4
Jex ix tol bꞌakꞌech jex yu je bꞌeomal jaxca noꞌ wacax ey yul yet txꞌotxꞌ Basán,jex caan jex bꞌey txꞌotxꞌ tzalquiltaj bꞌey conobꞌ Samaria, jex tol che yetne ebꞌ mebꞌa, cꞌal ebꞌ okꞌbꞌal cꞌul yili, catuꞌ che yalon tet ebꞌ je yichamil jaxca tiꞌ: Iꞌwejtej teꞌ an, tol chi kucꞌwej an, je chi, che yaloni.
2 Jaꞌ Jehová, Naj Kaawil, jix yakꞌ can stiꞌ yet jix yalon can jaxca tiꞌ: Oj apnoj scꞌual, yet oj locbꞌale oc chꞌen locxom chꞌen tol eel xaam je yin, catuꞌ oj jex jutxle bꞌeyoj, jaꞌ ebꞌ je yuneꞌ oj oc locan chꞌen anzuelo yin ebꞌ, catuꞌ oj jutxletoj ebꞌ.
3 Jain caw Jehová jin chi walaꞌ, tol txololi xacꞌal oj yun je yiꞌle el bꞌey oj makꞌle poꞌo jantaj mimej palacio tuꞌ, catuꞌ naat oj jex iꞌletoj.
Jun Tenchebꞌal Yin Lekꞌtiꞌal Kꞌane
4 Asiꞌwej bꞌey Betel, cꞌal bꞌey Guilgal, catuꞌ chex a can je yaon oc je penail. Iꞌwejtoj je xaambꞌal yet junjun skꞌinibꞌalil yin oxox cꞌual, catuꞌ che yiꞌontoj je diezmo.
5 Akꞌwej tzꞌaꞌ ixim pan ey yich yin ofrendail, yu je yalon yu diosalil. Alwej el xol ánima yu jantaj je yofrenda chi el yin je cꞌul je yakꞌoni, yutol jaxca tuꞌ chi yoche je cꞌul che yunne.
Spitalil Ebꞌ Conobꞌ Israel
6 Yu jun tuꞌ, jain jix wakꞌ je yabꞌ syaꞌil wail bꞌey masanil je conobꞌ tiꞌ. Tumi yu jun tuꞌ, jix jex meltzotej ey jin, ẍi Jehová.
7 Jain cꞌal jix walaꞌ tol jix tantoj nabꞌ yin oxebꞌ xꞌaaw yet cꞌamto chi elol sat je yawo. Jix eyqꞌuey nabꞌ bꞌey junoj conobꞌ, jal bꞌey junojxa, cꞌam nabꞌ jix yakꞌa. Jaꞌ bꞌey junoj tujan, caw chi eyqꞌuey nabꞌ, jal pax bꞌey junojxa tujan jix tajtoj je yawo, ẍi Jehová.
8 Jaꞌ caabꞌ conobꞌal jex bꞌey cꞌam chi yakꞌ nabꞌ tuꞌ, jix jex too seyo jaꞌ bꞌey junxa conobꞌ bꞌey chi yakꞌ nabꞌ; ma yabꞌ jaꞌ yet chi ecꞌtoj je tajin tiꞌal. Man yu oj tuꞌ, jix jex meltzotej ey jin.
9 Jix jex wakꞌ cuenta yetoj mimej jow kaꞌeꞌ, cꞌal yetoj wanxa syaꞌilal, catuꞌ jix wakꞌon etextoj je yawo cꞌal je yuva; jaxa noꞌ kochiꞌ noꞌ jix loꞌontoj je yigo, cꞌal teꞌ je yolivo. Man yu oj tuꞌ, jix jex meltzotej ey jin, ẍi Jehová.
10 Jix watoj wan syaꞌilal je yibꞌan, jaxca jix yun waontoj syaꞌilal bꞌey Egipto, catuꞌ jix wakꞌon cam ebꞌ je yuninal xol jowal, jaxa ebꞌ je cajat tuꞌ jix iꞌon can oc je che, catuꞌ jix je yabꞌen sabꞌ jantaj camom bꞌey bꞌulan jex ey tuꞌ. Man yu oj tuꞌ, jix jex meltzotej ey jin, ẍi Jehová.
11 Jain Jehová jin jix jex wakꞌ lawoj ey jaxca jix yun wakꞌon lawoj ey conobꞌ Sodoma cꞌal Gomorra, yuxan jantaj jex jix jex cancan tiꞌ, jaxca xacꞌal junoj cuux chi iꞌle can eltej xol kꞌakꞌ, queytuꞌ je yeocoj. Man yu oj tuꞌ, jix jex meltzotej ey jin, ẍi Jehová.
12 Yu jun tuꞌ, yuxan jaxca tuꞌ oj jex wute jex a Israel. Yutol jaxca ton tuꞌ oj wunne, yuxan waꞌnewej je bꞌa, tol oj je yil-le oc je sat wetoj, jain je Diosal jin tiꞌ, ẍi Jehová.
13 Jain Jehová jin, jix jin waꞌne mimej wonan, cꞌal kaꞌeꞌ, catuꞌ chi wakꞌon yotajne el ebꞌ ánima tzet naꞌbꞌil wu. Jain chin qꞌuex oc sajkꞌinal yin kꞌejkꞌinal, chin ecꞌabꞌ bꞌey yel xacꞌal naat eya yibꞌan txꞌotxꞌ txꞌotxꞌ tiꞌ. Jaꞌ jin bꞌi, jaꞌton Jehová Dios, yaaw jin yin Masanil, ẍi Dios.