2 Alwej tet ebꞌ je yet Israelal tol jain chi wal wan chejbꞌanile tiꞌ.

Ta ey junoj winaj eyoc junoj syaꞌilal yin smimanil,

ta ey tzet chi el yin swinajil yu junoj yaꞌbꞌil,

jaꞌ yu jun tuꞌ,

man sajbꞌanebꞌiloj chi yun canoj.

3 Caxcꞌal tol chi el cꞌaltaꞌ wan tuꞌ yin,

ma ey bꞌey chi maji junoj tiempoal,

chi tit junelxa,

jaꞌ yu jun tuꞌ,

man sajbꞌanebꞌiloj chi yun canoj.

4 Yal cꞌal tzet weyubꞌeal bꞌey chi wey jun winaj tuꞌ,

ma yal cꞌal tzetyetal bꞌey chi ey chotanoj,

jaꞌ yu jun tuꞌ,

man sajbꞌanebꞌiloj chi yun canoj.

5 Yal cꞌal mactxequel chi mitxꞌon jun weyubꞌe bꞌey chi ey telan jun winaj tuꞌ,

6 ma chi ey chotan bꞌey chi ey chotanoj,

tzꞌiltaj chi yun canoj.

Sowalil chi xꞌael spichil,

catuꞌ chi aẍni pax oj,

tzꞌilto cꞌal pax yeocoj masantaꞌcꞌal yet chi kꞌejbꞌi eyoj.

7 Yal cꞌal mactxequel chi mitxꞌon junoj tol ey tzet chi el yin,

sowalil chi xꞌael spichil,

catuꞌ chi aẍni,

tzꞌilto cꞌal pax yeocoj masantaꞌcꞌal yet chi kꞌejbꞌi eyoj.

8 Ta jaꞌ jun winaj ey tzet chi el yin catuꞌ chi tzubꞌli oc yin junojxa ánima,

jaꞌ jun ánima bꞌey chi tzubꞌli oc tuꞌ,

sowalil chi xꞌael spichil,

catuꞌ chi aẍni,

tzꞌilto cꞌal pax yeocoj masantaꞌcꞌal yet chi kꞌejbꞌi eyoj.

9 Ta jaꞌ jun winaj ey tzet chi el yin catuꞌ chi oc yibꞌan junoj che,

jaꞌ stzꞌuum noꞌ che tuꞌ,

tzꞌiltaj chi yun can el yu.

10 Yal cꞌal mactxequel chi mitxꞌon junoj tzetyetal bꞌey chi ey chotan jun winaj tol ey tzet chi el yin tuꞌ,

tzꞌilto cꞌal chi yun canoj masantaꞌcꞌal yet chi kꞌejbꞌi eyoj.

Yal cꞌal mactxequel chi iꞌontoj junoj wan tzetyetal tuꞌ,

sowalil chi xꞌael spichil catuꞌ chi aẍni pax oj,

tzꞌilto cꞌal pax chi yun canoj masantaꞌcꞌal yet chi kꞌejbꞌi eyoj.

11 Ta jaꞌ jun winaj ey tzet chi el yin tuꞌ,

ta cꞌam chi xꞌael skꞌabꞌ catuꞌ chi oc mitxꞌan yin junojxa mactxequel,

jaꞌ jun bꞌey chi oc mitxꞌan tuꞌ,

sowalil chi xꞌael spichil catuꞌ chi aẍni pax oj,

tzꞌiltaj tocꞌal pax yeocoj masantaꞌcꞌal yet chi kꞌejbꞌi eyoj.

12 Ta ey junoj txꞌotxꞌ txꞌotxꞌ xi bꞌey chi oc mitxꞌan jun winaj ey tzet chi el yin tuꞌ,

sowalil chi makꞌle poꞌo jun xi tuꞌ,

ma junoj teꞌ teꞌ tol mitxꞌkꞌabꞌe yeocoj,

jaꞌ jun teꞌ tuꞌ chi txꞌale eloj.

13 Ta chi waꞌxi scꞌul jun winaj tuꞌ xin,

cꞌamxa tzet chi el yin,

jaꞌ jun tuꞌ sowalil chi sbꞌis jujebꞌoj cꞌual yet chi sajbꞌanen sbꞌa;

chi lawi tuꞌ chi xꞌaon el spichil,

catuꞌ chi aẍni bꞌey chi aol junoj jaꞌ snukꞌ jaꞌ.

Queytuꞌ chi yun swaꞌxi can jun mactxequel tuꞌ.

14 Jaxa yet swaxajebꞌ cꞌual xin,

sowalil chi yiꞌtej cacꞌonoj noꞌ uch,

catuꞌ chi tit bꞌey sattaj jun Kꞌap Na bꞌey chin chaꞌle jin bꞌa je yetoj,

jaxa naj yakꞌomal xaambꞌal tuꞌ chi akꞌon tzꞌaꞌ noꞌ jin sattaj,

ẍi Dios.

15 Jun noꞌ chi yakꞌ jun yakꞌomal xaambꞌal tuꞌ yin xaambꞌalil yu yakꞌle tan spenail,

jal junojxa noꞌ xin,

chi akꞌle tzꞌaꞌoj.

Jaꞌ jun yakꞌomal xaambꞌal tuꞌ chi aon oc masanil wan tuꞌ jin sattaj,

yu sajbꞌanilal el jun winaj bꞌey jix ecꞌle jun syaꞌilal tuꞌ yin.

16 Ta ey junoj winaj tucꞌal chi el yinatil,

sowalil chi xꞌael spichil catuꞌ chi aẍni pax oj,

man tocꞌal pax sajbꞌanebꞌiloj chi yun canoj,

masantaꞌcꞌal yet chi kꞌejbꞌi eyoj.

17 Yal cꞌal tzet kꞌapil ma stzꞌuumal noꞌ noꞌ bꞌey chi oc yinatil junoj winaj,

sowalil chi txꞌale eloj,

man tocꞌal pax sajbꞌanebꞌiloj chi yun canoj masantaꞌcꞌal yet chi kꞌejbꞌi eyoj.

18 Ta ey junoj winaj chi wey yetoj yistil,

sowalil chi aẍni ebꞌ,

man tocꞌal pax sajbꞌanebꞌiloj chi yun can ebꞌ,

masantaꞌcꞌal yet chi kꞌejbꞌi eyoj.

19 Ta ey junoj ix ix eyoc yin scꞌual yilon sbꞌisbꞌal xꞌaaw,

tzꞌiltaj tocꞌal chi yun can el ix yin jujebꞌoj cꞌual.

Yal cꞌal mactxequel chi oc mitxꞌan yin ix,

man sajbꞌanebꞌiloj chi yun canoj,

masantaꞌcꞌal yet chi kꞌejbꞌi eyoj.

20 Yal cꞌal tzet weyubꞌeal bꞌey chi ey telan junoj ix ix yet eyoc ix yilon sbꞌisbꞌal xꞌaaw,

ma yal cꞌal tzet chemal bꞌey chi ey chotan ix,

jaꞌ wan tuꞌ man sajbꞌanebꞌiloj chi yun canoj.

21 Yal cꞌal mactxequel chi mitxꞌon bꞌey chi ey telan ix ix tuꞌ,

22 ma chi oc mitxꞌan yin junoj tzetyetal bꞌey chi ey chotan ix,

man sajbꞌanebꞌiloj chi yun canoj.

23 Sowalil chi xꞌael spichil,

catuꞌ chi aẍni,

man tocꞌal pax sajbꞌanebꞌiloj chi yun canoj,

masantaꞌcꞌal yet chi kꞌejbꞌi eyoj.

24 Ta ey junoj winaj chi wey yetoj junoj ix ix,

catuꞌ chi bꞌoncha yu tzet chi el yin ix ix tuꞌ,

man tocꞌal sajbꞌanebꞌiloj chi yun can el jun mactxequel tuꞌ yin jujebꞌoj cꞌual,

quey pax tuꞌ chi yun can sweyubꞌ bꞌey chi wey naj yetoj ix ix tuꞌ.

25 Ta ey junoj ix ix chi yil stzꞌilal yet man scꞌualoj yilon sbꞌisbꞌal xꞌaaw,

ma yel xacꞌal ecꞌal cꞌual chi yil sbꞌisbꞌal xꞌaaw ix ix tuꞌ,

man tocꞌal sajbꞌanebꞌiloj yet eyto cꞌal tzet chi el yin ix ix tuꞌ,

yutol eyto cꞌal oc yin yilon sbꞌisbꞌal xꞌaaw.

26 Yal cꞌal tzet weyubꞌeal bꞌey chi wey ix,

ma bꞌey chi ey chotan ix yet eyto cꞌal tzetyetal chi el yin ix ix tuꞌ,

man sajbꞌanebꞌiloj chi yun can wan tzetyetal tuꞌ,

jaxca cꞌal yet lalan yilon sbꞌisbꞌal xꞌaaw ix ix tuꞌ.

27 Yal cꞌal mactxequel chi mitxꞌon wan tzetyetal tuꞌ,

man tocꞌal pax sajbꞌanebꞌiloj chi yun canoj,

sowalil chi xꞌael spichil catuꞌ chi aẍni,

man tocꞌal pax sajbꞌanebꞌiloj chi yun canoj masantaꞌcꞌal yet chi kꞌejbꞌi eyoj.

28 Jaꞌ yet chi oc tucan yel wan tuꞌ yin ix,

catuꞌ chi sbꞌison jujebꞌ cꞌual ix,

chi lawi tuꞌ,

queytuꞌ chi yun swaꞌxi can el ix.

29 Jaxa yet swaxajebꞌ cꞌual xin,

catuꞌ chi yiꞌontej cacꞌonoj noꞌ paramuch ix yal cꞌal tzet tujanil,

catuꞌ chi yiꞌontej bꞌey junoj ebꞌ yakꞌomal xaambꞌal bꞌey sattaj jun Kꞌap Na bꞌey chi cu chaꞌle cu bꞌa je yetoj.

30 Jun noꞌ chi yakꞌ jun yakꞌomal xaambꞌal tuꞌ yin xaambꞌaloj yu yakꞌle tan spenail,

jal junxa noꞌ xin,

chi akꞌle tzꞌaꞌoj.

Queytuꞌ chi yute naj yakꞌomal xaambꞌal tuꞌ jin sattaj,

yu wan tzet chi el yin ix ix tuꞌ.

31 Queytuꞌ che yute je yiꞌon el je bꞌa jaex Israel jex tiꞌ xol tzet man sajbꞌanebꞌiloj,

yet watxꞌ man oj jex camoj,

yutol ey smey chi bꞌonchatoj snail bꞌey chin chaꞌle jin bꞌa je yetoj,

ẍi Jehová.

32 Jaꞌton wan chejbꞌanile tiꞌ yin ebꞌ winaj ey tzet chi el yin,

ma tucꞌal chi el yinatil yin,

yuxan man sajbꞌanebꞌiloj chi yun can el ebꞌ yu;

33 cꞌal yin ebꞌ ix ix eyoc yin yilon sbꞌisbꞌal xꞌaaw.

Jaꞌ wan chejbꞌanile tiꞌ,

sowalil chi sjije ebꞌ winaj cꞌal ebꞌ ix ix eyoc jun syaꞌilal tuꞌ yin.

Chi oc cꞌal pax jun chejbꞌanile tiꞌ yibꞌan junoj winaj chi wey yetoj junoj ix ix,

man pax sajbꞌanebꞌiloj chi yun canoj.