2 Juez jaach yul yibꞌankꞌinal tiꞌ, txꞌox ja bꞌa tet ebꞌ chi yiꞌa can sbꞌa, yet cha waon ecꞌ spaj tet ebꞌ.

3 Jaach Jehová jin Diosal, ¿jantaj to wal tiempo oj yakꞌ tzalabꞌoj scꞌul ebꞌ penawom tuꞌ?

4 Masanil ebꞌ penawom chi yiꞌa can sbꞌa ebꞌ, chi smeyne sbꞌa ebꞌ yin spenail tuꞌ.

5 ¡Jaach jin Diosal! Caw chi cu etnele jaon ja conobꞌ tiꞌ yu ebꞌ, caw yeynajil xacꞌal chi utele ebꞌ ja conobꞌ tiꞌ yu ebꞌ.

6 Chi makꞌle cam ebꞌ ix ix camnajxa yichamil, cꞌal ebꞌ txꞌoj conobꞌal; chi makꞌle pax cam ebꞌ unin cꞌamxa smam xutx yu ebꞌ.

7 Chi yalon ebꞌ jaxca tiꞌ: Cꞌam chi yil Jehová tzet chi kunne. Man abꞌ yotaj sDiosal Jacob tuꞌ, ẍi ebꞌ.

8 Abꞌwej jex ánima tol pit che yute je bꞌa, jex tol cꞌam je naꞌbꞌal, ¿bꞌakꞌin oj naꞌcha el je yu?

9 Jaꞌ Dios jix waꞌnen cu txiquin, ¿tumi man oj yabꞌ tzet chi al-le che naꞌ? ¿Tumi man oj yilaꞌ, yutol jaꞌ Naj jix waꞌnen sbꞌakꞌ cu sat?

10 ¿Tumi man oj yaoc syaꞌilal Naj je yibꞌan che naꞌ? ¿Tumi man je yotaj oj tol jaꞌ Dios chi cu cuyoni yet chi kotajnen el jelanilal?

11 Jaꞌ Jehová, yotaj tol jaꞌ tzet chi cu naꞌ jaon ánima jon tiꞌ, cꞌam yeloc apnoj.

12 Jaach Jehová jin Diosal, caw tzalacꞌulal yet ebꞌ cha wakꞌ cuenta, catuꞌ cha wakꞌon ja cuybꞌanil tet ebꞌ,

13 yet watxꞌ cꞌam tzet chi snaꞌ ebꞌ yet chi apni oc syaꞌtajilal yibꞌan ebꞌ, yajbꞌan chi yechbꞌane swaꞌnele txꞌotxꞌ jolan bꞌey oj eyqꞌuey ebꞌ pena snaꞌbꞌal.

14 Yutol jaꞌ Jehová man oj sbꞌejcan sconobꞌ. Jantaj ebꞌ sconobꞌ xa yeocoj man oj bꞌejlecan ebꞌ xꞌojli.

15 Jaꞌ sjichanil oj yiꞌ yip yul-laj conobꞌ junelxa. Jaxa ebꞌ ánima watxꞌ snaꞌbꞌal, oj yaoc ebꞌ yip jun sjichanil tuꞌ.

16 ¿Mactxequel jix jin colon el yul skꞌabꞌ ebꞌ penawom cꞌal ebꞌ chi unen spenail?

17 Ta tol ma jin col-le el yu Jehová, ey jin xam toj bꞌey cambꞌal tinaniꞌ.

18 Jaꞌ yet junel jix jin naꞌ jaxca tiꞌ: Lalan jin telcꞌotoj chi wabꞌe, jin chi; jaxa wal scamcꞌulal jin Diosal jix jin iꞌon a waanoj.

19 Jaꞌ yet miman tzet chin naꞌ, jaꞌ Dios chi akꞌon smimanil jin cꞌul, catuꞌ chi yakꞌon jin tzalacꞌulal.

20 Jaach jin Diosal, cꞌam cha woche ta jaꞌ ebꞌ juez pena chi yun yilon yopiso ebꞌ, ta man yin oj xolilal chi yun swaꞌnen yeoc junoj kꞌane ebꞌ, jaxca yalon ley,

21 ta chi etnele ebꞌ cꞌam spenail yu ebꞌ, ma chi ale oc camich yibꞌan ebꞌ watxꞌ sbꞌeybꞌal yu ebꞌ.

22 Jal jin jain tiꞌ, jaꞌ yin Jehová chin col jin bꞌa. Jaꞌ jin Diosal eyoc weneloj.

23 Jaꞌ Jehová oj pajtzen tet ebꞌ penawom, yet oj qꞌueyle can el ebꞌ yu spenail tuꞌ. Jaꞌ cu Diosal, oj uchon lawoj ebꞌ.