2 Jaꞌ ebꞌ je bꞌabꞌel winaj unin chi ali,

che poꞌowej el ebꞌ,

yutol wet chi yun can oc ebꞌ bꞌabꞌel unin xol ebꞌ je yet conobꞌ tuꞌ.

Jacꞌalaꞌ pax noꞌ bꞌabꞌel yuneꞌ noꞌ je jobꞌbꞌeal noꞌ,

wet chi yun can oc noꞌ,

ẍi Jehová.

3 Jix yalon pax Moisés tet masanil ebꞌ yet conobꞌ tuꞌ jaxca tiꞌ:

Sowalil oj cu naꞌwejtej jun kꞌin tiꞌ yin junjun abꞌil,

yutol jix cu yiꞌeltej Jehová yetoj yipalil bꞌey Egipto,

bꞌey ey jonwej oc yin yakꞌomaloj servil.

Yuxan cꞌam ojabꞌ junoj jon chi cu loꞌ ixim pan eey yich yet jun cꞌual tuꞌ.

4 Jaꞌ jun xꞌaaw yet jix cu eltej bꞌey Egipto tiꞌ,

Abib sbꞌi.

5 Jaꞌton yet jun xꞌaaw tuꞌ yet chi cu naꞌontej jun kꞌin tuꞌ,

yetoj cu yiꞌontoj Jehová bꞌey txꞌotxꞌ txꞌotxꞌ yaax sat,

jaꞌton txꞌotxꞌ bꞌey caan ebꞌ Heteo,

ebꞌ Amorreo,

ebꞌ Ferezeo cꞌal ebꞌ Jebuseo,

jaꞌton txꞌotxꞌ bꞌey yakꞌnaj can stiꞌ Jehová tet ebꞌ cu mam icham tol oj yakꞌ ey jon.

6 Jujebꞌ cꞌual oj cu loꞌ ixim pan tol cꞌam yich eeyoj.

Jaxa yet sjuj cꞌual xin,

jaꞌton yet tuꞌ chi cu oc yin eyilal yu kiꞌon a can sbꞌi Jehová cu Diosal.

7 Jaꞌ yul jujebꞌ cꞌual tuꞌ,

cꞌam ojabꞌ yich pan eyecꞌ bꞌey cu na,

cꞌam ojabꞌ pax ixim pan tol eey yich eyecꞌ bꞌey cu na bꞌey oj cu apnoj tuꞌ.

8 Jaꞌ yet wan cꞌual tuꞌ,

oj kalon tet ebꞌ kuninal jaxca tiꞌ:

Jaꞌ jun kꞌin chi cu naꞌtej tiꞌ,

jaꞌton yet jix yakꞌon swatxꞌcꞌulal Jehová ey jonwej,

yet jix cu iꞌle eltej bꞌey Egipto,

cu chi tet ebꞌ.

9 Jaꞌ jun kꞌin tiꞌ,

jaxca wal tol jaꞌ yin je kꞌabꞌ,

ma yin je palan chi oc canoj,

jaxca chi yun yoc yechel junoj tzetyetal.

Jaꞌ chi akꞌon cu naꞌtej,

yutol yetoj yipalil Dios jix cu yiꞌon eltej bꞌey Egipto.

Yuxan cꞌam ojabꞌ bꞌakꞌin chi too qꞌueycꞌulal jun chejbꞌanile tiꞌ kuwej.

10 Yuxan junjun cꞌal abꞌil oj cu naꞌtej jun kꞌin tiꞌ jaxca jix yun yal-le can ey jon je yetoj.

11 Jaꞌ yet oj cu yiꞌon apnoj Jehová bꞌey yul yet txꞌotxꞌ Canaán tuꞌ,

bꞌey jix yakꞌ can stiꞌ yakꞌon tet ebꞌ cu mam icham cꞌal ey jon,

12 jaex tiꞌ che yiꞌtej ebꞌ je bꞌabꞌel winaj unin,

cꞌal noꞌ icham bꞌabꞌel yuneꞌ je jobꞌbꞌeal noꞌ,

tol yet Dios chi yun can oc ebꞌ.

13 Jacꞌalaꞌ yet chi jul bꞌabꞌel yuneꞌ noꞌ je bꞌuru,

ta icham noꞌ,

chi skeꞌ yoc junoj noꞌ yuneꞌ meꞌ,

ma junoj noꞌ yuneꞌ chiw sqꞌuexeloj noꞌ.

Ta cꞌam che yakꞌwej noꞌ meꞌ tuꞌ xin,

che makꞌwej kꞌa snukꞌ noꞌ yaliẍ bꞌuru tuꞌ.

Jaxca cꞌal tuꞌ chi yun ebꞌ je bꞌabꞌel winaj unin,

sowalil chi akꞌle junoj noꞌ yuneꞌ meꞌ sqꞌuexeloj ebꞌ.

14 Jaꞌ yet oj skꞌanlen ebꞌ je yuninal yet bꞌakꞌin,

tzet chi yal yeloc apnoj wan tiꞌ,

che yalon tet ebꞌ jaxca tiꞌ:

Tol jix cu yiꞌeltej Jehová yetoj yipalil bꞌey Egipto,

yet ey jonwej oc yin yakꞌomaloj servilal.

15 Jaꞌ yet jix pitbꞌi el snaꞌbꞌal naj rey Faraón,

yet ma yal scꞌul naj jix cu sjajeloj,

jaꞌ Jehová jix makꞌon cam ebꞌ sbꞌabꞌel unin ebꞌ a Egipto,

cꞌal noꞌ sbꞌabꞌel yuneꞌ sjobꞌbꞌeal noꞌ ebꞌ.

Yuxan jaꞌ noꞌ bꞌabꞌel yuneꞌ cu jobꞌbꞌeal noꞌ,

chi cu makꞌwej cam noꞌ yin xaambꞌal tet Jehová,

catuꞌ chi kakꞌon pax junoj noꞌ sqꞌuexeloj ebꞌ cu bꞌabꞌel unin,

je chi tet ebꞌ.

16 Yu tuꞌ xin,

jaꞌ jun xaambꞌal tiꞌ,

jaxca tol jaꞌ yin je kꞌabꞌ ma yin je palan eyocoj,

yet watxꞌ chi cu naꞌtej tol jaꞌ Dios jix cu iꞌon eltej bꞌey Egipto yetoj miman yipal,

ẍi Moisés.

17 Jaꞌ yet jix jajle el ebꞌ conobꞌ Israel yu naj rey Faraón bꞌey yul conobꞌ Egipto,

ma yal scꞌul Jehová jix too ebꞌ bꞌey sbꞌe ebꞌ naj Filisteo.

Caxcꞌal mi tol jichan jun bꞌe tuꞌ,

yutol jix snaꞌ Dios tala chi yakꞌ jowal ebꞌ naj Filisteo tiꞌ yetoj ebꞌ Israel tiꞌ,

yuxan meltzo tala ebꞌ bꞌey Egipto junelxa yu junoj jowal chi oqui.

18 Yu jun tuꞌ xin,

jix ecꞌ cꞌal joyoyoj ebꞌ Israel yu Jehová bꞌey txꞌotxꞌ cusiltaj txꞌotxꞌ,

cꞌal stiꞌlaj jaꞌ Cajin Mar.

Jaꞌ yet jix el ebꞌ Israel bꞌey yul yet Egipto,

iꞌbꞌil oc smitxꞌkꞌabꞌ ebꞌ yet jowal.

19 Jix yalon naj Moisés tol chi iꞌletoj sbꞌajil smimanil naj José.

Jaꞌ yet cꞌamto chi cami,

jix yal can tet ebꞌ yuẍtaj tol jaxca tuꞌ chi yute ebꞌ.

Yalnaj pax can José tet ebꞌ:

Caw yel jaꞌ Dios oj colwa je yetoj;

yuxan jaꞌ yet oj yunen jun tiꞌ,

che yiꞌtoj sbꞌajil jin mimanil tiꞌ je yetoj.

20 Jix el ebꞌ Israel tuꞌ bꞌey Sucot,

catuꞌ jix apni oc bꞌulan ebꞌ bꞌey Etam,

bꞌey chi ẍaꞌel yich txꞌotxꞌ cusiltaj txꞌotxꞌ.

21 Jaꞌ yet cꞌualil,

jix bꞌabꞌi Jehová sattaj ebꞌ xol jun bꞌocꞌan asun,

jaꞌ jix txꞌoxon bꞌe tet ebꞌ.

Jaxa yet akꞌbꞌalil xin,

jaꞌ xol jun asun tuꞌ eyoc Jehová,

eyoc skꞌakꞌal yet chi tzejtanele ebꞌ ánima tuꞌ,

yet watxꞌ chi skeꞌ sbꞌey ebꞌ yet cꞌualil cꞌal yet akꞌbꞌalil.

22 Jaꞌ jun bꞌocꞌan asun tuꞌ,

bꞌabꞌel cꞌal stoo sattaj ebꞌ Israel tuꞌ yet cꞌualil,

jaxa yet akꞌbꞌalil eyoc skꞌakꞌal.

Cꞌam cꞌal bꞌey jix bꞌejlecan ebꞌ yu Jehová.