2 Al tet naj Aarón,

yetoj tet ebꞌ scꞌaal,

cꞌal tet masanil ebꞌ ja wet conobꞌ Israel,

tol jain Jehová jin chi wal wan chejbꞌanile tiꞌ:

3 Yal cꞌal mactxequel junoj jex che makꞌ cam junoj wacax,

ma junoj meꞌ,

ma junoj noꞌ chiw bꞌey yinlaj eltoj bꞌey bꞌulan jex ecꞌ tiꞌ,

4 ta tol manaj bꞌey sattaj eltoj snail bꞌey chin chaꞌle jin bꞌa je yetoj chi smakꞌ cꞌam noꞌ,

jaꞌ jun ánima tuꞌ sowalil chi iꞌle el je xol.

Jaꞌ jun mactxequel tuꞌ chi oc spenail,

yutol tucꞌal chi malcan ey ẍiqꞌuil noꞌ noꞌ tuꞌ yu tituꞌ.

5 Jaxca ton tiꞌ chi yun walon can ey jex,

yet watxꞌ man comonoj che makꞌ cam noꞌ yin xaambꞌalil bꞌey stiꞌeltoj bꞌey bꞌulan jex ecꞌ tuꞌ,

yuxan jaꞌ naj yakꞌomal xaambꞌal tuꞌ,

jaꞌ naj chi akꞌon noꞌ xaambꞌal tuꞌ ey jin yet chi oc mimancꞌulal yin je penail.

6 Jaꞌ jun yakꞌomal xaambꞌal tuꞌ,

jaꞌ chi txion oc ẍiqꞌuil noꞌ yinlaj jun yet xaambꞌal tuꞌ jin sattaj,

jaꞌton jun eyoctoj yul na bꞌey chin chaꞌle jin bꞌa je yetoj.

Chi lawi tuꞌ,

catuꞌ chi akꞌle stzꞌaꞌ ẍepuꞌal noꞌ jin sattaj an,

yutol caw watxꞌ yoc sabꞌ chi wabꞌe.

7 Cꞌam ojabꞌxa bꞌakꞌin che yakꞌ junojxa xaambꞌal tet junoj ebꞌ comon dios,

jaꞌton wan bꞌey jix je yiꞌey je bꞌa tet;

yu cꞌal wan tuꞌ yuxan ocnaj je penail jin sattaj.

Jaꞌ jun tiꞌ ley chi yun can ey jex,

yetoj tet ebꞌ je yicꞌaal yet bꞌakꞌin.

8 Yal cꞌal mactxequel junoj je yet Israelal tiꞌ,

ma junoj txꞌoj conobꞌal caan je xol tuꞌ,

ta chi yakꞌ junoj xaambꞌal chi tzꞌaꞌi,

ma yal cꞌal tzet xaambꞌalil,

9 ta tol cꞌam chi yiꞌtej bꞌey stiꞌ snail bꞌey chin chaꞌle jin bꞌa je yetoj yet chi akꞌle ey jin,

jaꞌ jun ánima tuꞌ,

sowalil tol che yiꞌel je xol.

10 Caw ey sjowal jin cꞌul je yibꞌan jaex Israel jex tiꞌ,

cꞌal ebꞌ txꞌoj conobꞌal caan ecꞌ je xol,

ebꞌ tol chi chiꞌon ẍiqꞌuil noꞌ noꞌ.

Caw chi tit jin jowal yin ebꞌ,

yuxan oj jin qꞌueyel ebꞌ je xol.

11 Yutol jaꞌ masanil noꞌ noꞌ cꞌal ebꞌ ánima,

jaꞌ yu ẍiqꞌuil yuxan iquis ecꞌoj,

yu jun tuꞌ xin,

yuxan chi walaꞌ,

tol chi secle oc ẍiqꞌuil noꞌ yinlaj jun yet xaambꞌal tuꞌ yet chi tancan el spenail;

yutol jaꞌ chicꞌ tuꞌ chi skeꞌ yakꞌon tan spenail.

12 Yuxan chi wal ey jex jaex Israel jex tiꞌ:

Cꞌam ojabꞌ junoj jex ma junoj txꞌoj conobꞌal caan ecꞌ je xol tiꞌ,

chi chiꞌon ẍiqꞌuil noꞌ noꞌ.

13 Yal cꞌal mactxequel ma ebꞌ txꞌoj conobꞌal caan je xol tiꞌ,

tol chi michꞌcha junoj noꞌ yu,

ma junoj noꞌ tzꞌiquin,

jaꞌton noꞌ tol chi chiꞌle cꞌaltaꞌa,

sowalil chi yiꞌcan el ẍiqꞌuil noꞌ ebꞌ,

catuꞌ chi smujon can eytoj ebꞌ yalan txꞌotxꞌ.

14 Yutol jaꞌ chicꞌ tuꞌ,

jaꞌ chi akꞌon yiquisal masanil tzet iquis yeecꞌ yul yibꞌankꞌinal tiꞌ,

yuxan chi wal canoj tol cꞌam chi skeꞌ ẍiꞌle ẍiꞌbꞌeal noꞌ noꞌ tol eyto oc ẍiqꞌuil yin,

yutol jaꞌ yin eyoc skꞌinal noꞌ.

Ta ey mactxequel chi chiꞌon ẍiqꞌuil noꞌ tuꞌ,

sowalil chi iꞌle el je xol.

15 Yal cꞌal mactxequel je xol jaex Israel jex tiꞌ,

ma junoj txꞌoj conobꞌal chi chiꞌon ẍiꞌbꞌeal noꞌ noꞌ tucꞌal chi cameloj,

ma tol makꞌbꞌil cam yu junoj noꞌ xol-laj teꞌal noꞌ,

jaꞌ jun mactxequel chi chiꞌon tuꞌ,

sowalil chi xꞌael spichil catuꞌ chi aẍni,

tzꞌilto cꞌal pax chi yun canoj masantaꞌcꞌal chi kꞌejbꞌi eyoj.

16 Ta tol cꞌam cꞌal chi xꞌael spichil ma cꞌam chi aẍni,

jaꞌ jun tuꞌ chi can cꞌal can spenail tuꞌ yibꞌan,

ẍi Dios.