Jaꞌ Skꞌane Dios Jix Stzꞌibꞌe
OSEAS
Naj Oseas Yetoj Yistil Cꞌal Ebꞌ Yuninal
1
Jaꞌ jun tiꞌ, jaꞌton skꞌane Jehová jix yal tet naj Oseas scꞌaal Beerí, yet jix ecꞌ jaywan ebꞌ yin reyal bꞌey Judá: Jaꞌton Uzías, Jotam, Ahaz, cꞌal Ezequías. Jaꞌ naj Jeroboam, scꞌaal Joás, jaꞌ eyoc yin reyal bꞌey Israel yet jun tiempoal tuꞌ.2 Jaꞌ yet jix kꞌanabꞌ Jehová tet ebꞌ Israel yu naj Oseas, jix yalon naj jaxca tiꞌ: Jaꞌ ebꞌ Israel tiꞌ, jix yaoc spenail ebꞌ jin sattaj, yutol jix spoꞌoel sbꞌa ebꞌ wintaj an. Yu jun tuꞌ xin, yuxan jaꞌ junoj ix amul ix cha waoc ja wistiloj; oj aloj junoj yuneꞌ ix yin yamulal tuꞌ, ẍi Dios.
3 Yu jun tuꞌ, jix sjije naj Oseas tzet jix yal Dios, yuxan jix yiꞌ jun ix ix chi yij sbꞌi Gómer yistiloj, scutzꞌin naj chi yij Diblaim. Jix lawi tuꞌ xin, jix yijoc unin ix, catuꞌ jix ali jun winaj unin yu ix. 4 Jix yalon Jehová tet naj Oseas jaxca tiꞌ: Jezreel,a oj ja wakꞌ yij sbꞌi naj unin tiꞌ, yutol yet xacꞌal jayebꞌ cꞌu tinaniꞌ, catuꞌ oj waon oc syaꞌilal yibꞌan ebꞌ yicꞌaal naj rey Jehú, yutol caw miman ánima jix smakꞌ cam bꞌey conobꞌ Jezreel. Catuꞌ oj wakꞌon pax lawoj el Israel tuꞌ. 5 Jaꞌ yet jun cꞌual tuꞌ, oj wakꞌ lawoj el ebꞌ soldado Israel bꞌey spananil Jezreel, ẍi Dios.
6 Jix yijon pax oc junxa yuneꞌ ix Gómer, catuꞌ jix ali jun ix unin. Jix yalon pax Dios tet Oseas jaxca tiꞌ: Lo-ruhama,b cha wakꞌ yij sbꞌi ix unin tiꞌ, yutol manxa oj cusoc jin cꞌul yin conobꞌ Israel tiꞌ. Manxa cꞌal oj wakꞌ mimancꞌulal yin. 7 Jal pax yin conobꞌ Judá xin, oj cusoc jin cꞌul yin. Jain Jehová jin tiꞌ, sDiosal jin jun conobꞌ tuꞌ, yuxan jain oj jin coloꞌ, manaj yetoj jowal oj jin coloꞌ, manaj cꞌal pax yetoj julbꞌal, manaj yetoj espada, tam wal yetoj ebꞌ soldado eyoc yibꞌan che, asanne yetoj wipalil oj skeꞌ wu jin colon eloj, ẍi Dios.
8 Jaꞌ yet jix el ix Lo-ruhama tuꞌ yin yim, catuꞌ jix yijon pax oc unin ix Gómer junelxa, jix ali junxa swinaj unin. 9 Catuꞌ jix yalon Dios tet naj Oseas jaxca tiꞌ: Lo-amí,c cha wakꞌ yij sbꞌi naj unin tiꞌ, yutol jaꞌ Israel tiꞌ manxa jin conobꞌoj yeocoj, tam wal sDiosal jin to ebꞌ.
Caꞌ Waꞌnebꞌil A Conobꞌ Israel
10 Ey wal jun cꞌual, oj wakꞌ chꞌibꞌ sbꞌisil ebꞌ conobꞌ Israel tiꞌ, laan xacꞌal oj yun sbꞌisil ebꞌ jaxca yarenail stiꞌ jaꞌ mar, cꞌam mactxequel chi skeꞌ sbꞌisoni. Jaꞌ yet jix walon tet ebꞌ jaxca tiꞌ: Manxa jin conobꞌoj jex, jin chi, jaꞌ yet tuꞌ oj al-le yin ebꞌ: Jaꞌ ebꞌ ánima tiꞌ, caw yel yuninal ton jun Dios iquis ebꞌ, ẍi ebꞌ, oj yalon ebꞌ.
11 Oj lawoj tuꞌ xin, oj syambꞌa oc sbꞌa ebꞌ Judá, yetoj ebꞌ Israel, junxane syaawil ebꞌ oj yaocoj. Yel xacꞌal oj a can ebꞌ, junxane oj yute sbꞌa ebꞌ, oj yiꞌon pax oc xꞌotxꞌ ebꞌ junelxa. ¡Caw miman yeloc apnoj jun cꞌual yet Jezreel tuꞌ!