Jaꞌ Conobꞌ Moab
2
Jaꞌ Jehová chi alon jaxca tiꞌ:Jaꞌ ebꞌ a Moab, caw miman spenail jix yun ebꞌ, yuxan sowalil oj waoc syaꞌilal yibꞌan ebꞌ. Yutol jix nusletoj sbꞌajil ebꞌ sreyal Edom yu ebꞌ, taan xacꞌal jix yun cantoj yu ebꞌ.
2 Yu jun tuꞌ, yuxan oj waoc skꞌakꞌal conobꞌ Moab, jaꞌ jun kꞌakꞌ tuꞌ oj akꞌon lawoj ey jantaj palacio bꞌey Queriot. Xol mimej aw oj oc yu jowal, cꞌal yokꞌ chꞌen trompeta, queytuꞌ oj yun scam masanil ebꞌ a Moab.
3 Oj wakꞌ cam sreyal ebꞌ, catuꞌ oj cam cꞌal pax ebꞌ winaj tol miman yeloc apnoj, ẍi Jehová.
Jaꞌ Conobꞌ Judá
4 Jaꞌ Jehová chi alon jaxca tiꞌ: Jaꞌ ebꞌ a Judá, caw miman spenail jix yun ebꞌ, yuxan sowalil oj waoc syaꞌilal yibꞌan ebꞌ. Ma ẍaꞌ yabꞌ wan cuybꞌanile jix wal tet ebꞌ, tam wal jix sjije jin ley ebꞌ. Jaꞌ tzet jix yun ebꞌ, tol jix oc ebꞌ yin eyilal tet comon dios bꞌey jix oc ebꞌ yichmam ebꞌ yin eyilal.
5 Yu jun tuꞌ, yuxan oj waoc skꞌakꞌal conobꞌ Judá, jaꞌ jun kꞌakꞌ tuꞌ, oj akꞌon lawoj palacio bꞌey Jerusalén, ẍi Jehová.
Oj Jul Syaꞌilal Yibꞌan Israel
6 Jaꞌ Jehová chi alon jaxca tiꞌ: Jaꞌ ebꞌ Israel tiꞌ, caw wal miman spenail chi yun ebꞌ, yuxan sowalil oj waoc syaꞌilal yibꞌan ebꞌ. Jaꞌ ebꞌ mebꞌa watxꞌ snaꞌbꞌal eyecꞌ xol ebꞌ, tol jix txonle el ebꞌ yu ebꞌ, asan yu cꞌam chi skeꞌ yakꞌon pax sjec ebꞌ, caxcꞌal asan yu stool junoj moan xanabꞌe, chi txonle xacꞌaltoj ebꞌ yu ebꞌ.
7 Caw chi etnele ebꞌ mebꞌa tuꞌ yu ebꞌ, caw pena chi yute swaꞌnen yeoc junoj kꞌane ebꞌ yibꞌan ebꞌ yeynajil. Caw qꞌuixwiltaj chi yun jin bꞌinale yu ebꞌ txꞌoj conobꞌal yu spenail chi yun ebꞌ. Jaꞌ jun mame, yetoj scꞌaal, junne junoj ix kꞌopo chi mulwi ebꞌ yetoj ix.
8 Jaꞌ an pichile chi ẍaꞌ ebꞌ yin yucꞌaꞌ chꞌen maan tumin, jatuꞌ chi ey telan ebꞌ, chi mulwi ebꞌ sattaj jun yet xaambꞌal, catuꞌ chi sloꞌon loꞌbꞌe ebꞌ chi akꞌle tet wan comon dios. Jaꞌ yetoj chꞌen tumin chi ẍaꞌ ebꞌ yin smultaoj junoj mactxequel, jaꞌ yetoj chꞌen chi sman teꞌ an ebꞌ, catuꞌ chi ucꞌwi an ebꞌ bꞌey stemplo sdiosal tuꞌ, ẍi Jehová.
9 Chi yal Jehová: Jain Jehová jin chi walaꞌ, tol jix wakꞌ lawoj ebꞌ Amorreo, yu wakꞌon can xꞌotxꞌ ebꞌ ey jex. Junelne jix wakꞌ lawoj ebꞌ, caxcꞌal mimej steel ebꞌ jaxca steel teꞌ kꞌuteꞌ, caxcꞌal caw ey yip ebꞌ jaxca teꞌ jii, jain jix jin qꞌueyel ebꞌ yin junelne.
10 Jaex tiꞌ, jain jix jex wiꞌeltej bꞌey Egipto, catuꞌ jix jex wiꞌon bꞌey yin cawinaj abꞌil bꞌey txꞌotxꞌ cusiltaj txꞌotxꞌ, yu wakꞌon xꞌotxꞌ ebꞌ Amorreo tuꞌ ey jex.
11 Jaꞌ xol ebꞌ je yicꞌaal tuꞌ, jatuꞌ jix jin sicꞌ eltej ebꞌ jix oc jin chejabꞌoj; jal wanxa ebꞌ, wet cꞌal jix yun can oc ebꞌ. ¿Man mi yeloj wan tuꞌ che naꞌ jex Israel?
12 Jaex tiꞌ, jix je yakꞌ pural ebꞌ wet yeoc yin yucꞌwi an, catuꞌ jix je tenchanen ebꞌ jin chejabꞌ chi alon el jin kꞌane.
13 Yu jun tuꞌ xin, jaxca chi yun stoo bꞌulan ixim tiriw yibꞌan junoj teꞌ carreta, tuxa cꞌal chi natxꞌatxꞌi yet chi bꞌey yu yalil, queytuꞌ oj jex wute jaex tiꞌ.
14 Jaꞌ yet jun cꞌual tuꞌ, jaꞌ ebꞌ jelan sbꞌeyi, manxa oj skeꞌ yel ebꞌ, jaꞌ ebꞌ ey yip, jaxca tol cꞌamxa niꞌoj yip ebꞌ, cꞌal ebꞌ soldado jelan yakꞌon jowal manxa oj colcha el ebꞌ.
15 Jaꞌ ebꞌ chi julwa yetoj julbꞌal, man oj techa yu ebꞌ. Yetoj ebꞌ chi yakꞌ ani, manxa oj colcha el ebꞌ, yetoj cꞌal ebꞌ chi ela yet eyoc yibꞌan che.
16 Jain caw Jehová jin chi walaꞌ, tol jaꞌ yet jun cꞌual tuꞌ, jaꞌ ebꞌ caw jelan yin jowal, oj sbꞌejcan el smitxꞌkꞌabꞌ ebꞌ, catuꞌ oj el jininoj ebꞌ, ẍi Jehová.