2 Al tet ebꞌ ja wet Israelal,

tol jain chi wal wan chejbꞌanile tiꞌ:

Jain ton Jehová je Diosal jin chi walaꞌ,

3 manche je bꞌeybꞌalne sbꞌeybꞌal ebꞌ ánima a Egipto,

jaꞌton jun miman conobꞌ bꞌey ecꞌnaj jex caan yet yalantoj.

Man oj je bꞌeybꞌalne pax sbꞌeybꞌal ebꞌ ánima a Canaán bꞌey lalan jex wiꞌontoj tinaniꞌ.

4 Jain Jehová je Diosal jin,

jain chi walaꞌ.

Jijewej jin chejbꞌanil tiꞌ,

catuꞌ che bꞌeybꞌalne jin ley.

5 Bꞌeybꞌalnewej jin chejbꞌanil cꞌal jin ley.

Jaꞌ mactxequel oj jijenoj,

oj naatbꞌoj cꞌal skꞌinal yu.

Jain ton Dios jin tiꞌ chi walaꞌ.

6 Cꞌam ojabꞌ junoj winaj je xol tiꞌ chi yun amulal yetoj junoj ix ix tol yican to sbꞌa yetoj.

7 Cꞌam ojabꞌ junoj mactxequel je xol chi yiꞌel sqꞌuixwil smam yet chi yun amulal yetoj xutx;

yutol xutx,

caw man watxꞌoj jun bꞌeybꞌale jaxca tuꞌ.

8 Cꞌam ojabꞌ junoj winaj je xol chi yiꞌel sqꞌuixwil smam yet chi yun mul yetoj yistil smam.

9 Cꞌam ojabꞌ junoj winaj chi yun mul yetoj yanabꞌ:

Caxcꞌal mi tol scaabꞌ yanabꞌ yeoc yu smam,

ma yu xutx;

caxcꞌal tol jaꞌ tituꞌ alinaj ix bꞌey yul sna,

ma txꞌoj bꞌey alinaj ix,

cꞌam chi skeꞌ smitxꞌon ocoj.

10 Cꞌam ojabꞌ junoj winaj chi yiꞌel sqꞌuixwil yin yunen amulal yetoj junoj yitxiquin,

ta yitxiquin yu scꞌaal ma yu scutzꞌin,

cꞌam chi skeꞌ smitxꞌon ocoj.

11 Cꞌam ojabꞌ junoj winaj chi yun amulal yetoj yuneꞌ yistil smam,

yutol scutzꞌin smam,

catuꞌ tol caw yanabꞌ naj yeoc ix,

cꞌam cꞌal chi skeꞌ yunen mul yetoj ix.

12 Cꞌam ojabꞌ junoj winaj chi yun amulal yetoj yanabꞌ smam,

yutol yican to sbꞌa ix yetoj naj.

13 Cꞌam ojabꞌ junoj winaj chi yun mul yetoj sno xutx,

yutol yican to sbꞌa ix yetoj naj yu xutx.

14 Cꞌam ojabꞌ junoj winaj chi yiꞌel sqꞌuixwil yuẍtaj smam,

yet chi yunen amulal yetoj yistil yuẍtaj smam tuꞌ.

15 Cꞌam ojabꞌ junoj winaj chi yun amulal yetoj yalibꞌ,

yutol yistil scꞌaal;

cꞌam chi skeꞌ yunen mul yetoj.

16 Cꞌam ojabꞌ junoj winaj chi yiꞌel sqꞌuixwil yuẍtaj,

yet chi yunen amulal yetoj yistil yuẍtaj tuꞌ.

17 Ta ey junoj winaj yiꞌlenaj junoj ix ix,

catuꞌ chi yunen mul yetoj yuneꞌ ix,

ma yetoj junoj yitxiquin ix,

jaxca tol scaabꞌ scutzꞌin naj yeocoj,

cꞌam chi skeꞌ smitxꞌon oc naj,

jaꞌ jun tuꞌ caw qꞌuixwiltaj,

yutol jato cꞌal oc ebꞌ.

18 Cꞌam ojabꞌ junoj winaj chi yiꞌa sno yistil yin scaabꞌ yistiloj,

cꞌam chi skeꞌ yiꞌlen sbꞌa ebꞌ yet iquisto ecꞌ yistil naj tuꞌ,

yet watxꞌ cꞌam chi oc cajlebꞌail snan xol ebꞌ ix.

19 Cꞌam ojabꞌ junoj winaj chi yun mul yet lalan yilon sbꞌisbꞌal xꞌaaw ix ix.

20 Cꞌam ojabꞌ junoj winaj chi yun mul yetoj yistil junoj yet winajil,

yutol man watxꞌoj chi yun can ebꞌ jaxca tuꞌ.

21 Cꞌam ojabꞌ junoj winaj chi yakꞌ tzꞌaꞌ yuninal yin xaambꞌaloj tet jun comon dios chi yij Moloc.

Ta chi yun ebꞌ jaxca tuꞌ,

caw chi oc spenail ebꞌ yul jin sat.

22 Cꞌam ojabꞌ junoj winaj chi yun mul yetoj yet winajil,

jaxca chi yun yetoj junoj ix ix;

yutol caw wal yaabꞌetaj jun tuꞌ yul jin sat.

23 Cꞌam ojabꞌ junoj winaj chi yun mul yetoj junoj noꞌ noꞌ;

cꞌam ojabꞌ mactxequel chi yetnetoj sbꞌa yin jaxca wan tuꞌ.

Cꞌam ojabꞌ pax junoj ix ix chi yun mul yetoj junoj noꞌ noꞌ,

yutol caw yaabꞌetaj jun tuꞌ yul jin sat.

24 Cꞌam ojabꞌ mactxequel chi yetnetoj sbꞌa yin wan tzetyetal tiꞌ.

Yutol jaꞌ yin masanil wan tuꞌ,

chi yetnetoj sbꞌa wan conobꞌ oj jin qꞌueyel je sattaj tiꞌ.

25 Yu wan tuꞌ,

yuxan manxa watxꞌoj yili xꞌotxꞌ ebꞌ yul jin sat.

Yuxan lalan wakꞌon sowalil tet ebꞌ,

jaxa xꞌotxꞌ ebꞌ tuꞌ oj akꞌon qꞌueyel ebꞌ.

26 Jal jaex Israel jex tiꞌ,

yetoj pax ebꞌ txꞌoj conobꞌal caan ecꞌ je xol tuꞌ,

jijewej jin chejbꞌanil tiꞌ,

catuꞌ che bꞌeybꞌalneni,

man comonoj che yatoj je bꞌa xol tzet man watxꞌoj,

27 yutol jaꞌ wan pena bꞌeybꞌale tuꞌ,

jix sbꞌeybꞌalne ebꞌ ánima caan bꞌey jun conobꞌal tuꞌ,

yuxan manxa watxꞌoj yili xꞌotxꞌ ebꞌ yul jin sat,

28 manche je bꞌeybꞌalne spenail sat txꞌotxꞌ txꞌotxꞌ tiꞌ,

yet watxꞌ man oj jex jin qꞌueyel jaxca jix yun ebꞌ ecꞌnaj caan sat txꞌotxꞌ txꞌotxꞌ tiꞌ yet sbꞌabꞌelal.

29 Jaꞌ mactxequel chi bꞌeybꞌalne wan tzetyetal yaabꞌetaj tiꞌ,

jaꞌ jun tuꞌ sowalil chi qꞌueyle el je xol.

30 Yu jun tuꞌ xin,

bꞌeybꞌalnewej jin chejbꞌanil,

cꞌam ojabꞌ che bꞌeybꞌalne wan bꞌeybꞌale tol yaabꞌetaj yili yul jin sat,

wan bꞌeybꞌalnebꞌil yu ebꞌ ánima ecꞌnaj caan sat txꞌotxꞌ txꞌotxꞌ jix wakꞌ ey jex tiꞌ,

cꞌam ojabꞌ che yetnetoj je bꞌa yu wan bꞌeybꞌale tuꞌ.

Jain Jehová je Diosal jin chi walaꞌ,

ẍi Dios.