Jaꞌ Smulnail Ebꞌ Ẍejabꞌ Dios
3
Jex conobꞌ Israel, abꞌwej tzet chi yal Jehová je yin,jaꞌton Naj jix jex iꞌon eltej bꞌey txꞌotxꞌ Egipto.
2 Chi yalon Jehová jaxca tiꞌ: Asanne jex jaex tiꞌ jix jex jin sicꞌ can el xol masanil wanxa conobꞌ ey bꞌey masanil yul yibꞌankꞌinal tiꞌ. Yu jun tuꞌ, yuxan oj waoc syaꞌilal je yibꞌan yu masanil spenail che yunne.
3 Ta ey cawanoj ánima junne chi bꞌeyi, chi yal yeloc apnoj tol watxꞌ yakꞌon ebꞌ chi yal tuꞌ.
4 Ta tol chi el yaw noꞌ bꞌalam bꞌey xol-laj teꞌ, chi yal yeloc apnoj tol jix michꞌcha ẍiꞌbꞌe noꞌ chi yal tuꞌ. Ta ey junoj noꞌ yuneꞌ bꞌalam chi el yaw bꞌey sweyubꞌ yul-laj nachꞌen, chi yal yeloc apnoj tol ey tzet jix michꞌcha ey yu noꞌ chi yal tuꞌ.
5 Ta tol chi eyqꞌuey junoj noꞌ tzꞌiquin bꞌey sat txꞌotxꞌ, chi yal yeloc apnoj tol ey junoj yaal eey chi yal tuꞌ. Ta chi a tzꞌitna jun yaal eey sat txꞌotxꞌ tuꞌ, ey tzet jix oc yul chi yal tuꞌ.
6 Ta tol chi xuꞌle noꞌ cacho bꞌey xol conobꞌ, chi xiwa masanil ebꞌ ánima. Ta ey tzetyetal chi ecꞌtoj bꞌey xol conobꞌ, chi yal yeloc apnoj tol jaꞌ Jehová chi yun jaxca tuꞌ.
7 Cꞌam junoj tzetyetal chi yun Jehová yin tol cꞌam chi yal yin sbꞌabꞌelal tet ebꞌ ẍejabꞌ.
8 ¿Mac wal junoj cꞌam chi bꞌilwi a yu xiwcꞌulal, ta jaꞌ noꞌ bꞌalam chi el yaw? ¿Mactxequel junoj man oj kꞌanabꞌ eloj, ta tol jaꞌ Jehová Naj Yaaw chi aloni?
Oj Uchcha Ey Conobꞌ Samaria
9 Alwej el yin spalacioal conobꞌ Asdod, cꞌal yin spalacioal conobꞌ Egipto: Titanwej bꞌey sjolomlaj wonan yinlaj Samaria. Ilwej jantaj sbꞌiscꞌulal ebꞌ ánima yu jantaj spenail chi yun ebꞌ yin yetne yet animail, je chi.
10 Jaꞌcaw Jehová chi alon jaxca tiꞌ: Jaꞌ ebꞌ ánima tiꞌ, caw man yotaj oj ebꞌ chi yun niꞌoj sjichanil. Jaꞌ yul-laj sna ebꞌ, jatuꞌ ey masanil tzetyetal tucꞌal chi yiꞌecꞌ ebꞌ tet ánima.
11 Yu jun tuꞌ, chi yalon pax Jehová jaxca tiꞌ: Ey jun pena snaꞌbꞌal oj juloj, oj oc joyan yin snación ebꞌ tiꞌ, catuꞌ oj akꞌle lawoj ey scuartel ebꞌ, catuꞌ oj iꞌle eltej masanil jantaj tzet ey yul spalacio ebꞌ tuꞌ, ẍi Dios.
12 Jaꞌ Jehová chi alon jaxca tiꞌ: Jaxca xacꞌal caabꞌoj qꞌuetxan yajan noꞌ meꞌ, ma niꞌoj xaam xiquin noꞌ chi colcha can el yu junoj naj ilom meꞌ yul stiꞌ junoj noꞌ bꞌalam, jaxca xacꞌal tuꞌ oj yun ebꞌ Israel caan bꞌey Samaria, caxcꞌal tol txꞌojxa swatxꞌil weyubꞌe bꞌey chi wey tinaniꞌ.
13 Abꞌwej jaex tiꞌ, catuꞌ che yalon tet ebꞌ yicꞌaal Jacob, tol jain Jehová Dios jin, yaaw jin yin masanil, jain chi walaꞌ:
14 Jaꞌ yet oj jul jun scꞌual yet oj waon oc syaꞌilal yibꞌan Israel yu spenail chi yunne, tol oj wuchey masanil wan yet xaambꞌal ebꞌ bꞌey Betel. Jaꞌ xiquinlaj wan yet xaambꞌal tuꞌ oj makꞌle ey wejna sat txꞌotxꞌ.
15 Jain caw Jehová jin chi walaꞌ, tol oj wakꞌ lawoj ey jantaj na chi kꞌanle yet stiempoal siic, cꞌal wan chi kꞌanle yet stiempoal kꞌakꞌ. Oj wakꞌ lawoj masanil wan na tol eyoc chꞌen marfil yelawiloj, catuꞌ oj wuchontoj wan mimej na tuꞌ, ẍi Dios.