2 Jaꞌ ebꞌ ánima tiꞌ chi yakꞌ lekꞌtiꞌal junjun ebꞌ. Chi yetnele sbꞌa ebꞌ, yin caabꞌ satil kꞌane chi yun skꞌanabꞌ ebꞌ.

3 Jaach jin Diosal, smoo cha qꞌueycan el wan ánima tiꞌ, yutol yin caabꞌ satil chi yute kꞌanabꞌ sbꞌa ebꞌ, catuꞌ chi smeynen sbꞌa ebꞌ.

4 Jaꞌton ebꞌ chi alon jaxca tiꞌ: Asanne ta chi skeꞌ cu kꞌanabꞌi, kꞌojbꞌil cꞌal tuꞌ. Jaꞌ cu tiꞌ oj cu colonoj. ¿Macto wal oj skeꞌ yu cu ẍejoni? ẍi ebꞌ.

5 Yuxan chi yal Jehová jaxca tiꞌ: Chi etnele ebꞌ yeynajil chi yute sbꞌa. Jaꞌ ebꞌ mebꞌa, chi el yaw ebꞌ yu syaꞌil. Yuxan sowalil chin naꞌ tzet oj wunne, yet watxꞌ chin colwa yin ebꞌ chi ochen jin colwal, ẍi Jehová.

6 Jaꞌ tzet yalnaj can Jehová chi skeꞌ kaon oc yipoj cu cꞌul. Laan jaxca chꞌen plata chi tzꞌaꞌ sicꞌlebꞌil, cꞌam niꞌoj stzꞌilal chi can yin, jujel chi akꞌle tzꞌaꞌ chꞌen yul jorna, queyton tuꞌ tzet chi yal skꞌane Jehová.

7 Jaach Jehová jin Diosal, jaach ton chon ja teyne. Tol jaach chon ja colel yul skꞌabꞌ ebꞌ ánima pena snaꞌbꞌal.

8 Jaꞌ ebꞌ penawom yal cꞌal bꞌeytuꞌ chi eyoc bꞌulan ebꞌ, catuꞌ chi tzala ebꞌ ánima yetoj spenail chi yun ebꞌ tuꞌ.