Jaꞌ Skꞌane Dios Jix Stzꞌibꞌe
AMÓS
Syaꞌilal Yin Wan Conobꞌlaj Ey Scawilal Conobꞌ Israel
1
Jaꞌton wan kꞌane tiꞌ jix yal naj Amós, jaꞌton jun teynem meꞌ bꞌey conobꞌ Tecoa. Caabꞌxa abꞌil yecꞌ jun miman quixcabꞌ yet tuꞌ, jaꞌ Dios jix alon can el wan kꞌane tiꞌ yin conobꞌ Israel, yet eyoc naj Uzías yin reyal bꞌey Judá, jaꞌ Jeroboam, scꞌaal Joás, eyoc yin reyal bꞌey Israel.2 Jix yalon naj Amós jaxca tiꞌ: Jaxca wal sbꞌilwi yet chi makꞌwa cꞌu, queytuꞌ chi yun yel yaw yul snukꞌ Jehová bꞌey sjolom wonan Sión bꞌey Jerusalén. Masanil txꞌotxꞌ bꞌey chi low noꞌ noꞌ oj etextoj, catuꞌ oj tajtoj an cꞌultaj bꞌey sjolom wonan Carmelo.
Jaꞌ Conobꞌ Siria
3 Jaxca tiꞌ jix yun yalon Jehová: Jaꞌ ebꞌ caan bꞌey Damasco, caw miman spenail jix yun ebꞌ, yuxan sowalil oj waoc syaꞌilal ebꞌ, yutol yel xacꞌal jix etnele ebꞌ a Galaad yu ebꞌ, jaxca wal chi yun stecꞌle el ixim tiriw.
4 Yu jun tuꞌ, yuxan oj waoc skꞌakꞌal sna ebꞌ sreyal yicꞌaal Hazael. Jaꞌ jun kꞌakꞌ tuꞌ oj akꞌon lawoj ey spalacio naj Ben-hadad.
5 Sowalil oj jin makꞌ poꞌo masanil puertalaj bꞌey conobꞌ Damasco. Catuꞌ oj wakꞌon qꞌueyel masanil ebꞌ caan bꞌey sjobꞌeal Avén, cꞌal ebꞌ yaaw bꞌey Bet-edén, yuxan oj iꞌletoj ebꞌ Sirio yin yakꞌomaloj servil bꞌey Quir, ẍi Jehová.
Jaꞌ Conobꞌ Filisteo
6 Jaꞌ Jehová chi alon jaxca tiꞌ: Jaꞌ ebꞌ a Gaza, caw miman spenail jix yun ebꞌ, yuxan sowalil oj waoc syaꞌilal ebꞌ, yutol jix iꞌletoj masanil conobꞌ yu ebꞌ, catuꞌ jix xonontoj ebꞌ yin yakꞌomaloj servilal bꞌey Edom.
7 Yu jun tuꞌ, yuxan oj waoc skꞌakꞌal smuroal conobꞌ Gaza tuꞌ. Jaꞌ jun kꞌakꞌ tuꞌ oj akꞌon lawoj ey masanil sna ebꞌ akꞌom jowal.
8 Oj wakꞌon lawoj ey ebꞌ caan bꞌey Asdod, yetoj mac eyoc yin yaawil bꞌey Ascalón. Yetoj masanil wipal oj jin toj lemna yin conobꞌ Ecrón, cꞌamxa junoj ebꞌ Filisteo oj colcha can eloj, ẍi Jehová.
Jaꞌ Conobꞌ Tiro
9 Jix yalon pax Jehová jaxca tiꞌ: Jaꞌ ebꞌ a Tiro, caw miman spenail jix yun ebꞌ, yuxan sowalil oj waoc syaꞌilal yibꞌan ebꞌ. Yutol jix aletoj jun conobꞌal ánima yin yakꞌomaloj servil bꞌey Edom yu ebꞌ, cꞌamxa niꞌoj jix snaꞌtej swa kꞌane ebꞌ jix yakꞌ yin tol yuẍtaj sbꞌa ebꞌ.
10 Yu jun tuꞌ, yuxan oj waoc skꞌakꞌal smuroal conobꞌ Tiro. Jaꞌ jun kꞌakꞌ tuꞌ oj akꞌon lawoj ey spalacio ebꞌ, ẍi Dios.
Jaꞌ Conobꞌ Edom
11 Jaꞌ Jehová chi alon jaxca tiꞌ: Jaꞌ ebꞌ a Edom tuꞌ, caw miman spenail jix yun ebꞌ, yuxan sowalil oj waoc syaꞌilal yibꞌan ebꞌ. Tol jix yujte ecꞌ yican ebꞌ, jaꞌton ebꞌ Israel, tol jix makꞌle cam ebꞌ yu ebꞌ, ma xacꞌal yakꞌ mimancꞌulal ebꞌ, jix yun xacꞌal ebꞌ tzet chi yoche scꞌul yetoj sjowal scꞌul. Ma cꞌal toj qꞌueycꞌulal sjowal scꞌul ebꞌ tuꞌ yu.
12 Yu jun tuꞌ, yuxan oj waoc skꞌakꞌal conobꞌ Temán. Jaꞌ jun kꞌakꞌ tuꞌ oj akꞌon lawoj ey spalacio ebꞌ a Bozra, ẍi Jehová.
Jaꞌ Conobꞌ Amón
13 Jaꞌ Jehová jix alon jaxca tiꞌ: Jaꞌ ebꞌ a Amón, caw miman spenail jix yun ebꞌ, yuxan sowalil oj waoc syaꞌilal yibꞌan ebꞌ. Yu cꞌal yiꞌon ecꞌ niꞌojxa txꞌotxꞌ txꞌotxꞌ ebꞌ, yuxan jix tejle eltej yul scꞌul ebꞌ ix mimejalxa bꞌey Galaad, yu ebꞌ.
14 Yu jun tuꞌ, yuxan oj waoc skꞌakꞌal smuroal conobꞌ Rabá. Jaꞌ jun kꞌakꞌ tuꞌ, oj akꞌon lawoj ey spalacio ebꞌ. Oj el aw yu jowal. Jaꞌ jun jowal tuꞌ, laan jaxca junoj miman kaꞌeꞌ caw jow.
15 Oj tojcan sreyal ebꞌ yin presowomal bꞌey txꞌoj conobꞌal, yetoj yet yaawil ebꞌ, ẍi Jehová.