2 Al tet ebꞌ ja wet conobꞌ Israel tol chi meltzo niꞌojxa ebꞌ yintaj,

catuꞌ chi syambꞌa oc sbꞌa ebꞌ bꞌey Pi-hahirot,

bꞌey snan xol Migdol yetoj jaꞌ mar,

bꞌey sattajto Baal-zefón.

Jaꞌ tituꞌ che waꞌne ey bꞌulan je pat bꞌey scawilal stiꞌ jaꞌ mar tuꞌ.

3 Jaxa naj sreyal Egipto oj snaꞌ naj jaxca tiꞌ:

Jaꞌ ebꞌ Israel tiꞌ man yotaj oj ebꞌ bꞌey chi kaꞌ stoocoj.

Yutol jix maji cantoj ebꞌ bꞌey cusiltaj txꞌotxꞌ.

4 Yu tuꞌ xin,

jain oj wakꞌ pax pitbꞌoj el snaꞌbꞌal junelxa,

catuꞌ oj toj tzajan je yintaj.

Queytuꞌ oj yun jin txꞌoxon el wipalil yu tzet oj wunne,

cꞌal yin ebꞌ soldado naj;

jaxa ebꞌ ánima bꞌey Egipto oj yotajne el ebꞌ tol jain ton Jehová jin,

ẍi Dios tet naj Moisés.

Yuxan jix meltzo ebꞌ Israel niꞌojxa.

5 Jaxa yet jix apni oc skꞌumal tet naj rey tuꞌ tol jix el ebꞌ Israel,

catuꞌ jix snaꞌon naj yetoj cꞌal ebꞌ eyoc yin yaawilal yetoj,

jix yalon ebꞌ:

¡Manxa wal cu sucaloj!

¿Yuxan jix cu jajtoj ebꞌ Israel,

jix oc tucan smulna ebꞌ yin cu yakꞌon servil?

ẍi ebꞌ.

6 Jix lawi yalon naj rey wan tiꞌ,

catuꞌ jix yalon naj rey tol chi waꞌnele scarruaje naj yet jowal,

yetoj cꞌal ebꞌ soldado naj.

7 Catuꞌ jix yiꞌontoj masanil carruaje yet Egipto,

yetoj 600 scarruaje tol caw watxꞌ scawxi,

jaꞌjun ebꞌ capitán yetoj junjun carruaje tuꞌ.

8 Jix akꞌle cꞌal pax pitbꞌoj el snaꞌbꞌal naj rey Faraón yu Jehová,

yuxan jix too tzajan yintaj ebꞌ Israel,

yet jix el ebꞌ bꞌey Egipto tuꞌ.

9 Jix tzajlo naj sreyal Egipto yetoj ebꞌ soldado yintaj ebꞌ Israel,

yetoj noꞌ che jutxnen oc wan carruaje tuꞌ,

caw ecꞌal ánima jaꞌjun yetoj.

Jatuꞌ jix tzajlo ebꞌ a Egipto yintaj ebꞌ Israel bꞌey stiꞌ jaꞌ mar,

bꞌey scawilal Pi-hahirot sattajto Baal-zefón;

jaꞌ tituꞌ ey scampamento ebꞌ Israel.

10 Jaxa yet jix yilontoj ebꞌ Israel,

tol tzajanxa oc naj rey yetoj soldado yintaj ebꞌ,

caw jix xiwa ebꞌ,

catuꞌ jix a yaw ebꞌ tet Jehová.

11 Jix yalon ebꞌ tet naj Moisés:

—¿Tumi cꞌam camposanto bꞌey Egipto xin,

yuxan chon ja wiꞌtej cam bꞌey cusiltaj txꞌotxꞌ tiꞌ?

¿Tzet yuxan jix jon ja wiꞌeltej bꞌey Egipto?

12 Jix kal ey jaach yet ey jon to ecꞌ tituꞌ,

tol cꞌam che yiꞌecꞌ cu tiempo.

Bꞌejan cu cꞌul cu mulna yintaj ebꞌ a Egipto.

Yel xacꞌal watxꞌ tol jaꞌ bꞌey Egipto chi cu mulna cꞌal,

yintaj pax tol jaꞌ bꞌey cusiltaj txꞌotxꞌ tiꞌ chi cu jul camoj,

ẍi ebꞌ,

chi yalon ebꞌ.

13 Jix takꞌwi naj Moisés tet ebꞌ ánima jaxca tiꞌ:

—Manche jex xiwi,

tecꞌbꞌawej je bꞌa.

Oj je yilaꞌ tzet oj yun scolwa Jehová ketoj tinaniꞌ,

tol cꞌamxa bꞌakꞌin oj je yil yin ebꞌ a Egipto tiꞌ,

asanxane tinaniꞌ che yiloc yin ebꞌ.

14 Cꞌam ojabꞌ chi tac je cꞌul,

yutol jaꞌ Dios oj yakꞌ jowal je qꞌuexeloj,

ẍi Moisés tet ebꞌ ánima tuꞌ.

15 Jix yalon Jehová tet naj Moisés:

—¿Tzet yuxan chach awi ey jin?

Al tet ebꞌ ja wet Israelal tuꞌ,

tol chi bꞌey cꞌaltoj ebꞌ sattaj.

16 Jaꞌ yet oj jex apnoj oc bꞌey stiꞌ jaꞌ mar tuꞌ,

cha wiꞌon a ja kꞌojoch,

catuꞌ cha waontoj yibꞌan jaꞌ mar tuꞌ,

catuꞌ oj spoꞌon sbꞌa jaꞌ,

jaxa xeclo a tajin txꞌotxꞌ bꞌey oj jex ecꞌtoj yul jaꞌ tuꞌ.

17 Catuꞌ oj wakꞌon pitbꞌoj el snaꞌbꞌal ebꞌ a Egipto tuꞌ,

jaxa yoc tzajan ebꞌ je yintaj yaloni,

jaꞌton yet tuꞌ oj jin txꞌox wipalil yil naj rey Faraón tuꞌ,

cꞌal tet ebꞌ soldado,

cꞌal yin scarruaje ebꞌ,

cꞌal yin noꞌ che tokꞌnen ocoj,

cꞌal yin ebꞌ ánima jaꞌjun yetoj ebꞌ.

18 Jaꞌ yet oj lawoj yeyqꞌuey ebꞌ wu masanil,

jaꞌton yet tuꞌ oj yotajne el ebꞌ ánima a Egipto tuꞌ,

tol jain ton Jehová,

Dios jin.

19 Jaxa jun yángel* Jehová bꞌabꞌel stoo yetoj jun asun sattaj ebꞌ Israel tuꞌ.

Jix meltzo yintaj,

catuꞌ jix oc snan xol ebꞌ Israel,

yetoj ebꞌ a Egipto.

20 Caw kꞌej jolinaj xacꞌal jix yun can el sattaj ebꞌ a Egipto tuꞌ,

jal pax bꞌey xol ebꞌ Israel xin,

caw sajkꞌinal yili masanil.

Yuxan,

ma xa skeꞌ stzajlo ebꞌ a Egipto yintaj ebꞌ Israel yet jun akꞌbꞌal tuꞌ.

21 Catuꞌ jix yaontoj skꞌabꞌ naj Moisés yetoj skꞌojoch yibꞌan jaꞌ mar,

jaxa Jehová jix aontej jun miman kaꞌeꞌ caw jow.

Jatuꞌ jix tit yetcꞌulal bꞌey chi aol cꞌu,

jun akꞌbꞌal jix yakꞌ jun miman kaꞌeꞌ tuꞌ.

Catuꞌ jix spoꞌon sbꞌa snan jaꞌ mar,

queytuꞌ jix yun yakꞌon txeclo a Dios,

tajin txꞌotxꞌ bꞌey snan jaꞌ tuꞌ.

22 Caw tajin jun bꞌe bꞌey jix ecꞌtoj ebꞌ Israel bꞌey yul jaꞌ mar tuꞌ,

yutol caabꞌ tujan jix yuntoj jaꞌ.

Jaꞌ tituꞌ jix ecꞌtoj ebꞌ,

jaxca wal smuroal junoj na queytuꞌ jix yun yoc can tucan jaꞌ bꞌey swatxꞌ kꞌabꞌ ebꞌ cꞌal bꞌey sqꞌuexan kꞌabꞌ ebꞌ.

23 Jaxa ebꞌ soldado inen oc scarruaje naj rey yetoj cꞌal ebꞌ ánima jaꞌjun yetoj ebꞌ,

jix oc tzajan ebꞌ yintaj ebꞌ Israel tuꞌ,

masantaꞌcꞌal jix apni oc ebꞌ bꞌey snan yul jaꞌ mar tuꞌ.

24 Jaꞌ Jehová eyoc xol jun kꞌakꞌ cꞌal xol jun asun tuꞌ,

yet lalanxa sajbꞌi eloj,

jix il-le eytej ebꞌ a Egipto tuꞌ yu Jehová,

catuꞌ jix somchatoj snaꞌbꞌal ebꞌ yu Dios.

25 Jix eltej yajan scarruaje ebꞌ,

cꞌamxa chi skeꞌ stit ebꞌ,

jix yalon ebꞌ jaxca tiꞌ:

—Eloj jonwej tet ebꞌ naj Israel tiꞌ,

yu ebꞌ yuxan chi yakꞌ jowal Jehová ketoj,

ẍi ebꞌ naj.

26 Jix yalon Jehová tet Moisés jaxca tiꞌ:

—Atoj ja kꞌabꞌ yetoj ja kꞌojoch yibꞌan jaꞌ mar tuꞌ,

catuꞌ chi tit can jaꞌ yibꞌan masanil ebꞌ a Egipto,

cꞌal yibꞌan scarruaje ebꞌ,

cꞌal yibꞌan ebꞌ inen oc noꞌ che,

yet chi mujle cantoj ebꞌ yu jaꞌ,

ẍi Dios.

27 Jix lawi tuꞌ,

jix yaontoj skꞌabꞌ naj Moisés yibꞌan jaꞌ mar;

jaxa yet jix sajbꞌi eloj,

jix syambꞌa oc sbꞌa jaꞌ jaxca cꞌaltaꞌ yeoc jaꞌ.

Jix too meltzo ebꞌ a Egipto tuꞌ yaloni,

tol xax sjunbꞌane ey sbꞌa jaꞌ sattaj ebꞌ,

yuxan jix muji cantoj masanil ebꞌ yu jaꞌ.

Queytuꞌ jix yun sqꞌueyle el ebꞌ a Egipto yu Jehová.

28 Jaxca tuꞌ jix yun sjunbꞌanen ey sbꞌa jaꞌ mar jaxca cꞌaltaꞌ yeoc jaꞌ,

catuꞌ jix muji cantoj scarruaje ebꞌ naj,

cꞌal ebꞌ inen oc noꞌ che,

cꞌal masanil ebꞌ soldado naj rey tzajan oc yintaj ebꞌ Israel tuꞌ;

pilan jix too ebꞌ yich jaꞌ,

cꞌamxa junoj ebꞌ jix colcha eloj.

29 Jal pax masanil ebꞌ Israel xin,

caw watxꞌ cꞌal jix yun yecꞌtoj ebꞌ yul jun bꞌe caw tajin bꞌey snan jaꞌ mar tuꞌ.

Jaꞌ bꞌey stiꞌlaj jun bꞌe bꞌey chi bꞌeytoj ebꞌ tuꞌ,

jaxca junoj muro jix yun yoc can tucan jaꞌ.

30 Jaꞌton yet jun cꞌu tuꞌ,

jix col-le el ebꞌ Israel yu Dios yul skꞌabꞌ ebꞌ a Egipto.

Jix yilon ebꞌ Israel tol ecꞌal ebꞌ soldado a Egipto camnajxa el bꞌey stiꞌlaj jaꞌ mar tuꞌ.

31 Jaꞌ yet jix yilon ebꞌ Israel jantaj yipalil Jehová jix xꞌox yin ebꞌ a Egipto yet jix qꞌueyle el ebꞌ,

caw jix xiwa ebꞌ,

yuxan jix yaoc Jehová ebꞌ yipoj scꞌul,

jix yotajne el ebꞌ tol jaꞌ Moisés ẍejabꞌ Dios yeoc naj.