2 Ta ey junoj mactxequel chi oc spenail ey jin,

yin yetne junoj yet animail yin junoj tzetyetal chi cancan yin abꞌenal tet,

ma chi yelkꞌane junoj tzetyetal,

ma xin,

tucꞌal chi stoꞌecꞌ junoj tzetyetal tet junojxa;

3 yetoj pax oj,

ta chi sicꞌ junoj tzetyetal catuꞌ chi yakꞌon stiꞌ tol cꞌam tzet chi yilaꞌ,

ma yin junojxa lekꞌtiꞌal chi yun ebꞌ ánima tuꞌ,

spenail chi yun jun mactxequel tuꞌ.

4-5 Jaꞌ yet chi ilchatej junoj mactxequel yet chi yakꞌon stiꞌ yin lekꞌtiꞌal yin wan tiꞌ,

sowalil chi yakꞌ meltzo stool tet jun mac ey yet tuꞌ,

catuꞌ chi yakꞌon pax junojxa yet sjoꞌ tujan stool tet jun ey yet jun tzetyetal tuꞌ.

Chi yakꞌon pax junoj xaambꞌal ey jin yu spenail chi oc tuꞌ.

6 Jaꞌ jun xaambꞌal chi yakꞌ tuꞌ,

jaꞌ junoj noꞌ icham meꞌ tol caw watxꞌ cꞌal el masanil.

Jaꞌ tet ebꞌ yakꞌomal xaambꞌal tuꞌ chi yiꞌtej,

jaxa naj chi naꞌon eloj jantaj chi eloc stool jun meꞌ tuꞌ.

7 Yuxan jaꞌ naj yakꞌomal xaambꞌal tuꞌ chi akꞌon jun xaambꞌal tuꞌ jin sattaj yu spenail jun ánima tuꞌ,

yet chi wakꞌon mimancꞌulal yibꞌan spenail tuꞌ.

8 Jix yalon Jehová tet naj Moisés jaxca tiꞌ:

9 Al tet Aarón yetoj cꞌal tet ebꞌ scꞌaal yin tzet chi yun yakꞌle xaambꞌal tol chi akꞌle tzꞌaꞌoj.

Jaꞌ noꞌ noꞌ chi akꞌle tzꞌaꞌ masanil yin xaambꞌal,

sowalil chi cancan noꞌ yibꞌan stzakꞌakꞌ yet akꞌbꞌalil yet watxꞌ chi tzꞌaꞌtoj noꞌ masanil.

10 Jaxa yet junxa skꞌinibꞌalil,

sowalil chi yaoc spichil ebꞌ yakꞌomal xaambꞌal chi skꞌan yin yopiso,

cꞌal an cꞌotxan kꞌap yet yul wexe tol lino cꞌal eloj;

chi lawi tuꞌ,

catuꞌ chi syambꞌan a staanil noꞌ noꞌ jix akꞌle tzꞌaꞌ yibꞌan jun yet xaambꞌal tuꞌ,

catuꞌ chi yaon ey bꞌey spacꞌulal tuꞌ.

11 Chi lawi tuꞌ,

chi sqꞌuexon el spichil ebꞌ tuꞌ,

catuꞌ chi too yakꞌon can staanil noꞌ xaambꞌal tuꞌ bꞌey jun lugar sajbꞌanebꞌil bꞌey stiꞌlaj eltoj bꞌey bꞌulan jex ecꞌ tuꞌ.

12 Jaꞌ jun kꞌakꞌ eyoc yibꞌan jun yet xaambꞌal tuꞌ,

cꞌam chi skeꞌ stan kꞌakꞌ yin,

sowalil chi ale oc teꞌ siꞌ yu ebꞌ yakꞌomal xaambꞌal tuꞌ junjun skꞌinibꞌal;

jaꞌton yibꞌan kꞌakꞌ tuꞌ chi ale atoj noꞌ xaambꞌal tuꞌ tzꞌaꞌoj.

Jatuꞌ chi tzꞌaꞌ pax noꞌ ẍepuꞌal xaambꞌal yet watxꞌcꞌulal.

13 Iquis ojabꞌ cꞌal jun kꞌakꞌ tuꞌ yin,

cꞌam ojabꞌ chi tan eyoj.

14 Jaꞌ wanxa chejbꞌanile chi al-le tiꞌ,

jaꞌton yin tzet chi yun yakꞌle wan saꞌbꞌeal yin tzet chi loꞌlei:

Jaꞌ ebꞌ yakꞌomal xaambꞌal chi akꞌon ey jin,

bꞌey sattaj jun yet xaambꞌal tuꞌ,

15 catuꞌ chi yiꞌontej junoj bꞌetxan ixim jarina yetoj aceite olivo ebꞌ,

junne cꞌal chi yun yetoj masanil teꞌ incienso yetoj wan saꞌbꞌeal tuꞌ,

catuꞌ chi nusle tzꞌaꞌ niꞌoj bꞌey chi tzꞌaꞌ cꞌaltaꞌ xaambꞌal,

yet chi txeclo eloj tol jaꞌ masanil saꞌbꞌeal tuꞌ wet chi yun yakꞌlei,

caw watxꞌ yoc sabꞌ chi wabꞌe.

16 Jantaj tocꞌal wan saꞌbꞌeal tuꞌ chi cancanoj,

chi waꞌnele yin cꞌam yich chi ale eyoj,

chi skeꞌ chi sloꞌ naj Aarón yetoj ebꞌ scꞌaal bꞌey jun lugar tol sajbꞌanebꞌil,

jaꞌton bꞌey sattaj eltoj jun na bꞌey chin chaꞌle jin bꞌa je yetoj.

17 Jaꞌ yin saꞌbꞌeal tol wet yeocoj,

tol chi akꞌle tzꞌaꞌ niꞌoj bꞌey chi tzꞌaꞌ cꞌaltaꞌ xaambꞌal,

tol cꞌam yich chi eyi,

yet chi txeclo eloj tol jaꞌ masanil saꞌbꞌeal tuꞌ wet chi yun yakꞌlei,

cꞌal xaambꞌal chi akꞌle stooloj spenail,

caw watxꞌ yoc sabꞌ chi wabꞌe.

18 Jaꞌ wan tuꞌ oj swaꞌne cꞌal ebꞌ.

Jaꞌ wan saꞌbꞌeal tuꞌ wet cꞌal chi yun yakꞌlei,

catuꞌ chi akꞌle tzꞌaꞌoj,

chi skeꞌ pax sloꞌon masanil ebꞌ naj yicꞌaal Aarón.

Yal cꞌal tzetyetal chi oc tenna yin wan saꞌbꞌeal tuꞌ,

wet cꞌal chi yun can ocoj,

ẍi Dios tet Moisés.

19 Jix yalon pax Dios tet naj Moisés jaxca tiꞌ:

20 Jaꞌ naj Aarón yetoj cꞌal ebꞌ scꞌaal,

sowalil chi yakꞌ junoj saꞌbꞌeal ebꞌ ey jin,

yet chi jul scꞌual sicꞌle oc ebꞌ yin yopiso;

chi yiꞌtej canebꞌoj libra ixim jarina ebꞌ caw wal watxꞌ,

jaꞌton wan saꞌbꞌeal chi akꞌle yin tzet chi loꞌlei.

Nan chi yakꞌ ebꞌ yet skꞌinibꞌal,

jaxa nanxa xin,

chi yakꞌ ebꞌ yet yeycꞌualil.

21 Jaꞌ yul junoj ẍaltin chi akꞌle ta jun saꞌbꞌeal tuꞌ,

watxꞌ chi yun sta xol aceite olivo,

chi lawi tuꞌ,

chi poꞌole ecꞌoj,

catuꞌ chi akꞌle yin saꞌbꞌeal ey jin,

caw watxꞌ yoc sabꞌ chi wabꞌe.

22 Queytuꞌ chi yute swaꞌnen cꞌal junjun tujan ebꞌ yicꞌaal naj Aarón,

yet chi oc ebꞌ sqꞌuexeloj smam yin yopiso;

yuxan wet cꞌal chi yun yakꞌle wan xaambꞌal tuꞌ,

masanil chi akꞌle tzꞌaꞌ jin sattaj.

23 Masanil saꞌbꞌeal ebꞌ naj yakꞌomal xaambꞌal yin tzet chi loꞌlei,

sowalil chi akꞌle tzꞌaꞌ masanil.

Cꞌam junoj mactxequel chi skeꞌ sloꞌoni,

ẍi Dios tet naj Moisés.

24 Jix yalon pax Dios tet naj Moisés jaxca tiꞌ:

25 Al masanil wan chejbꞌanile tiꞌ tet naj Aarón,

yetoj cꞌal tet ebꞌ scꞌaal,

yu tzet chi yun yakꞌle tzꞌaꞌ xaambꞌal yu yoc mimancꞌulal yin spenail:

Jaꞌ junoj noꞌ xaambꞌal chi akꞌle yu stooloj spenail tuꞌ,

sowalil tol jaꞌ jin sattaj chi makꞌle cam noꞌ bꞌey jun lugar bꞌey chi makꞌle cꞌaltaꞌ cam noꞌ yet chi akꞌle tzꞌaꞌoj;

jaꞌ jun xaambꞌal tuꞌ wet chi yun yakꞌlei.

26 Jaꞌ naj yakꞌomal xaambꞌal chi akꞌon junoj xaambꞌal tuꞌ,

yu yoc mimancꞌulal yin spenail,

chi skeꞌ ẍiꞌon bꞌey jun lugar tol sajbꞌanebꞌil,

jaꞌton bꞌey sattaj eltoj jun kꞌap na bꞌey chi cu chaꞌle cu bꞌa je yetoj.

27 Yal cꞌal tzetyetal chi oc tenna yin noꞌ chiꞌbꞌe tuꞌ,

wet cꞌal chi yun can ocoj.

Ta chi oc txina ẍiqꞌuil noꞌ yin spichil ebꞌ,

sowalil chi txꞌale el an bꞌey junoj lugar tol wet yeocoj.

28 Jacꞌalaꞌ txꞌotxꞌ xi bꞌey chi akꞌle ta noꞌ xaambꞌal tuꞌ,

sowalil chi makꞌle can poꞌo txꞌotxꞌ,

ta chꞌen xi bꞌey chi akꞌle ta noꞌ xin,

asan tol chi nijle el stzꞌilal chꞌen,

catuꞌ chi txꞌale can el chꞌen yetoj jaꞌ.

29 Jaꞌ jun xaambꞌal tuꞌ wet chi yun yakꞌlei.

Asanne ebꞌ naj eyecꞌ yetoj ebꞌ yul sna ebꞌ yakꞌomal xaambꞌal tuꞌ chi skeꞌ ẍiꞌon ebꞌ yutol wet jun xaambꞌal tuꞌ.

30 Jal pax junoj noꞌ chi iꞌle el ẍiqꞌuil bꞌey yul jun kꞌap na bꞌey jun lugar tol asan jin ey wet jin txꞌojli,

bꞌey chi oc mimancꞌulal yibꞌan spenail,

cꞌam chi skeꞌ ẍiꞌle noꞌ.

Jaꞌ jun xaambꞌal tuꞌ sowalil tol chi akꞌle tzꞌaꞌ masanil.