Jaꞌ Jehová Yipcꞌule Yeocoj
Bꞌit yet chi atoj ebꞌ Israel bꞌey Jerusalén.
130
Jaach jin Diosal, jaꞌ chi yun wabꞌeni,jaxca wal tol ey jin eytoj yich junoj jolan xabꞌ, catuꞌ chi walon jin bꞌa ey jaach.
2 Jaach jin Diosal, abꞌ yel waw ey jaach, jacbꞌa oc ja txiquin yet chin kꞌanon ja colwal.
3 Jaach Jehová jin Diosal, kꞌinaloj ta tzꞌibꞌebꞌil cu penail ja wu. ¿Macto wal txequel oj skeꞌ stecꞌbꞌan sbꞌa ja sattaj?
4 Yutol asanne ja win chi ilcha mimancꞌulal cu jon, yet watxꞌ miman ja weloc apnoj yul cu sat jon.
5 Jaach jin Diosal, yin masanil jin cꞌul chi wechbꞌanen ja colwal yet chin ja colon eloj. Chi waoc ja kꞌane yipoj jin cꞌul.
6 Jaach jin Diosal, lalan jin majon ja colwal. Cꞌam chin cꞌuumbꞌi jin majon ja colwal yintaj ebꞌ eyoc steynemaloj conobꞌ yet chi sajbꞌi eloj. Jaxca wal smajon ebꞌ chi teynen conobꞌ tol chi yoche ebꞌ chi pet sajbꞌi eloj.
7 Kawej oc Jehová yipoj cu cꞌul jaon Israel jon tiꞌ, yutol caw chi okꞌ scꞌul kin, bꞌejan cꞌal scꞌul scolwa ketoj.
8 Jaꞌ Naj oj cu colon el yalan masanil cu penail.