Sleyalil Chi Yun Yakꞌle Wan Xaambꞌal Yet Spenail
7
Masanil wan xaambꞌal chi akꞌle ey jin yu stooloj spenail caw miman yeloc apnoj ebꞌ.
Jaꞌton xolilal tzet chi yun yakꞌle xaambꞌal tiꞌ:
2 Jaꞌ junoj noꞌ chi akꞌle yu stoolanele el spenail,
sowalil chi makꞌle cam noꞌ bꞌey chi cam cꞌaltaꞌ noꞌ noꞌ,
chi akꞌle tzꞌaꞌoj,
jaxa ẍiqꞌuil noꞌ chi txile oc yin scanpaqꞌuil jun yet xaambꞌal tuꞌ.
3 Chi akꞌle cꞌal masanil ẍepuꞌal noꞌ tuꞌ,
noꞌ chi el yin sne noꞌ,
chi lawi tuꞌ,
chi iꞌle el masanil ẍepuꞌal yul scꞌul noꞌ,
4 cꞌal caabꞌ yubꞌal noꞌ,
cꞌal masanil ẍepuꞌal eyoc yin yubꞌal noꞌ tuꞌ,
cꞌal yinlaj sbꞌajil yichin noꞌ,
yetoj niꞌoj yin skꞌej noꞌ.
5 Jaxa junoj ebꞌ yakꞌomal xaambꞌal tuꞌ chi akꞌon tzꞌaꞌ yibꞌan jun yet xaambꞌal tuꞌ,
tol chi akꞌle tzꞌaꞌ jin sattaj yu stooloj spenail.
6 Jaꞌ jun xaambꞌal tuꞌ wet chi yun yakꞌlei.
Asanne ebꞌ naj eyecꞌ yetoj ebꞌ yul sna ebꞌ yakꞌomal xaambꞌal tuꞌ chi skeꞌ ẍiꞌon ebꞌ yutol wet yeoc jun xaambꞌal tuꞌ.
7 Jaꞌ tzet chi yun yakꞌle xaambꞌal yu stooloj spenail,
laan cꞌal xolilal chi yun yakꞌle xaambꞌal yet chi oc mimancꞌulal yin spenail.
Jaꞌ ẍiꞌbꞌeal noꞌ xaambꞌal tuꞌ yet naj yakꞌomal xaambꞌal tuꞌ chi yun can ocoj.
8 Jaꞌ yet chi tzꞌaꞌ masanil noꞌ xaambꞌal tuꞌ,
jaꞌ stzꞌuumal jun noꞌ tuꞌ yet naj yakꞌomal xaambꞌal chi yun can ocoj.
9 Quey pax tuꞌ,
masanil saꞌbꞌeal chi akꞌle ta yul jorna,
ma yul-laj mimej xi,
ma yul ẍaltin,
yet cꞌal naj yakꞌomal xaambꞌal tuꞌ,
chi yun can ocoj.
10 Quey pax tuꞌ chi yun yakꞌle masanil saꞌbꞌeal chi akꞌle yin tzet chi loꞌlei,
jaxca ixim jarina tol calbꞌil yetoj aceite olivo,
ma tol kꞌanbꞌinaj.
Jaꞌ wan tuꞌ yet cꞌal ebꞌ scꞌaal naj Aarón,
laan cꞌal chi yun spoꞌon ecꞌ ebꞌ yin.
Chejbꞌanile Tzet Chi Yun Yakꞌle Xaambꞌal Yet Watxꞌcꞌulal
11 Jaꞌton yin xolilal jin chejbꞌanile tiꞌ,
yu tzet chi yun yakꞌle xaambꞌal yet watxꞌcꞌulal ey jin an:
12 Ta jaꞌ junoj noꞌ xaambꞌal tuꞌ chi akꞌle yu yal-le yu diosalil ey jin,
chi yakꞌ cꞌal pax ixim pan ma ixim wocꞌox pan cꞌam yich eeyoj,
asan tol calbꞌil yetoj aceite olivo.
13 Jaꞌ yetoj wan xaambꞌal tuꞌ,
chi akꞌle cꞌal pax ixim pan eey yich.
14 Chi iꞌle el junoj ixim pan yin junjun tujan,
yu saꞌbꞌeal ey jin an,
jaꞌ jun pan tuꞌ yet naj yakꞌomal xaambꞌal chi txion oc ẍiqꞌuil noꞌ yin yet xaambꞌal tuꞌ.
15 Jaꞌ noꞌ noꞌ chi akꞌle yin xaambꞌal yet watxꞌcꞌulal yu yal-le yu diosalil ey jin an,
sowalil chi chiꞌle eytoj noꞌ yet jun cꞌu tuꞌ,
cꞌamxa chi skeꞌ scꞌubꞌale a niꞌojxa noꞌ yet junxa cꞌual.
16 Ta jaꞌ jun saꞌbꞌeal tuꞌ chi yakꞌ junoj mactxequel tol yin wal snaꞌbꞌal chi tita,
ma yu junoj bꞌey yakꞌnaj can stiꞌ yakꞌoni,
jaꞌ wan chiꞌbꞌe tuꞌ chi chiꞌle yet jun cꞌual tuꞌ,
ta eyto noꞌ cꞌam chi lawi,
chi skeꞌ ẍiꞌle noꞌ yet yecal.
17 Ta eyto cꞌal noꞌ yet scaabꞌial xin,
jaꞌ wan tuꞌ sowalil chi akꞌle tzꞌaꞌ masanil.
18 Ta ey mactxequel chi chiꞌon noꞌ xaambꞌal tuꞌ yet scaabꞌial,
jaꞌ jun xaambꞌal tuꞌ cꞌamxa chin chaꞌ,
yutol cꞌamxa chi oc yopiso wu.
Yuxan jaꞌ mactxequel chi chiꞌon jun xaambꞌal jaxca tuꞌ,
chi oc can spenail yibꞌan,
yutol jaꞌ wan chiꞌbꞌe tuꞌ xax etex eloj.
19 Ta ey noꞌ chiꞌbꞌe yet xaambꞌal tiꞌ chi oc tenna yin junoj tzetyetal man sajbꞌanebꞌiloj,
cꞌamxa chi skeꞌ ẍiꞌlei,
sowalil chi akꞌle tzꞌaꞌoj.
Jal wanxa noꞌ chiꞌbꞌe chi skeꞌ ẍiꞌon ebꞌ tol chi sajbꞌane sbꞌa jaxca yalon jin chejbꞌanil,
ta cꞌam chi sajbꞌane sbꞌa ebꞌ,
cꞌam chi skeꞌ ẍiꞌon wan xaambꞌal tuꞌ ebꞌ.
20 Jaꞌ junoj ánima tol man sajbꞌanebꞌiloj,
catuꞌ chi ẍiꞌon ẍiꞌbꞌeal jun xaambꞌal yet watxꞌcꞌulal,
jaꞌ jun mactxequel tuꞌ,
sowalil chi ujtele el xol conobꞌ.
21 Jaꞌ junoj ánima chi mitxꞌon junoj tzetyetal tol man sajbꞌanebꞌiloj,
jaxca yalon jin chejbꞌanil,
caxcꞌal yin ánima chi tita,
ma chi oc mitxꞌan yin junoj noꞌ man sajbꞌanebꞌiloj,
ta chi ẍiꞌ ẍiꞌbꞌeal jun xaambꞌal tuꞌ,
sowalil chi ujtele el xol conobꞌ,
ẍi Dios tet naj Moisés.
Chejbꞌanile Yin Ẍepuꞌal Cꞌal Yin Ẍiqꞌuil Noꞌ
22 Jix yalon Jehová tet naj Moisés jaxca tiꞌ:
23 Al tet ebꞌ ja wet conobꞌ Israel wan jin chejbꞌanil tiꞌ:
Cꞌam chi skeꞌ ẍiꞌon ẍepuꞌal noꞌ wacax ebꞌ,
cꞌal noꞌ meꞌ,
yetoj noꞌ chiw.
24 Yetoj pax ẍepuꞌal noꞌ tucꞌal chi cameloj,
ma noꞌ chi makꞌle cam yu noꞌ xol-laj teꞌal noꞌ,
cꞌam chi skeꞌ ẍiꞌon ebꞌ,
asan chi il-le bꞌey chi skeꞌ skꞌanle wan ẍepuꞌal noꞌ tuꞌ.
25 Yal cꞌal mactxequel chi chiꞌon ẍepuꞌal noꞌ tol chi akꞌle tzꞌaꞌ yin saꞌbꞌeal ey jin,
jaꞌ jun mactxequel tuꞌ,
chi ujtele el xol conobꞌ.
26 Yal cꞌal bꞌeytuꞌ ey jex ecꞌoj,
cꞌam chi skeꞌ che chiꞌ ẍiqꞌuil noꞌ tuꞌ,
cꞌal noꞌ tzꞌiquin.
27 Jaꞌ junoj ánima chi chiꞌon ẍiqꞌuil noꞌ noꞌ tuꞌ,
jaꞌ jun tuꞌ sowalil chi ujtele el xol conobꞌ,
ẍi Dios tet Moisés.
Jaꞌ Tzet Chi Akꞌle Tet Ebꞌ Yakꞌomal Xaambꞌal
28 Jix yalon Jehová tet naj Moisés jaxca tiꞌ:
29 Al wanxa jin chejbꞌanil tiꞌ tet ebꞌ ja wet conobꞌ Israel:
Jaꞌ junoj mactxequel chi akꞌon junoj xaambꞌal yet watxꞌcꞌulal ey jin an,
sowalil chi yiꞌtej jin sattaj jain Jehová jin tiꞌ.
30 Jaach caw cha wiꞌtoj jun saꞌbꞌeal tuꞌ yet chi akꞌle tzꞌaꞌ jin sattaj an,
jaꞌ ẍepuꞌal noꞌ yetoj cꞌal noꞌ xaamscꞌul,
jaꞌ noꞌ cha bꞌatxbꞌa ey jin sattaj.
31 Jaꞌ noꞌ ẍepuꞌ tuꞌ chi akꞌle tzꞌaꞌ bꞌey jun yet xaambꞌal tuꞌ yu naj yakꞌomal xaambꞌal,
jaxa xaamscꞌul noꞌ,
yet naj Aarón yetoj ebꞌ yicꞌaal chi yun canoj.
32-33 Jaꞌ swatxꞌ xubꞌ noꞌ xaambꞌal yet watxꞌcꞌulal tuꞌ,
cha wakꞌ tet naj yakꞌomal xaambꞌal tuꞌ,
jaꞌton jun chi txion ey ẍiqꞌuil noꞌ,
catuꞌ chi akꞌle tzꞌaꞌ ẍepuꞌal noꞌ yibꞌan jun yet xaambꞌal tuꞌ.
34 Jaꞌ yin noꞌ xaambꞌal yet watxꞌcꞌulal chi yiꞌtej ebꞌ conobꞌ Israel ey jin an,
chi waloni,
tol jaꞌ xaamscꞌul noꞌ yetoj swatxꞌ xubꞌ noꞌ,
yet cꞌal ebꞌ yakꞌomal xaambꞌal chi yun canoj.
35 Jaꞌ yin noꞌ xaambꞌal chi akꞌle tzꞌaꞌ jin sattaj,
jaꞌton junjun tujan jix yakꞌ naj Aarón yetoj cꞌal ebꞌ yicꞌaal,
yet tax cꞌal jix sicꞌle oc ebꞌ yin yakꞌomaloj xaambꞌal ey jin an.
36 Jix walon tet ebꞌ conobꞌ Israel yet tax cꞌal jix ẍaꞌon el yich yopiso ebꞌ yakꞌomal xaambꞌal,
tol jaꞌ jun tiꞌ yet ebꞌ jun tujan wan saꞌbꞌeal tuꞌ.
Jaꞌ jun chejbꞌanile tiꞌ,
sowalil chi jijele.
37 Jaꞌ wan tiꞌ jin chejbꞌanil yet chi akꞌle tzꞌaꞌ masanil xaambꞌal cꞌal yin saꞌbꞌeal yin tzet chi loꞌlei,
yetoj cꞌal xaambꞌal yet spenail,
yetoj xaambꞌal yet chi oc mimancꞌulal yibꞌan spenail,
yetoj wan saꞌbꞌeal yet chi oc junoj yakꞌomal xaambꞌal yin yopiso yetoj pax wan saꞌbꞌeal yet watxꞌcꞌulal,
ẍi Dios tet naj Moisés.
38 Jaꞌ bꞌey wonan Sinaí jix yalon wan ẍejbꞌanil Dios tiꞌ tet naj Moisés;
jaꞌ wan chejbꞌanile tiꞌ jix al-le tet ebꞌ Israel tzet chi yun yakꞌon xaambꞌal ebꞌ cꞌal saꞌbꞌeal ebꞌ tet Dios,
bꞌey jun cusiltaj txꞌotxꞌ chi yij Sinaí.