Jaꞌ Skꞌane Dios Akꞌbꞌil Tet David
Bꞌit yet chi atoj ebꞌ Israel yul sbꞌeal Jerusalén.
132
1-2 Jaach Jehová jin Diosal, jaach ey jaach oc kipomaloj jaon yicꞌaal jon Jacob tiꞌ, naꞌtej David, yetoj masanil syaꞌilal. Naꞌtej bꞌey jix yakꞌ can stiꞌ ey jaach yet jix yalon jaxca tiꞌ:3 Man oj jin octoj yul jin na, tam wal oj jin ey telan xew bꞌey sat jin txꞌat,
4 man oj jin mutzꞌ jin sat, tam wal oj oc numna niꞌoj jin weyan,
5 yet cꞌamto chi txax jun txꞌotxꞌ bꞌey oj waꞌxoj a snail scalubꞌal Jehová, jaꞌton Naj eyoc Yipomaloj ebꞌ yicꞌaal Jacob, ẍi.
6 Jaꞌ bꞌey Efrata jix kabꞌ skꞌaneal teꞌ Scaẍail Wa Kꞌane, yuxan jix bꞌet kilon ecꞌ teꞌ jon, jaꞌ yul yet txꞌotxꞌ Jaar jix ilcha teꞌ ku jon.
7 Toonwej bꞌey scalubꞌal Jehová, eyojonwej kaan sattaj Naj.
8 Jaach Jehová jin Diosal, aan waanoj, catuꞌ chach too bꞌey ja calubꞌal yet xewilal, yetoj teꞌ Scaẍail Ja Wa Kꞌane bꞌey cha txꞌoxel ja wipalil.
9 Jaꞌ ebꞌ yakꞌomal xaambꞌal ey jaach, sbꞌeybꞌalne ojabꞌ sjichanil ebꞌ. El ojabꞌ yaw ebꞌ yin tzalacꞌulal.
10 Yu ja camcꞌulal win jain ja chejabꞌ David tiꞌ, yuxan cꞌam ojabꞌ cꞌal cha wiꞌel ja sat win jain rey jin tiꞌ, yutol sicꞌbꞌil jin el ja wu.
11 Yutol jaach caw jix ja wal can jaxca tiꞌ: Man oj jin qꞌuex bꞌey wakꞌnaj can jin tiꞌ ey jaach. Jaꞌ junoj ja wuninal oj waoc ja qꞌuexeloj yin reyal bꞌey ja despacho.
12 Ta tol jijem cꞌal oj yute sbꞌa ebꞌ ja wuninal yin jin wa kꞌane cꞌal yin tzetyetal oj wal tet ebꞌ, oj oc ebꞌ yin reyal bꞌey ja despacho, ẍi Jehová.
13 Jaꞌ Jehová jix sicꞌon can el tzalan Sión; yu scaey ecꞌ tituꞌ yuxan jix sicꞌ eloj.
14 Jix yalon jaxca tiꞌ: Jaꞌton jun tzalan tiꞌ bꞌey chi yoche jin cꞌul chin caey cꞌal ecꞌoj. Oj jin caey ecꞌ titiꞌ, yutol jaxca tuꞌ jix ẍaꞌ jin cꞌul.
15 Oj wakꞌ jin yaxilal yibꞌan ebꞌ ánima, caw oj yakꞌ sobra tzet oj sloꞌ ebꞌ caan ecꞌ tituꞌ, catuꞌ oj no scꞌul ebꞌ mebꞌa.
16 Oj jin colon pax el ebꞌ yakꞌomal xaambꞌal ey jin. Jaꞌ ebꞌ jijem chi yute sbꞌa ey jin, oj bꞌitnoj ebꞌ yu tzalacꞌulal.
17 Jaꞌ tituꞌ oj waoc junoj yicꞌaal naj rey David yin yaawil. Cꞌamxa bꞌakꞌin oj sbꞌej yakꞌon yaawil ebꞌ yicꞌaal naj rey sicꞌbꞌil el wu.
18 Jaꞌ ebꞌ chi jowi oc yin naj, oj wiꞌel sqꞌuixwil ebꞌ. Jaxa yopiso naj, oj wiꞌa can, ẍi Jehová.