2 Ta ey junoj mactxequel chi mitxꞌon junoj tzetyetal tol man sajbꞌanebꞌiloj,

jaxca junoj smimanil camnaj noꞌ tol man sajbꞌanebꞌiloj,

ta xol-laj teꞌal noꞌ ma jobꞌbꞌeal noꞌ ma junoj chi sjutx sbꞌa sat txꞌotxꞌ,

jaꞌ jun ánima tuꞌ,

ta chi naꞌcha el yu tzet chi yunne ma cꞌamaj,

asan tol chi can yin man sajbꞌanebꞌiloj jaxca yalon ley,

catuꞌ chi oc can tzꞌiltaj yibꞌan.

(Tzꞌiltaj chi yun can yul sat Dios.)

3 Ta ey mactxequel chi mitxꞌon junoj tzetyetal chi el yin ánima,

jaꞌ junoj tzetyetal tol man sajbꞌanebꞌiloj ta man yotaj tzet jix yun tuꞌ,

jaxa yet chi yotajne eloj tzet jix yunne,

jaꞌ jun tuꞌ chi oc can tzꞌiltaj yibꞌan.

4 Ta ey junoj mactxequel chi yakꞌ stiꞌ yin junoj kꞌane yin eymanil,

caxcꞌal mi watxꞌ ma pena tzet chi yoche chi yunne,

caxcꞌal mi caw yotaj tzet chi yunne ma cꞌamaj yet chi yunen tuꞌ,

jaꞌ yu jun tuꞌ,

yaabꞌetaj chi yun canoj.

5 Jaꞌ mactxequel chi oc spenail yin wan tzetyetal tuꞌ,

sowalil chi ẍaꞌoc yin tol jix oc spenail,

6 catuꞌ chi yakꞌon junoj noꞌ txutxe meꞌ yin xaambꞌaloj yu spenail jix oc tuꞌ,

ma junoj noꞌ txutxe chiw.

Jaꞌ jun xaambꞌal tuꞌ,

jaꞌ naj yakꞌomal xaambꞌal chi waꞌneni yet watxꞌ chi elcan spenail yibꞌan ebꞌ.

7-9 Ta ey junoj mactxequel cꞌam chi skeꞌ smanon junoj smeꞌ,

sowalil chi yiꞌtej cacꞌonoj noꞌ jobꞌbꞌeal paramuch ma cuateꞌ,

catuꞌ chi yiꞌontej ebꞌ tet naj yakꞌomal xaambꞌal tuꞌ ey jin;

junoj noꞌ chi oc yin xaambꞌal yu spenail,

jal junxa noꞌ chi tzꞌaꞌ masanil yin xaambꞌal tuꞌ.

Jun bꞌabꞌel chi yakꞌ yu spenail tuꞌ,

tucꞌal chi txꞌumle el snukꞌ noꞌ,

asan cꞌam chi iꞌle el yin junelne.

Chi lawi tuꞌ,

chi txile oc niꞌoj ẍiqꞌuil noꞌ bꞌey yin spacꞌul jun yet xaambꞌal tuꞌ,

jaxa jantaj to ẍiqꞌuil noꞌ chi cani,

chi oc can bꞌey yajantaj yet xaambꞌal,

yutol xaambꞌal cꞌaltaꞌ yet spenail chi yun yakꞌlei.

10 Jaxa junxa noꞌ tzꞌiquin tuꞌ,

tol chi akꞌle tzꞌaꞌ yu naj yakꞌomal xaambꞌal jatacꞌalaꞌ yalon ley,

yet watxꞌ chi oc mimancꞌulal yibꞌan spenail jun ánima tuꞌ.

11 Ta cꞌam stumin junoj mactxequel yet chi smanon cacꞌonoj tzꞌiquin tuꞌ,

sowalil chi yiꞌtej canebꞌoj libra ixim jarina caw watxꞌ.

Cꞌam chi ale oc aceite olivo xol cꞌal teꞌ incienso yibꞌan,

yutol yet xaambꞌal spenail chi yun yakꞌlei.

12 Sowalil chi yiꞌtej ebꞌ tet naj yakꞌomal xaambꞌal tuꞌ,

jaxa naj chi iꞌontej junoj bꞌetxan ixim jarina tuꞌ yet chi tzꞌaꞌ yibꞌan yet xaambꞌal tuꞌ,

yu xeclo eloj tol masanil jun saꞌbꞌeal tuꞌ,

wet yeocoj;

chi akꞌle tzꞌaꞌ bꞌey jun yet xaambꞌal tuꞌ yibꞌan cꞌal wanxa saꞌbꞌeal chi tzꞌaꞌ jin sattaj.

Jaꞌ jun xaambꞌal tuꞌ,

yu spenail ebꞌ ánima yuxan chi akꞌlei.

13 Jaxca tuꞌ chi yute swaꞌnen naj yakꞌomal xaambꞌal tuꞌ,

yu yoc mimancꞌulal yibꞌan spenail ebꞌ ánima tuꞌ,

jantaj to jun xaambꞌal tuꞌ chi cani,

jaxca wanxa saꞌbꞌeal tiriw chi cancanoj,

yet ebꞌ yakꞌomal xaambꞌal chi yun canoj,

ẍi Dios tet naj Moisés.

14 Jix yalon Jehová tet naj Moisés jaxca tiꞌ:

15 Ta ey mactxequel chi stzꞌilbꞌanentoj junoj jin tzetyetal caxcꞌal yotaj yet lalan yunen tuꞌ ma cꞌamaj,

jaꞌ jun tuꞌ sowalil chi yiꞌtej junoj noꞌ icham meꞌ ey jin an,

yet chi oc yin xaambꞌaloj yu stooloj spenail,

tol watxꞌ cꞌal el masanil noꞌ,

jaꞌ jun noꞌ tuꞌ sowalil chi naꞌle jantaj stool jatacꞌalaꞌ jun echbꞌal chi kꞌanle bꞌey snail jin calubꞌal bꞌey chin chaꞌle jin bꞌa je yetoj.

16 Jaꞌ jun mactxequel tuꞌ sowalil chi yakꞌ stool yu wan tzetyetal tol wet yeocoj,

catuꞌ chi yakꞌon junoj yet sjoꞌ tujan yibꞌan stool tuꞌ,

catuꞌ chi akꞌle tet naj yakꞌomal xaambꞌal tuꞌ,

yetoj noꞌ meꞌ chi akꞌle yin xaambꞌalil yu spenail tuꞌ.

Jaxca tuꞌ chi yute swaꞌnen naj yakꞌomal xaambꞌal tuꞌ,

yu yoc mimancꞌulal yibꞌan spenail ebꞌ ánima tuꞌ.

17-18 Ta ey junoj chi oc spenail yin wan jin chejbꞌanil tiꞌ,

tol ey sowalil wu,

caxcꞌal man yotaj oj ta watxꞌ chi yunne ma cꞌamaj,

jaꞌ wan tuꞌ eyxa oc spenail yibꞌan ebꞌ,

jaꞌ yet chi snaꞌontej ebꞌ tol jix oc spenail,

sowalil chi yiꞌtej junoj noꞌ icham meꞌ ebꞌ ey jin yin xaambꞌal yu stooloj spenail ebꞌ,

tol watxꞌ cꞌal el masanil jun noꞌ noꞌ chi yakꞌ ebꞌ tuꞌ.

Jaꞌ tet ebꞌ yakꞌomal xaambꞌal tuꞌ chi yiꞌtej,

jaxa naj chi naꞌon eloj jantaj chi eloc stool jun meꞌ tuꞌ.

19 Jaꞌton xaambꞌal yu stoolanele el spenail tuꞌ,

yutol jaꞌ jun ánima tuꞌ ey spenail jin sattaj,

ẍi Dios,

tet naj Moisés.