Jaꞌ Sbꞌit Naj Moisés
15
Jix lawi tuꞌ xin,
catuꞌ jix sbꞌitne jun bꞌit naj Moisés yetoj masanil ebꞌ Israel sattaj Jehová,
jix yalon ebꞌ jaxca tiꞌ:
Caw chi cu bꞌitni tet Jehová yet chi kiꞌonwej a can sbꞌi,
yutol caw qꞌueyubꞌtaj jix yun yakꞌon jowal Naj.
Jix muji cantoj noꞌ che yul jaꞌ mar yetoj cꞌal ebꞌ eyoc yibꞌan noꞌ.
2 Jaꞌ Jehová chi akꞌon kip,
yuxan chi cu bꞌitnewej tet Naj,
yutol jaꞌ Naj jix cu colon eloj.
Jaꞌton Naj cu Diosal;
yuxan chi kiꞌa can sbꞌi.
Jaꞌ Naj sDiosal ebꞌ cu mam icham;
yuxan smoo chi kiꞌa can sbꞌi.
3 Jaꞌ Jehová caw jelan yin jowal;
Jehová ton yoc sbꞌi Naj.
4 Jix muji can eytoj scarruaje naj sreyal Egipto yetoj ebꞌ soldado yul jaꞌ Cajin Mar yu Jehová.
Yetoj ebꞌ eyoc yin yaawilal yetoj naj,
ebꞌ miman yeloc apnoj,
jix toocan ebꞌ yich jaꞌ Cajin Mar tuꞌ.
5 Jaxca wal chꞌen chꞌen,
queytuꞌ jix yun stoo can ebꞌ yich jaꞌ,
jix muji cantoj ebꞌ masanil.
6 Jaach Jehová,
jin Diosal,
yetoj ja watxꞌ kꞌabꞌ jix ja txꞌox ja wipalil,
jix ja wakꞌon qꞌueyel ebꞌ pena snaꞌbꞌal kin jon.
7 Jaꞌ yetoj ja wipal jix ja wakꞌon eyqꞌuey ebꞌ chi yoche chi yakꞌ jowal ja wetoj,
yetoj sjowal ja cꞌul jix ja wakꞌon tan el ebꞌ,
jaxca wal chi yun stzꞌaꞌtoj an chꞌim.
8 Yetoj ja wipalil jix ja xuontoj ja kaꞌeꞌ,
catuꞌ jix spoꞌontoj sbꞌa jaꞌ mar.
Jaxca junoj muro jix yun cantoj jaꞌ junjuntaj pacꞌ stiꞌlaj jun tajin bꞌe tuꞌ,
cꞌamxa cꞌal chi bꞌilwi sat jaꞌ.
9 Jix yalon ebꞌ pena snaꞌbꞌal tuꞌ:
Oj cu tzajlowej yintaj ebꞌ naj Israel tuꞌ,
masantaꞌcꞌal chi michꞌcha ebꞌ ku.
Jaxa kiꞌonwej ecꞌ tzetyetal ebꞌ,
catuꞌ oj cu poꞌonwej ecꞌ kin,
yet watxꞌ mimanxa tzet ey,
ey jon.
Oj kiꞌon atej chꞌen cu espada yul stzꞌuumal,
catuꞌ cu tzokꞌon cam ebꞌ.
Jaxca tuꞌ oj yun yakꞌlowej cu cꞌul,
ẍi ebꞌ.
10 Jaꞌ yet jix ja xuontoj ja kaꞌeꞌ yibꞌan jaꞌ mar,
catuꞌ jix muji cantoj ebꞌ naj yu jaꞌ;
jix toocan ebꞌ naj yich jaꞌ jaxca chꞌen plomo.
11 Jaach Jehová,
jin Diosal,
¡cꞌamxa junojxa dios laan ja wetoj!
¡Asan jaach miman ja weloc apnoj!
¡Asanxane jaach ey ja wipalil!
Cꞌam junojxa mac chi skeꞌ milagro yu,
cꞌal jantaj wan tzet qꞌueyubꞌtaj xacꞌal cha wunne.
12 Jix ja waontoj ja kꞌabꞌ yibꞌan ebꞌ ánima yetoj ja wipal,
jaxa txꞌotxꞌ txꞌotxꞌ jix tukꞌun can eytoj ebꞌ.
13 Yu ja miman camcꞌulal,
yuxan chon ja wiꞌ bꞌey jaon ja conobꞌ jon tiꞌ.
Yetoj ja wipalil chon ja wiꞌon bꞌeytoj bꞌey txꞌotxꞌ txꞌotxꞌ tol ket cꞌaltaꞌ yeocoj.
14 Jaꞌ yet oj yabꞌen wanxa conobꞌ jun tiꞌ,
caw oj bꞌilwoj a ebꞌ yu xiwcꞌulal,
catuꞌ oj xiw pax a ebꞌ Filisteo.
15 Jaꞌ ebꞌ syaawil ebꞌ a Edom,
tuxa cꞌal oj qꞌueycan a scꞌul ebꞌ,
cꞌal ebꞌ yaaw bꞌey Moab,
tuxa cꞌal oj lujlon a ebꞌ yu xiwcꞌulal.
Jaxa pax ebꞌ Cananeo xin,
tuxa cꞌal oj scꞌubꞌa el sbꞌa ebꞌ.
16 Jaach jin Diosal,
¡xiw ojabꞌ can a ebꞌ,
catuꞌ sicbꞌoj ojabꞌ can el ebꞌ!
Jaxca ojabꞌ xacꞌal chꞌen chꞌen chi yun can el ebꞌ yu ja wipalil,
masantaꞌcꞌal oj cu ecꞌ cantoj jaon ja conobꞌ jon tiꞌ.
17 Jaach jin Diosal,
ijbꞌan jon cꞌal bꞌeyoj,
yet chon ja wiꞌontoj bꞌey sjolomtaj wonan tol ja wet yeocoj,
yet chi cu caey tituꞌ yin junelne.
Bꞌey jun txꞌotxꞌ tol jaach jix ja sicꞌ can eloj yet chach caey ecꞌ tituꞌ.
18 Jaach Jehová,
Rey jaach,
ẍi Moisés yin sbꞌit yetoj ebꞌ yet conobꞌ tuꞌ.
Sbꞌit Ix María
19 Jaꞌ yet jix too naj sreyal Egipto yetoj scarruaje yet jowal yul jaꞌ mar,
cꞌal wanxa ebꞌ inen oc noꞌ che yet chi ujtele ebꞌ Israel tuꞌ,
jaꞌ Dios jix akꞌon sjunbꞌane ey sbꞌa jaꞌ mar yibꞌan ebꞌ,
yuxan jix muji cantoj masanil ebꞌ yu jaꞌ.
Jal pax ebꞌ conobꞌ Israel xin,
caw watxꞌ jix yun skꞌaxbꞌo ecꞌtoj ebꞌ yul jaꞌ mar yin tajin txꞌotxꞌ.
20 Yu tuꞌ xin,
jaꞌ ix María,
ix ẍejabꞌ Dios,
yanabꞌ naj Aarón,
jix yiꞌa jun jenan ye chꞌen ix,
catuꞌ jix xꞌakꞌotane ix,
yetoj cꞌal masanil ebꞌ ix yet Israelal ix,
iꞌbꞌil a yet ebꞌ,
jix canalwi ebꞌ yetoj.
21 Jaꞌ ix María jix ijbꞌan bꞌitnoj ebꞌ jaxca tiꞌ:
Bꞌitnojonwej,
kiꞌwej a can sbꞌi Jehová,
ilaꞌ tol caw qꞌueyubꞌtaj xacꞌal jix yun yakꞌon jowal Naj.
Jix muji cantoj noꞌ che,
cꞌal ebꞌ eyoc yibꞌan noꞌ yul jaꞌ mar,
ẍi ix.
Jun Jaꞌ Jaꞌ Caw Kꞌaꞌ
22 Jix lawi tuꞌ xin,
catuꞌ jix yiꞌon el naj Moisés ebꞌ Israel bꞌey stiꞌ jaꞌ Cajin Mar,
jix too ebꞌ bꞌey cusiltaj txꞌotxꞌ yul yet txꞌotxꞌ chi yij Sur;
oxebꞌ cꞌual jix bꞌey ebꞌ,
cꞌam cꞌal bꞌey jix ilcha niꞌoj jaꞌ yu ebꞌ.
23 Jix lawi tuꞌ,
jix apni oc ebꞌ bꞌey jun txꞌotxꞌ chi yij Mará.
Ey jaꞌ jaꞌ tituꞌ,
ma skeꞌ yuqꞌuen jaꞌ ebꞌ yutol caw kꞌaꞌ yuqꞌui jaꞌ,
yu tuꞌ xin,
yuxan Maráa jix yij can sbꞌi jun txꞌotxꞌ tuꞌ yu ebꞌ.
24 Jaxa yoc ian ebꞌ ánima tuꞌ yalon pena kꞌane yin naj Moisés,
catuꞌ jix skꞌanlen ebꞌ tet naj:
¿Bꞌeytuꞌ oj toj kiꞌoc jaꞌ oj kucꞌwej tinaniꞌ?
ẍi ebꞌ.
25 Jix lawi tuꞌ,
jix txali naj Moisés tet Jehová.
Jaxa Dios jix txꞌoxon jun teꞌ teꞌ,
catuꞌ jix yaon eytoj xol jaꞌ naj Moisés,
catuꞌ jix waꞌxi el jaꞌ.
Jaꞌ tituꞌ jix yakꞌ jun chejbꞌanile Jehová tet ebꞌ,
tol chi sbꞌeybꞌalne ebꞌ,
yu yiloni ta tol jijem cꞌal ebꞌ.
26 Jix yalon Jehová tet ebꞌ:
Ta che jije tzet chi wal jain Jehová je Diosal jin tiꞌ,
catuꞌ che jijen tzet chi yal jin chejbꞌanil cꞌal masanil jin ley,
catuꞌ man oj watej syaꞌilal je yibꞌan jaxca wan jix waoc yibꞌan ebꞌ a Egipto,
yutol jain Jehová jin tiꞌ oj jex wante,
ẍi Dios tet naj Moisés.
27 Jix lawi tuꞌ xin,
jix too ebꞌ,
catuꞌ jix apni oc ebꞌ bꞌey jun txꞌotxꞌ chi yij Elim,
bꞌey ey lacawebꞌ snukꞌ jaꞌ jaꞌ,
cꞌal 70 teꞌ palma,
jaꞌ tituꞌ jix caey ebꞌ stiꞌ jaꞌ tuꞌ.