Jaꞌ An Yet Scaabꞌ Libro
SAMUEL
Yet Jix Yabꞌoc Naj David Yu Scamichal Saúl
1
Jaꞌ yet jix camtoj naj Saúl tuꞌ, catuꞌ jix eyqꞌuey ebꞌ Amalecita yu naj rey David. Jix lawi tuꞌ, catuꞌ jix meltzotej naj bꞌey Siclag, caabꞌ cꞌual jix can naj tituꞌ. 2 Jaꞌ yet yox cꞌual, jix apni oc jun naj achꞌe scꞌatan naj rey David, speto naj bꞌey bꞌulan ecꞌ ebꞌ soldado naj Saúl, tzilquiltaj xacꞌal yoc spichil naj eyocoj, catuꞌ eyatoj txꞌotxꞌ xol xil sjolom naj, yu xꞌoxon eloj tol ey scuscꞌulal. Jaꞌ yet jix apni oc sattaj naj David tuꞌ, jix ey noanoj, yu xꞌoxon eloj tol miman yeloc apnoj naj David yul sat. 3 Jix skꞌanlen naj David tet naj jaxca tiꞌ:—¿Bꞌeytuꞌ ja peto ocoj?
—Jin peto bꞌey bꞌulan ecꞌ ebꞌ soldado Israel, ẍi naj.
4 —¿Tzet chi yute sbꞌa tituꞌ jix ja wilaꞌ? Al ey jin an, ẍi naj David.
—Jaꞌ ebꞌ soldado Israel jix ela ebꞌ, caw miman ebꞌ jix cam yin jowal tuꞌ. Jix cam cꞌal pax naj Saúl yetoj jun scꞌaal chi yij Jonatán, ẍi naj.
5 —¿Tzet jix yun ja wotajnen eloj ta tol jix cam naj Saúl yetoj scꞌaal tuꞌ? ẍi naj David tet naj. 6 Jix takꞌwi naj achꞌe tuꞌ jaxca tiꞌ:
—Cꞌuxan cꞌal ey jin ecꞌ bꞌey txꞌotxꞌ wonan chi yij Gilboa, catuꞌ jix wiloni tol noan can ey naj Saúl yibꞌan chꞌen slanza, catuꞌ tzajan yapni oc wan scajat naj tuꞌ yintaj yetoj carruaje yetoj cꞌal noꞌ che yet jowal. 7 Jaꞌ yet jun txolan tuꞌ, jix tit tꞌanan naj yintaj, jix jin yilontej naj, catuꞌ jix jin yawtentoj scꞌatan. ¿Tzet cha woche? jin chi tet naj. 8 Catuꞌ jix skꞌanlen naj Saúl tuꞌ ey jin. ¿Bꞌeytuꞌ jix jaach titocoj? ẍi naj ey jin, a conobꞌ Amalecita jin, jin chi tet naj an. 9 Catuꞌ jix yalon naj ey jin tol chin jitztoj jin bꞌa scꞌatan, jix yalon ey jin tol chin makꞌ cam yin junelne. Yutol jix oc syaꞌbꞌil naj, caw chi oc pitzꞌan syaꞌilal yin jin cꞌul, yel xacꞌal watxꞌ chin el yin syaꞌil, ẍi naj ey jin an. 10 Yuxan jix jin jitztoj jin bꞌa scꞌatan naj, catuꞌ jix jin makꞌon xacꞌal camoj, yet cꞌam chi yabꞌ syaꞌil miman, yutol jix wilaꞌ tol tuxa chi cam xacꞌal el naj, jix sbꞌejey sbꞌa naj yibꞌan xaam yespada. Jaꞌ yet jix lawi scam naj tuꞌ xin, catuꞌ jix wiꞌon el scorona yet jowal yin sjolom yetoj cꞌal chꞌen brazalete eyoc yin skꞌabꞌ, yuxan jix wiꞌtej ey jaach, ẍi tet naj David.
11 Jaꞌ yet jix yabꞌen naj David jaxca tuꞌ, jix stzilontoj spichil naj yu cuscꞌulal, yetoj cꞌal ebꞌ jaꞌjun yetoj, 12 catuꞌ jix okꞌ ebꞌ yu cuscꞌulal yutol jix cam naj Saúl yetoj jun scꞌaal chi yij Jonatán, yutol ey cꞌal pax ebꞌ soldado Israel jix cam yin jowal, jaꞌton ebꞌ sconobꞌ Jehová. Jix yijle nocha sbꞌa ebꞌ yu cuscꞌulal masantaꞌcꞌal yet jix kꞌejbꞌi ey yet jun cꞌual. 13 Jix lawi tuꞌ, jix skꞌanlen naj David tet naj achꞌe jix iꞌon apnoj jun kꞌane tuꞌ:
—¿Bꞌeytuꞌ alinaj oc jaach? ẍi tet naj.
—Jain tiꞌ scꞌaal jin jun naj Amalecita caan ecꞌ je xol tiꞌ, ẍi naj.
14 —¿Tzet yu, yuxan jix ja tecꞌbꞌa ja bꞌa ja makꞌon cam jun mactxequel sicꞌbꞌil el yu Jehová? ẍi David tet naj. 15 Yet cꞌal jun txolan tuꞌ, catuꞌ jix yawten jun soldado naj David, jix yalon jaxca tiꞌ:
—Makꞌ cam jun winaj tiꞌ, ẍi David tuꞌ tet naj.
Yet cꞌal jun txolan tuꞌ, jix oc mitxꞌan jun soldado tuꞌ yin naj. 16 Jaꞌ yet lalan smakꞌle cam naj tuꞌ, jix yalon David tet naj:
—Jaach cꞌal oc cha wiꞌtej camich ja wibꞌan. Jaach jix ja walaꞌ tol jix ja makꞌ cam naj rey sicꞌbꞌil oc yu Jehová, ẍi naj David.
Bꞌit Yet Cuscꞌulal
17 Jix lawi tuꞌ, jix sbꞌitne jun bꞌit yet cuscꞌulal naj David, yu snaꞌontej scamichal Saúl yetoj Jonatán. 18 Jix yalon naj tol sowalil chi cuyle masanil ebꞌ Judá yin jun bꞌit tuꞌ. Jaꞌ jun bꞌit tuꞌ tzꞌibꞌebꞌilcan ey yul an libro yet Jaser, bꞌey chi yal jaxca tiꞌ:
19 ¡Jex wet Israelal, okꞌbꞌalcꞌule jix yun yeyqꞌuey ebꞌ bꞌinabꞌil cu xol bꞌey txꞌotxꞌ wonan Gilboa! ¡Ay… tzet wal jix yun yeyqꞌuey ebꞌ mimej winaj yeoc cu xol!
20 Cꞌam ojabꞌ che yalel jun tiꞌ tet ebꞌ a conobꞌ Gat, cꞌam ojabꞌ che yalel jun tiꞌ bꞌey yul-laj scalleal conobꞌ Ascalón, yet watxꞌ cꞌam chi tzala a ebꞌ ix Filisteo tiꞌ, yet watxꞌ cꞌam chi a tꞌujna ebꞌ ix txꞌoj conobꞌal tuꞌ yu tzalacꞌulal.
21 Cꞌam ojabꞌxa chi eyqꞌuey nabꞌ cꞌal yal akꞌbꞌal yibꞌan txꞌotxꞌ wonan Gilboa, cꞌam ojabꞌxa chi chꞌibꞌ ixim tiriw chi akꞌle yin ofrendail tituꞌ, yutol jaꞌ tituꞌ jix oc camich. Yutol jaꞌ tituꞌ jix etex cantoj chꞌen smajbꞌal sat lanza ebꞌ naj syaawil conobꞌ Israel. Jaꞌ tituꞌ jix lawi can ecꞌ skopopial yili chꞌen smajbꞌal sat slanza naj Saúl.
22 Cꞌam bꞌey tucꞌal jix meltzo naj Saúl yetoj Jonatán yet jix bꞌet ebꞌ yin jowal. Jaꞌ jun jix yun ebꞌ, tol jix sbꞌontoj yespada cꞌal sjulbꞌal yetoj ẍiqꞌuil cꞌal ẍepuꞌal wan scajat ebꞌ jix cam yu tuꞌ, jaꞌton ebꞌ caw jelan yin jowal.
23 Jaach Saúl cꞌal jaach Jonatán, caw camcꞌulnebꞌil jex wu an. Junne cꞌal je ye yet iquis jex, catuꞌ junne cꞌal je ye yet jix jex cami. Caw jelan je yecꞌ jaxca noꞌ chii, caw wal ey je yip yintaj noꞌ bꞌalam.
24 Jex ix a Israel, okꞌanwej yu scamichal naj Saúl. Jix akꞌle je pichil yu naj, an cajin kꞌap yetoj cꞌal an lino caw wal watxꞌ yili, jix yaon cꞌal pax oc chꞌen oro yelawiloj je pichil tuꞌ.
25 ¡Ay… tzet yuxan wal jix eyqꞌuey ebꞌ mimej winaj bꞌey jix oc jowal tuꞌ! Jix makꞌle cam naj Jonatán bꞌey txꞌotxꞌ tzalquiltaj txꞌotxꞌ.
26 Caw wal chi cus jin cꞌul ja wu, jaach wuẍtaj Jonatán, ecꞌbꞌanxa tet junoj wuẍtaj. ¡Cꞌamxa chi alcha jantaj ja watxꞌcꞌulal jix ja txꞌox ey jin! Yel xacꞌal ecꞌbꞌan jix yun wochen ja camcꞌulal yintaj scamcꞌulal junoj ix ix.
27 ¡Ay… tzet wal yuxan jix cam ebꞌ naj mimej winaj! ¡Masanil smitxꞌkꞌabꞌ ebꞌ naj akꞌom jowal jix qꞌueyle can eloj! ẍi naj David.