2 Jaꞌton wan jin chejbꞌanil tiꞌ oj sjije junoj ánima tol chi ecꞌ jun yaꞌbꞌil chi yij lepra yin.

Catuꞌ chi seyle il yu ebꞌ yakꞌomal xaambꞌal junoj mactxequel eyoc lepra yin.

3 Chi eltoj jun yakꞌomal xaambꞌal tuꞌ bꞌey stiꞌeltoj bꞌey bꞌulan ecꞌ ebꞌ tuꞌ.

Jaꞌ tituꞌ chi sey yilaꞌ ta jaꞌ jun yaꞌbꞌil tuꞌ lalanxa swaꞌxi.

4 Ta watxꞌ xa scꞌul jun yaꞌey tuꞌ,

catuꞌ chi yalon naj yakꞌomal xaambꞌal tuꞌ,

tol chi chejle yiꞌtej cacꞌonoj noꞌ tzꞌiquin yin yiquisal,

noꞌ watxꞌ smimanil chi yiꞌtej,

chi yiꞌon pax tej an cajin txꞌal,

teꞌ kꞌuteꞌ,

yetoj skꞌabꞌ teꞌ hisopo.

5 Chi lawi tuꞌ,

chi makꞌle cam junoj noꞌ tzꞌiquin tuꞌ yibꞌan stiꞌ junoj txꞌotxꞌ txꞌotxꞌ xi tol eeytoj jaꞌ yul,

jaꞌ tol chi bꞌet tit bꞌey junoj jaꞌ snukꞌ jaꞌ chi aoloj,

yet watxꞌ chi eytoj ẍiqꞌuil noꞌ xol jaꞌ jaꞌ tuꞌ.

6 Chi iꞌletej junxa noꞌ tzꞌiquin yin yiquisal,

yetoj teꞌ kꞌuteꞌ,

an cajin kꞌap,

cꞌal yetoj teꞌ hisopo,

catuꞌ chi lale eytoj xol ẍiqꞌuil noꞌ tzꞌiquin camnajxa tuꞌ,

chi cal-le yetoj jaꞌ.

7 Jujel chi tzicle oc yin jun mactxequel bꞌey jix ecꞌle jun yaꞌbꞌil tuꞌ yin,

catuꞌ chi yalon jun yakꞌomal xaambꞌal tuꞌ tol watxꞌ xa scꞌul jun ánima tuꞌ.

Jaxa noꞌ tzꞌiquin tol iquisto tuꞌ,

chi jajle cantoj noꞌ.

8 Jaꞌ jun mactxequel watxꞌ xa scꞌul tuꞌ,

sowalil chi xꞌael spichil,

catuꞌ chi aẍni,

chi sjujon el xil masanil smimanil yet watxꞌ,

watxꞌ xacꞌal chi yun canoj,

cꞌamto chi skeꞌ yoctoj bꞌey bꞌulan ecꞌ ebꞌ tuꞌ yin jujebꞌojxa cꞌual,

masantaꞌcꞌal chi lawi jujebꞌ cꞌual tuꞌ,

chi xa skeꞌ yoctoj xol yet animail bꞌey bꞌulan ecꞌ ebꞌ tuꞌ.

9 Jaxa yet sjuj cꞌual xin,

chi xꞌaon el spichil,

chi aẍni catuꞌ chi tzujle el xil sjolom masanil.

Queytuꞌ chi yun scan jun mactxequel tuꞌ yin watxꞌ.

10 Jaxa yet swaxajebꞌ cꞌual xin,

catuꞌ chi yiꞌontej cacꞌonoj noꞌ achꞌe meꞌ,

yetoj junoj noꞌ kꞌopo meꞌ jun abꞌil skꞌinal,

tol watxꞌ ojabꞌ cꞌal el smimanil noꞌ masanil.

Catuꞌ chi yiꞌontej nan sjuj libra jarina caw watxꞌ tol calbꞌil yetoj aceite olivo,

chi akꞌle yin ofrendail,

yetoj pax oxebꞌoj octavo aceite olivo.

11 Jaxa jun yakꞌomal xaambꞌal tuꞌ chi chejon oc linan jun ánima yetoj yofrenda bꞌey sattaj eltoj snail bꞌey chi cu chaꞌle cu bꞌa je yetoj.

12 Chi lawi tuꞌ,

catuꞌ chi iꞌletej junoj noꞌ achꞌe meꞌ yetoj aceite olivo,

chi sbꞌatxbꞌa ey wan tuꞌ jin sattaj jain Jehová jin tiꞌ,

jaꞌton wan xaambꞌal tuꞌ yu stoolanele el spenail.

13 Jaꞌ bꞌey chi cam cꞌaltaꞌ noꞌ chi akꞌle yin xaambꞌalil yu stooloj spenail,

cꞌal noꞌ xaambꞌal chi tzꞌaꞌ masanil,

jaꞌ tituꞌ chi makꞌle cam noꞌ achꞌe meꞌ tuꞌ,

yutol jaꞌ noꞌ chi akꞌle yu stoolanele el spenail;

yet naj yakꞌomal xaambꞌal tuꞌ chi yun can oc noꞌ,

jaꞌton noꞌ chi akꞌle yu stooloj spenail tet Dios,

tol caw miman yeloc apnoj noꞌ.

14 Chi lawi tuꞌ,

chi iꞌletej niꞌoj ẍiqꞌuil noꞌ tuꞌ yu naj yakꞌomal xaambꞌal yet stooloj spenail tuꞌ,

catuꞌ chi sbꞌonon oc naj yin jun mactxequel lalan yil-le tuꞌ,

jaꞌ yin xaxoal xiquin bꞌey swatxꞌ kꞌabꞌ,

cꞌal yin xutxal yiximal bꞌey swatxꞌ kꞌabꞌ,

cꞌal yin xutxal yiximal yajan bꞌey swatxꞌ kꞌabꞌ.

15 Catuꞌ chi yiꞌon pax tej niꞌoj aceite olivo jun yakꞌomal xaambꞌal tuꞌ,

chi secon ey yul samil sqꞌuexan kꞌabꞌ,

16 catuꞌ chi slaon eytoj jun yiximal swatxꞌ kꞌabꞌ xol aceite olivo tuꞌ.

Jaꞌ yetoj jun skꞌabꞌ chi slaeytoj xol aceite olivo tuꞌ,

jaꞌ yetoj chi yakꞌ txion ey aceite tuꞌ jujeloj jin sattaj jain Jehová jin tiꞌ,

ẍi Dios.

17 Jaꞌ aceite olivo chi cancan yin skꞌabꞌ jun yakꞌomal xaambꞌal tuꞌ,

chi sjooc yin jun ánima lalan yil-le tuꞌ,

jacꞌalaꞌ chi oc pax yin xaxoal xiquin bꞌey swatxꞌ,

cꞌal yin xutxal yiximal swatxꞌ skꞌabꞌ,

cꞌal yin xutxal yiximal yajan bꞌey swatxꞌ,

jaꞌton bꞌey eyxa oc ẍiqꞌuil noꞌ xaambꞌal tuꞌ yu stooloj spenail.

18 Jaxa yet chi lawi tuꞌ,

chi yaon atoj niꞌojxa aceite olivo naj yakꞌomal xaambꞌal yibꞌan sjolom jun ánima lalan yil-le tuꞌ.

Queytuꞌ chi yun swaꞌxi can yili jun ánima tuꞌ jin sattaj,

ẍi Jehová.

19 Chi lawi tuꞌ,

chi akꞌle pax noꞌ xaambꞌal yu jun yakꞌomal xaambꞌal tuꞌ yu yakꞌle tan spenail,

queytuꞌ chi yun stancan el spenail junoj mactxequel lalan yil-le tuꞌ.

Chi lawi tuꞌ xin,

chi makꞌle cam noꞌ meꞌ chi akꞌle tzꞌaꞌ yin xaambꞌalil masanil;

20 junne chi yun yale ey yibꞌan jun yet xaambꞌal tuꞌ yetoj ofrenda chi akꞌle yin tzet chi loꞌlei.

Queytuꞌ chi yun stancan el spenail jun ánima tuꞌ jin sattaj,

jaxca tuꞌ chi yun swaꞌxi can eloj.

21 Ta tol mebꞌa jun ánima bꞌey jix ecꞌle jun syaꞌilal tuꞌ yin,

ta cꞌam stumin yet chi smanon ecꞌaloj tzetyetal chi yakꞌ yin xaambꞌaloj,

asanne ojabꞌ junoj noꞌ achꞌe meꞌ chi yakꞌa,

catuꞌ chi sbꞌatxbꞌan ey jin sattaj bꞌey yet xaambꞌal yu stooloj spenail,

chi yiꞌontej canebꞌoj libra ixim jarina calbꞌil yetoj aceite olivo,

chi yaon eytoj oxebꞌoj octavo aceite olivo.

22 Chi yiꞌon pax tej cacꞌonoj noꞌ jobꞌbꞌeal uch yal cꞌal tzet tujanil,

jatacꞌalaꞌ jantaj chi skeꞌ smancha yu.

Jun noꞌ chi akꞌle yin xaambꞌalil yu yakꞌle lawoj spenail,

jal junxa noꞌ xin,

chi akꞌle tzꞌaꞌ noꞌ yin xaambꞌalil.

23 Jaꞌ wan tuꞌ,

yet swaxajebꞌ cꞌual chi yun yiꞌontoj jun mactxequel tuꞌ tet junoj ebꞌ yakꞌomal xaambꞌal yu sajbꞌanele can el jun mactxequel tuꞌ.

Jaꞌ wan tiꞌ chi akꞌle jin sattaj,

jain Jehová jin tiꞌ,

bꞌey yul jun Kꞌap Na bꞌey chi cu chaꞌle cu bꞌa je yetoj.

24 Chi lawi tuꞌ xin,

chi iꞌletej noꞌ meꞌ yetoj aceite olivo yu jun yakꞌomal xaambꞌal tuꞌ,

catuꞌ chi sbꞌatxbꞌan ey jin sattaj yin xaambꞌalil yu stoolanele el spenail.

25 Chi makꞌle cam noꞌ achꞌe meꞌ tuꞌ yu naj yakꞌomal xaambꞌal tuꞌ,

chi yiꞌon a niꞌoj ẍiqꞌuil noꞌ xaambꞌal tuꞌ,

catuꞌ chi sbꞌonon oc yin xaxoal xiquin jun ánima tuꞌ bꞌey swatxꞌ yin xutxal yiximal swatxꞌ kꞌabꞌ,

cꞌal yin xutxal yiximal yajan bꞌey swatxꞌ,

asanne yin swatxꞌ chi oqui.

26 Chi lawi tuꞌ chi yaon ey niꞌoj aceite olivo yul samil sqꞌuexan kꞌabꞌ.

27 Jaꞌ yetoj sbꞌabꞌel yiximal swatxꞌ kꞌabꞌ chi yakꞌ txion ey jujeloj jun aceite olivo tuꞌ jin sattaj.

28 Catuꞌ chi ale pax can oc aceite olivo yin jun ánima chi waꞌxi can scꞌul tuꞌ,

chi ale oc yin xiquin bꞌey swatxꞌ,

cꞌal yin xutxal yiximal swatxꞌ kꞌabꞌ,

cꞌal yin xutxal yiximal yajan;

jaꞌton bꞌey xax ale oc ẍiqꞌuil noꞌ xaambꞌal tuꞌ yin.

29 Jal niꞌojxa aceite olivo chi cancanoj,

chi ale can atoj yibꞌan sjolom jun ánima tuꞌ yu jun yakꞌomal xaambꞌal tuꞌ,

yet chi tancan spenail jun ánima tuꞌ jin sattaj,

ẍi Jehová.

30 Chi lawi tuꞌ xin,

chi makꞌle cam noꞌ paramuch tuꞌ scacꞌonal yu naj yakꞌomal xaambꞌal tuꞌ.

31 Jun noꞌ paramuch tuꞌ chi akꞌle yin xaambꞌal yu yakꞌle tan spenail,

jal junxa noꞌ xin,

chi akꞌle tzꞌaꞌ noꞌ yetoj cꞌal ixim jarina chi akꞌle yin ofrendail.

Queytuꞌ chi yun stancan el spenail jun ánima chi iꞌletej jin sattaj tuꞌ.

Jaxca tuꞌ chi yun slawi can spenail jun ánima tuꞌ,

ẍi Jehová tet naj Moisés.

32 Jaꞌton jun chejbꞌanile tiꞌ tet ebꞌ chi ecꞌ jun yaꞌbꞌil chi yij lepra* yin,

cꞌal tet ebꞌ cꞌam chi tzaji yakꞌon xaambꞌal jaxca yalon sleyalil,

ẍi Jehová.

33 Jix yalon pax Jehová tet naj Moisés,

cꞌal tet naj Aarón jaxca tiꞌ:

34 Jaꞌ yet oj jex apnoj oc bꞌey txꞌotxꞌ Canaán,

jaꞌton txꞌotxꞌ oj wakꞌ ey jex,

ey bꞌey oj watoj junoj tzetyetal kꞌuxtaj yili,

tol oj ecꞌ lebꞌebꞌoj bꞌey yul-laj je na,

35 jaꞌ mactxequel ey yet jun na tuꞌ sowalil chi tit scꞌatan ebꞌ yakꞌomal xaambꞌal,

catuꞌ chi yalon ebꞌ jaxca tiꞌ:

Ey wal wan kꞌuxtaj yili lalan yecꞌ lebꞌebꞌoj bꞌey yul jin na an,

ẍi ojabꞌ ebꞌ.

36 Jaꞌ yet cꞌamto chi octoj jun yakꞌomal xaambꞌal tuꞌ yul jun na tuꞌ,

sowalil chi yalaꞌ tol chi iꞌle eltej masanil tzetyetal eyoctoj yul jun na tuꞌ,

yet watxꞌ cꞌam chi etex el wan tzetyetal tuꞌ,

catuꞌ chi octoj naj yilon jun chi ecꞌ lebꞌebꞌoj yul jun na tuꞌ.

Queytuꞌ chi yun swaꞌxi can el yul jun na tuꞌ yetoj cꞌal masanil tzetyetal eyoctoj yul na tuꞌ.

37 Ta jaꞌ yet chi yilon octoj naj yakꞌomal xaambꞌal yul jun na tuꞌ,

tol lebꞌquiltaj xacꞌal yili ma cajin xacꞌal yili,

tol yelcꞌulal chi too yul-laj yichlaj na tuꞌ,

38 jaxa yet chi eltej naj yul na tuꞌ,

chi yaloni tol chi majchele can jun na tuꞌ yin jujebꞌoj cꞌual.

39 Jaꞌ yet chi lawi jujebꞌoj cꞌual,

catuꞌ chi too jun yakꞌomal xaambꞌal tuꞌ yilon junelxa.

Ta tol jacꞌalaꞌ yecꞌ lebꞌebꞌoj jun kꞌuxtaj tuꞌ satlaj yichlaj na tuꞌ xin,

40 sowalil chi yal jun yakꞌomal xaambꞌal tuꞌ,

tol chi liple eltej masanil chꞌen chꞌen bꞌey eyxa oc jun kꞌuxtaj tuꞌ yin,

catuꞌ chi too kꞌojle can bꞌey junoj txꞌotxꞌ txꞌotxꞌ tol cꞌamxa yopiso bꞌey stiꞌel conobꞌ.

41 Catuꞌ chi yaloni tol chi josle el masanil satlaj yichlaj na tuꞌ,

jaꞌ masanil spojojal chi el yul na tuꞌ,

chi too kꞌojle can sat junoj txꞌotxꞌ txꞌotxꞌ tol cꞌamxa yopiso bꞌey stiꞌel conobꞌ.

42 Txꞌojxa chꞌen chꞌen chi ale can octoj sqꞌuexeloj chꞌen chi iꞌle eltej tuꞌ,

txꞌojxa txꞌotxꞌ txꞌotxꞌ chi oc pax yinlaj sat xaan tuꞌ.

43 Ta tol chi txeclo pax a wan lebꞌquiltaj yoc tuꞌ junelxa,

yet xax iꞌle eltej chꞌen chꞌen tuꞌ,

cꞌal yet xax josle el satlaj yichlaj na tuꞌ yet xax ale oc sqꞌuexel tuꞌ,

44 chi too al-le pax tet naj yakꞌomal xaambꞌal tuꞌ junelxa.

Ta jacꞌalaꞌ yecꞌ lebꞌebꞌoj junelxa,

ta jaxca tuꞌ,

manxa watxꞌoj chi yun can jun na tuꞌ.

45 Yuxan jaꞌ jun na tuꞌ,

sowalil chi uchle eyoj;

masanil teꞌ teꞌ,

chꞌen chꞌen,

cꞌal txꞌotxꞌ txꞌotxꞌ eyoc yin jun na tuꞌ,

chi too kꞌojle can sat junoj txꞌotxꞌ tol cꞌamxa yopiso bꞌey stiꞌel conobꞌ.

46 Yal cꞌal mactxequel chi octoj yul na tuꞌ yin jujebꞌ cꞌual yet xax yal jun yakꞌomal xaambꞌal tuꞌ tol chi majchele canoj,

jaꞌ jun mactxequel tuꞌ man watxꞌoj chi yun canoj,

masantaꞌcꞌal yet chi kꞌejbꞌi can eyoj.

47 Yal cꞌal mactxequel chi lowi,

ma chi wey yul jun na tuꞌ,

sowalil chi xꞌael spichil,

queytuꞌ chi yun waꞌxi can eloj.

48 Ta jaꞌ yet chi octoj jun yakꞌomal xaambꞌal yilon yul jun na tuꞌ,

catuꞌ chi yiloni tol jaꞌ wan lebꞌquiltaj tuꞌ cꞌam chi bꞌey stoo yet tax cꞌal jix waꞌnele can yul jun na tuꞌ,

jaxa yaloni,

tol watxꞌ xa jun na tuꞌ.

49 Jaꞌ yet chi waꞌxi el jun na tuꞌ junelxa,

chi iꞌletej cacꞌonoj noꞌ tzꞌiquin yetoj teꞌ kꞌuteꞌ,

yetoj an cajin txꞌal cꞌal skꞌabꞌ teꞌ hisopo.

50 Catuꞌ chi smakꞌon cam junoj noꞌ kocꞌ tzꞌiquin naj yakꞌomal xaambꞌal tuꞌ yibꞌan junoj txꞌotxꞌ txꞌotxꞌ xi tol eeytoj jaꞌ jaꞌ yul,

jaꞌ tol chi iꞌletej bꞌey chi aol junoj jaꞌ snukꞌ jaꞌ.

51 Chi lawi tuꞌ xin,

chi iꞌletej teꞌ kꞌuteꞌ tuꞌ cꞌal teꞌ hisopo yetoj an cajin txꞌal yetoj noꞌ tzꞌiquin tol iquisto tuꞌ,

catuꞌ chi slaon eytoj xol ẍiqꞌuil noꞌ camnajxa tuꞌ,

calbꞌilxa yetoj jaꞌ eey yul txꞌotxꞌ txꞌotxꞌ xi tuꞌ.

Jujel chi xioc naj yin jun na tuꞌ.

52 Queytuꞌ chi yun swaꞌxi can el jun na tuꞌ yet chi ale oc ẍiqꞌuil noꞌ tzꞌiquin tuꞌ yin,

cꞌal yetoj jaꞌ jaꞌ chi iꞌletej bꞌey chi aol jaꞌ snukꞌ jaꞌ,

yetoj cꞌal pax noꞌ tzꞌiquin iquisto,

yetoj teꞌ kꞌuteꞌ,

teꞌ hisopo cꞌal yetoj an cajin txꞌal.

53 Chi lawi tuꞌ xin,

chi jajle cantoj jun noꞌ iquis tzꞌiquin tuꞌ bꞌey stiꞌel conobꞌ.

Queytuꞌ chi yun sjijele sleyalil yin junoj na,

jaxca tuꞌ chi yun swaꞌxi can eloj,

ẍi Jehová.

54 Jaꞌton wan chejbꞌanile tiꞌ yibꞌan jun yaꞌbꞌil chi yij lepra,

yin tol chi mala cu mimanil yu,

55 ma tol yaax yaꞌbꞌil,

ma yin lebꞌquiltaj,

ma sajin yili,

56 cꞌal wan kꞌuxtaj chi oc yin an pichile,

cꞌal yinlaj na tuꞌ.

57 Queytuꞌ chi yun snaꞌcha eloj tzetyetal tol man watxꞌoj,

cꞌal tzetyetal tol watxꞌ.

Jaꞌ titiꞌ chi lawi can wan chejbꞌanile tiꞌ yin wan tzettaj yetal tiꞌ.