopo tuxa chi eyqꞌueyi. Cꞌamxa bꞌakꞌin oj skeꞌ ya waan junelxa, yutol jix bꞌejlecan xꞌojli bꞌey sat txꞌotxꞌ, cꞌamxa mactxequel oj iꞌon a waanoj.
3 Jaꞌ Jehová chi alon jaxca tiꞌ:
Ta ey junoj conobꞌ chi yatoj junoj mil winaj yin jowal, asanxane cien oj meltzotej. Ta junoj conobꞌ chi yatoj junoj cien winaj yin jowal, asanxane laonwan oj meltzotej, ẍi Jehová.
4 Jaxca tiꞌ yalon Jehová ey jex: Meltzaanwejtej ey jin, catuꞌ oj jex iquisbꞌoj cꞌal ecꞌoj.
5 Cꞌam ojabꞌ chex too bꞌey conobꞌ Betel, tam wal bꞌey Guilgal, tam wal chex ecꞌ cꞌal pax toj bꞌey Beerseba, yutol jaꞌ ebꞌ a Guilgal, sowalil oj tojcan ebꞌ yin presowomal bꞌey txꞌoj conobꞌal, jal conobꞌ Betel xin, sowalil oj uchle can eyoj, ẍi Jehová.
6 Meltzaanwej oc yul skꞌabꞌ Jehová, catuꞌ oj jex iquisbꞌoj cꞌal ecꞌoj. Ta cꞌamaj, oj yatej kꞌakꞌ yibꞌan cu conobꞌ tiꞌ, cꞌam junoj comon dios bꞌey Betel oj skeꞌ yakꞌon tanoj.
7 Jaex tol che qꞌuextoj sjichanil yin spenail tiꞌ, okꞌbꞌal jex cꞌul, tol cꞌam che waꞌne yeoc skꞌane ebꞌ ánima yin swatxꞌil.
8-9 Meltzaanwej oc yul skꞌabꞌ Jehová, Naj jix waꞌnen weycan chi yij Motz, yetoj cꞌal pax weycan chi yij Orión. Jaꞌton cꞌal pax chi aon oc akꞌbꞌalil yin cꞌualil, cꞌal cꞌualil tuꞌ chi ya pax oc yin kꞌejkꞌinalil. Jaꞌton cꞌal pax chi awten jaꞌ jaꞌ ey bꞌey jaꞌ mar, catuꞌ chi secon ey bꞌey yibꞌan txꞌotxꞌ txꞌotxꞌ. Jaꞌton chi akꞌon lawoj ey ebꞌ soldado jelan yakꞌon jowal, catuꞌ chi lawi can ey scuartel ebꞌ. Jehová ton wal yoc sbꞌi Naj.
10 Okꞌbꞌal jex cꞌul, jaex yaaw jex chi chichon oc je cꞌul yin mac chi iꞌon can sjichanil bꞌey chi naꞌle oc yin swatxꞌilal, catuꞌ che yakꞌon spenail yin junoj chi akꞌon testigoal yin yel.
11 Tol che yetne ebꞌ mebꞌa, catuꞌ che yiꞌon ecꞌ stiriw ebꞌ ánima yin naꞌbꞌacꞌal. Man oj jex caey ecꞌ bꞌey yul-laj je na tol chꞌen latzꞌbꞌil oc yin, tam wal oj to skeꞌ je yuqꞌuen yal an uva jix je yawaꞌ.
12 Wotaj Jantajxa spenail jix el je yuneni. Cꞌamxa slawubꞌal je penail tuꞌ. Che yetne ebꞌ watxꞌ snaꞌbꞌal, catuꞌ che chaꞌon chꞌen tumin yin ewantajil yu jantaj tzet man watxꞌoj che yun yin je yopiso. Jaꞌ bꞌey je despacho che yakꞌ xacꞌal low yin ebꞌ mebꞌa ánima tol watxꞌ snaꞌbꞌal.
13 Yu jun tuꞌ, yuxan jaꞌ mac ey snaꞌbꞌal, chi tzꞌini xacꞌal ey je yu, yutol pena xacꞌal tzet che yunne.
14 Cꞌam ojabꞌ che yun spenail, jaꞌ ojabꞌ swatxꞌilal che yunne, yet watxꞌ chex iquisbꞌi cꞌal ecꞌoj, yet watxꞌ jaꞌ Jehová, Naj tol ey yipalil oj eecꞌ cꞌal ecꞌ je yetoj, jaxca chi yun je yalon tuꞌ.
15 Yaawej can el spenail, catuꞌ che camcꞌulnen swatxꞌilal. Chi cam je yiloni ta watxꞌ cꞌal chi yun swaꞌxi yeoc junoj kꞌane bꞌey despacho. Ta jaxca tuꞌ xin, jaꞌ Jehová cu Diosal, Naj tol ey yipalil oj cus scꞌul je yin jaex yicꞌaal jex Israel tiꞌ.
16 Jaꞌ Jehová, Naj Yaaw yin Masanil, jaꞌ chi alon jaxca tiꞌ: Jaꞌ bꞌey masanil yul-laj sparqueal conobꞌ oj oc cuscꞌulal. Jaꞌ bꞌey masanil yul-laj scalleal conobꞌ oj el aw yu syaꞌilal. Oj awtele ebꞌ mulnawom yet chi jul ebꞌ okꞌoj, yetoj ebꞌ eyoc yopiso yin yokꞌ cꞌaltaꞌa.
17 Jaꞌ yet oj jul waon oc syaꞌilal tuꞌ, caw oj okꞌ ebꞌ awwom uva, ẍi Jehová.
18 Okꞌbꞌal cꞌul mac chi yoche chi jul xacꞌal scꞌual sjowal scꞌul Jehová. ¿Je yotaj mi tzet oj je yun yet jun cꞌual tuꞌ jaex tiꞌ? Jaꞌ yet jun cꞌual tuꞌ, kꞌejkꞌinal xacꞌal oj yunne, yutol cꞌamxa sajkꞌinal.
19 Jaꞌ yet jun cꞌual tuꞌ, laan oj yun ebꞌ ánima jaxca junoj chi ela tet junoj noꞌ bꞌalam, palan cꞌal yapni oc bꞌey eyecꞌ junoj noꞌ oso. Ma jaxca yet chi octoj junoj mactxequel bꞌey yul sna, catuꞌ chi oc kꞌean bꞌey sat xaan yaloni, jaxa pax junoj noꞌ labꞌa chi chiꞌon tituꞌ.
20 Jaꞌ jun cꞌual yet sjowal scꞌul Jehová tuꞌ, caw kꞌejkꞌinal oj yuneloj, cꞌamxa niꞌoj sajkꞌinal oj txeclo a yet tuꞌ.
21 Chi yalon Jehová jaxca tiꞌ: Jantaj wan je kꞌin che yaocoj, caw yaabꞌetaj yili yul jin sat, cꞌam chi woche wan kꞌin che yaoc tuꞌ. Cꞌam chi woche wan je yambꞌabꞌail tol miman yeloc apnoj, je yaloni.
22 Cꞌam chi woche je xaambꞌal che yakꞌ ey jin, yu jin je yiꞌon can jin bꞌi, je yaloni, tam wal je yofrenda yin ixim tiriw. Tam wal chin chaꞌ noꞌ bꞌakꞌech wacax che yakꞌ yin xaambꞌalil ey jin yu watxꞌcꞌulal wetoj.
23 Naat chex el jin cꞌatan yet chi el yaw yul je nukꞌ je bꞌitni, cꞌam chi woche chi wabꞌ yoc snukꞌ je yarpa tuꞌ.
24 Jaꞌ tzet chi woche je yin, tol laan ojabꞌ cꞌal sjichanil je naꞌbꞌal cꞌal je watxꞌ bꞌeybꞌal jaxca junoj jaꞌ snukꞌ jaꞌ tol cꞌam bꞌakꞌin chi tantoj.
25 Jaex Israel jex tiꞌ, yin cawinaj abꞌil ecꞌnaj ebꞌ je mam icham bꞌey txꞌotxꞌ cusiltaj txꞌotxꞌ. ¿Tumi jaꞌ ey jin jix yakꞌ tzꞌaꞌ xaambꞌal cꞌal yofrenda ebꞌ? 26 Cꞌamaj, jaꞌ ebꞌ tuꞌ, jix yiꞌ bꞌeyecꞌ yechel sdiosal ebꞌ chi yij Moloc, cꞌal sbꞌatxbꞌanil jun echele tol yaabꞌetaj tuꞌ, cꞌal jun yechel weycan chi yij Quiiún, tol jix yaloc ebꞌ sdiosaloj, jaꞌton jun echele tuꞌ, jaꞌcaw ebꞌ jix waꞌneni. 27 Yu jun tuꞌ, yuxan oj jex wa cantoj jaxca presowomal bꞌey sattajto conobꞌ Damasco. Jaxca wal chi yun walon jain Jehová jin tiꞌ, yutol Yaaw jin, ẍi Dios.