Al tet naj ja wuẍtaj Aarón,

tol man comonoj chi octej naj bꞌey yul na tol asan jin ey wet jin txꞌojli,

bꞌey yintaj octej an kꞌap eyoc smajiloj sattaj Scaẍail Jin Wa Kꞌane,

yet watxꞌ cꞌam chi cam naj,

yutol oj jin txꞌox jin bꞌa xol asun bꞌey yibꞌan smajil Scaẍail Jin Wa Kꞌane bꞌey chi akꞌle tan spenail.

3 Ta chi snaꞌbꞌalne naj Aarón tuꞌ yoctej titiꞌ,

sowalil chi yakꞌ junoj noꞌ achꞌe wacax naj yin xaambꞌaloj yu spenail,

yetoj cꞌal pax junoj noꞌ icham meꞌ chi yakꞌ tzꞌaꞌ masanil.

4 Catuꞌ chi yaon oc an sjojan pichil naj,

yetoj an kꞌotxan kꞌap yet yul wexe,

cꞌal yetoj an scꞌalil snan,

yetoj an skꞌoxil sjolom naj.

Masanil wan pichile tiꞌ,

lino ojabꞌ cꞌal eloj,

chi aẍni can naj catuꞌ chi yaon oc spichil naj tuꞌ.

5 Chi lawi tuꞌ xin,

chi yakꞌon cacꞌonoj noꞌ icham chiw yin xaambꞌaloj yu spenail ebꞌ conobꞌ Israel,

cꞌal junoj noꞌ meꞌ chi akꞌle tzꞌaꞌoj.

6 Chi lawi tuꞌ xin,

chi akꞌle junoj noꞌ achꞌe wacax yin xaambꞌalil yu naj Aarón.

Jaꞌ junoj noꞌ yet naj yul yet,

yu yakꞌle tan spenail yetoj masanil ebꞌ eyecꞌ yetoj yul sna.

7 Catuꞌ chi yiꞌontej cacꞌonoj noꞌ icham chiw bꞌey sattaj snail bꞌey chin chaꞌle jin bꞌa je yetoj.

8 Chi cam wal sicꞌlen el xol noꞌ chiw tuꞌ scacꞌonal;

jun noꞌ chi akꞌle yin xaambꞌaloj jin sattaj;

jal junxa noꞌ xin,

chi ale cantoj spenail yibꞌan,

catuꞌ chi jajle cantoj noꞌ bꞌey txꞌotxꞌ cusiltaj txꞌotxꞌ.

9 Jaꞌ noꞌ chiw chi sicꞌle can el xol tuꞌ,

wet chi yun yakꞌlei,

chi yiꞌtej naj Aarón yu yoc noꞌ yin xaambꞌalil,

yet chi elcan spenail ebꞌ conobꞌ.

10 Jal junxa noꞌ chiw tuꞌ,

yin yiquisal chi yun yakꞌle noꞌ jin sattaj,

chi ale cantoj spenailal yibꞌan noꞌ,

catuꞌ chi jajle cantoj noꞌ bꞌey cusiltaj txꞌotxꞌ,

yet chi iꞌle can el spenail ebꞌ conobꞌ.

11 Jaꞌ yet chi lawi yakꞌon noꞌ achꞌe wacax tuꞌ naj Aarón yin xaambꞌalil,

yet chi akꞌle tan spenail yetoj masanil ebꞌ caan yetoj yul sna.

12 Catuꞌ chi yiꞌontej jun txayibꞌ chꞌen nonaj yetoj stzakꞌakꞌ,

wan eey bꞌey jun yet xaambꞌal tuꞌ jin sattaj,

yetoj cꞌal caabꞌoj wotzan teꞌ incienso sukꞌukꞌi yoc sabꞌ,

catuꞌ chi yiꞌon octej bꞌey yintaj an kꞌap eyoc smajiloj bꞌey chi akꞌle xaambꞌal ey jin an.

13 Chi lawi tuꞌ,

chi yaon oc jun teꞌ incienso sukꞌukꞌi yoc sabꞌ tuꞌ yibꞌan stzakꞌakꞌ tuꞌ jin sattaj,

jaxa smucꞌal chi too bꞌakꞌan yibꞌan smajil teꞌ Scaẍail Jin Wa Kꞌane bꞌey chi akꞌle tan spenail,

yet watxꞌ cꞌam chi cam naj Aarón tuꞌ.

14 Catuꞌ chi yiꞌontej niꞌoj ẍiqꞌuil noꞌ achꞌe wacax tuꞌ,

chi slaeytoj yiximal skꞌabꞌ xol chicꞌ,

catuꞌ chi xiontoj yibꞌan smajil teꞌ caẍa tuꞌ,

jaxa pax yetcꞌulal stiꞌ bꞌey chi octej tuꞌ,

jujel chi xioc chicꞌ yibꞌan jun smajil tuꞌ.

15 Chi lawi tuꞌ xin,

chi eltoj stiꞌ na yet chi smakꞌon cam noꞌ icham chiw chi oc yin xaambꞌaloj yu spenail ebꞌ conobꞌ,

catuꞌ chi yiꞌon octej ẍiqꞌuil noꞌ bꞌey yintaj an kꞌap tuꞌ,

catuꞌ chi xion pax ey ẍiqꞌuil noꞌ tuꞌ yibꞌan chꞌen smajil tuꞌ cꞌal bꞌey jin sattaj,

jaxca wal chi yute ẍiqꞌuil noꞌ achꞌe wacax tuꞌ yet sbꞌabꞌelal.

16 Jaxca tuꞌ oj yute sajbꞌanen jun lugar naj Aarón tol wet yeoc jin txꞌojli,

yu spenail cꞌal yu yecꞌnajil ebꞌ je yet Israelal.

Quey pax tuꞌ oj yute sajbꞌanen jun Kꞌap Na bꞌey chin chaꞌle jin bꞌa je yetoj,

yutol ey jex ecꞌ snan xol je penail.

17 Cꞌam ojabꞌ junoj mac eyoctoj yul snail jin calubꞌal yet eyoctoj naj Aarón bꞌey jun lugar tol wet jin txꞌojli jain Jehová jin tiꞌ,

yet chi yakꞌon wan xaambꞌal yet chi tan spenail,

yetoj spenail ebꞌ caan yetoj yul sna,

yetoj cꞌal spenail ebꞌ conobꞌ Israel.

18 Catuꞌ chi el pax toj naj sajbꞌanen jun yet xaambꞌal eyecꞌ jin sattaj,

chi yiꞌon eltoj niꞌoj ẍiqꞌuil noꞌ wacax cꞌal niꞌoj yet noꞌ icham chiw,

chi yaon oc yin yucꞌaꞌ jun yet xaambꞌal bꞌey scanebꞌal xiquin.

19 Catuꞌ chi slaon eytoj jujeloj yiximal skꞌabꞌ xol ẍiqꞌuil noꞌ noꞌ tuꞌ,

catuꞌ chi xion oc yibꞌan jun yet xaambꞌal tuꞌ,

jaxca tuꞌ chi yun sajbꞌanen jun yet xaambꞌal tuꞌ,

cꞌal yu je penail jaex Israel jex tiꞌ.

20 Chi lawi sajbꞌanele el masanil wan tuꞌ naj Aarón,

yetoj cꞌal jun yet xaambꞌal,

catuꞌ chi yiꞌontej junxa noꞌ iquis chiw naj tuꞌ.

21 Chi lawi tuꞌ,

chi yaon oc scaabꞌil skꞌabꞌ naj yibꞌan sjolom noꞌ,

catuꞌ chi oc ian yalon ey spenail cꞌal yecꞌnajil ebꞌ yet conobꞌ Israel yibꞌan noꞌ.

Jaxca tuꞌ chi yun scancan spenail ebꞌ yibꞌan noꞌ,

catuꞌ caw naat chi too junoj mactxequel yu stoo sjajle can el noꞌ bꞌey txꞌotxꞌ cusiltaj txꞌotxꞌ.

22 Jaꞌ yet chi toocan noꞌ chiw tuꞌ bꞌey txꞌotxꞌ cusiltaj txꞌotxꞌ yu sqꞌueycantoj noꞌ.

Queytuꞌ chi yun yiꞌle cantoj jantaj spenail ebꞌ conobꞌ Israel yu noꞌ,

bꞌey cꞌamxa ánima chi eqꞌui.

23 Chi lawi tuꞌ xin,

chi oc pax toj naj Aarón tuꞌ yul jun snail jin calubꞌal tuꞌ,

catuꞌ chi sqꞌuexon el spichil naj eyocoj,

an tol lino cꞌal eloj,

an eyoc yu yet chi octoj naj yul jun lugar tol asan jin ey wet jin txꞌojli,

catuꞌ chi yakꞌon can an spichil naj tituꞌ.

24 Jaꞌ bꞌey yul snail jin calubꞌal tuꞌ,

jaꞌ tituꞌ chi aẍni can naj,

catuꞌ chi yaon oc an spichil tol chi skꞌanbꞌalne cꞌaltaꞌ yin yopiso.

Chi lawi tuꞌ,

chi yakꞌon tzꞌaꞌ noꞌ xaambꞌal tuꞌ yul yet xꞌojli,

cꞌal wan xaambꞌal yet ebꞌ conobꞌ.

Jaxca tuꞌ chi yun stancan el spenail,

yetoj cꞌal yet ebꞌ conobꞌ tuꞌ.

25 Jaꞌ jantaj ẍepuꞌal noꞌ xaambꞌal chi akꞌle yu spenail tuꞌ,

chi akꞌle pax tzꞌaꞌ yibꞌan jun yet xaambꞌal tuꞌ.

26 Jaꞌ naj jix bꞌet jajon cantoj noꞌ icham chiw bꞌey txꞌotxꞌ cusiltaj txꞌotxꞌ tuꞌ,

jaꞌ yet chi juli,

chi xꞌaon el spichil,

catuꞌ chi aẍni.

Chi lawi tuꞌ chi xa skeꞌ yoctej junelxa bꞌey bꞌulan ecꞌ ebꞌ tuꞌ.

27 Jaꞌ noꞌ achꞌe wacax,

yetoj noꞌ icham chiw jix makꞌle cam yin xaambꞌal yu stancan el spenail tuꞌ,

noꞌ tol jix iꞌletej ẍiqꞌuil bꞌey jun lugar tol wet yeoc jin txꞌojli tuꞌ,

chi iꞌle cantoj smimanil noꞌ bꞌey stiꞌeltoj bꞌey bꞌulan jex ecꞌ tuꞌ.

Jaꞌ tituꞌ chi akꞌle tzꞌaꞌ noꞌ yetoj stzꞌuumal,

cꞌal ẍiꞌbꞌeal noꞌ,

cꞌal yul scꞌul noꞌ.

28 Jaꞌ naj yakꞌomal xaambꞌal chi akꞌon tzꞌaꞌ noꞌ tuꞌ,

sowalil chi xꞌael spichil,

chi aẍni,

catuꞌ chi xa skeꞌ yoctej je xol bꞌey bꞌulan jex ecꞌ tuꞌ.

29 Jaꞌ jun tiꞌ,

chejbꞌanile chi yun can ey jex.

Jaꞌ yet laonebꞌ yoc yet sjujebꞌ xꞌaaw,

che yijle nocha je bꞌa,

catuꞌ cꞌam junoj mactxequel chi mulna yet jun cꞌual tuꞌ,

tam wal jaex a conobꞌ Israel jex tiꞌ,

tam wal ebꞌ txꞌoj conobꞌal eyecꞌ je xol.

30 Yutol jaꞌ jun cꞌual tuꞌ,

scꞌual yakꞌle xaambꞌal yu je penail,

yet watxꞌ chi tancan el je penail jin sattaj.

31 Jaꞌ jun cꞌual tuꞌ,

scꞌual xewilal chi yun canoj,

cꞌal je yijlen nocha je bꞌa;

ley chi yun can oc je xol.

32 Yuxan jaꞌ naj sat yakꞌomal xaambꞌal tuꞌ,

jacꞌaltaꞌ junoj scꞌaal naj chi oc can sqꞌuexeloj.

Oj ale atoj aceite olivo yibꞌan sjolom cꞌal yakꞌle xaambꞌal yu yoc can yin yopiso,

catuꞌ oj yaon oc spichil tol caw watxꞌ scawxi,

cꞌal yili an.

33 Jaꞌ oj akꞌon xaambꞌal yet chi sajbꞌanele el jun Lugar Tol Wet Yeoc Jin Txꞌojli,

cꞌal bꞌey jin calubꞌal bꞌey chin chaꞌle jin bꞌa je yetoj,

cꞌal jun yet xaambꞌal,

cꞌal yu yakꞌle tan spenail ebꞌ yakꞌomal xaambꞌal yetoj cꞌal je yet jaex conobꞌ Israel jex tiꞌ.

34 Jaꞌ jun tiꞌ,

ley chi yun can oc je xol.

Junel chi akꞌle wan xaambꞌal tuꞌ yul junjun abꞌil,

yet chi el je penail je yibꞌan jaex conobꞌ Israel jex tiꞌ,

ẍi Dios.

Jaxca cꞌal jix yun yalon Jehová tet naj Moisés,

queytuꞌ jix yun yalon naj tet ebꞌ yet Israelal.