Jix Oc Kꞌin Yet Jix Jajle El Ebꞌ Israel Bꞌey Egipto
12
Yalnaj can Jehová tet Moisés cꞌal tet Aarón bꞌey Egipto jaxca tiꞌ:
2 Jaꞌ jun xꞌaaw tiꞌ,
miman ojabꞌ yeloc apnoj yul je sat,
bꞌabꞌel xꞌaaw yul junjun abꞌil chi yun canoj.
3 Alwej jun chejbꞌanile tiꞌ tet masanil ebꞌ je yet Israelal:
Tol jaꞌ yet 10 yoc jun xꞌaaw tiꞌ,
junjun cꞌal nail ebꞌ ánima oj yiꞌtej junjunoj noꞌ yuneꞌ meꞌ,
ma junoj noꞌ yuneꞌ chiw yet chi ẍiꞌon yetoj masanil ebꞌ caan yetoj yul sna.
4 Ta tol cꞌam jex txꞌial yul je na,
ta cꞌam chi lawi noꞌ je chiꞌoni,
chi skeꞌ je yawten ebꞌ caan je cawilal,
yet chi colwa ebꞌ ẍiꞌon je yetoj.
Che poꞌoecꞌ noꞌ chiꞌbꞌe tuꞌ tet ebꞌ,
jatacꞌalaꞌ jantaj sbꞌisil ánima tuꞌ,
ma jantaj cꞌal chi ẍiꞌ junjun ebꞌ.
5 Jaꞌ noꞌ meꞌ ma noꞌ chiw tuꞌ,
sowalil jun abꞌil skꞌinal noꞌ,
catuꞌ jaꞌ ojabꞌ noꞌ watxꞌ smimanil.
6 Tucꞌal to che sicꞌ el noꞌ,
masantaꞌcꞌal yet 14 yoc jun xꞌaaw tuꞌ,
jato yet tuꞌ che makꞌon cam noꞌ.
Jaꞌ yet lalanxa skꞌejbꞌi eyoj catuꞌ che makꞌon cam je yet junjun jex.
7 Masanil na bꞌey oj chiꞌle noꞌ chiꞌbꞌe tuꞌ,
junjun cꞌal ebꞌ ey sna tuꞌ chi sbꞌonoc ẍiqꞌuil noꞌ yin sjolom smarcoal smaj sna tuꞌ,
cꞌal yinlaj spacꞌul teꞌ.
8 Jaꞌ yet jun akꞌbꞌal tuꞌ,
yetoj je chiꞌon noꞌ chiꞌbꞌe tuꞌ,
tucꞌal oj je bꞌol noꞌ,
catuꞌ oj je chiꞌon an kꞌaꞌ ita yetoj noꞌ chiꞌbꞌe tuꞌ,
cꞌal je loꞌon ixim pan cꞌam yich.
9 Cꞌam ojabꞌ niꞌoj noꞌ che chiꞌ yin syaxil,
cꞌal yakꞌle taa noꞌ yul xi.
Tucꞌal che bꞌol noꞌ masanil,
noꞌ sjolom,
noꞌ yajan yetoj noꞌ yul scꞌul.
10 Catuꞌ cꞌamxa che yiꞌcan niꞌojxa noꞌ yet junxa cꞌu yet yecal.
Ta eyto noꞌ cꞌam chi lawi je chiꞌoni,
che yakꞌwej can tzꞌaꞌ noꞌ.
11 Jaꞌ yet oj jex low tuꞌ,
kꞌalbꞌil ojabꞌ je nan,
ey ojabꞌ oc je xanabꞌ,
catuꞌ che lacon a je kꞌojoch,
yin ojabꞌ eymanil chi yun je chiꞌon noꞌ.
Jaꞌ yet jun cꞌu tuꞌ,
chin je naꞌtej,
yutol chin ecꞌ stiꞌlaj je na,
yet che yiꞌon a can jin bꞌi jain Jehová jin tiꞌ.
12 Jain Jehová jin chi walaꞌ,
tol jaꞌ yet jun akꞌbꞌal tuꞌ,
oj jin ecꞌ bꞌey masanil yul yet Egipto tiꞌ,
yet chin makꞌon cam masanil ebꞌ bꞌabꞌel unin bꞌey junjun nail ebꞌ ánima,
yetoj cꞌal noꞌ bꞌabꞌel yuneꞌ sjobꞌbꞌeal noꞌ ebꞌ,
cꞌal wakꞌon lawoj masanil sdiosal ebꞌ a Egipto tiꞌ.
13 Jaꞌ ẍiqꞌuil noꞌ noꞌ tuꞌ che bꞌonoc yin smajil stiꞌ je na bꞌey caan jex ecꞌ tuꞌ.
Jaꞌ oj txꞌoxonoj,
yutol jaꞌ yet oj jin ecꞌ jin makꞌon cam masanil ebꞌ bꞌabꞌel yuninal ebꞌ a Egipto tiꞌ,
cꞌam junoj jex jaex tiꞌ oj jex camoj.
Jaꞌ yet oj wilon oc jun chicꞌ tuꞌ,
palan cꞌal wecꞌ eloj.
14 Jaꞌ yet tuꞌ,
miman ojabꞌ yeloc apnoj chi yun can oc jun cꞌual tuꞌ yul je sat,
catuꞌ che yaon oc junoj miman kꞌin yet che yiꞌon a can jin bꞌi,
jain Jehová jin tiꞌ.
Che naꞌtej jun tiꞌ,
yet jix jex wiꞌon eltej bꞌey Egipto tiꞌ,
catuꞌ chi snaꞌontej ebꞌ je yuninal yet bꞌakꞌin.
Ley chi yun can jun tiꞌ je xol.
15 Jaꞌ ixim pan che loꞌwej yin jujebꞌ cꞌu tuꞌ,
cꞌam ojabꞌ yich eeyoj.
Yu tuꞌ xin,
jaꞌ yet bꞌabꞌel cꞌual che yiꞌeltej masanil yanil yich pan bꞌey je na junjun jex.
Ta ey junoj mac chi loꞌon ixim pan tol eey yich yet wan cꞌual tuꞌ,
sowalil che yiꞌel xol conobꞌ tuꞌ.
16 Jaꞌ yet bꞌabꞌel cꞌu tuꞌ,
che yambꞌa oc je bꞌa yet chex oc yin eyilal jin sattaj,
jaxca cꞌal pax tuꞌ che yute yet sjuj cꞌual.
Jaꞌ yin caabꞌ cꞌual tuꞌ,
cꞌam mac chi mulnai,
asan je loꞌbꞌe chi skeꞌ je waꞌneni.
17 Sowalil che jije jun kꞌin tuꞌ yetoj ixim pan tol cꞌam yich,
yutol jaꞌ yet jun cꞌual tuꞌ,
jatuꞌ oj jex wiꞌon eltoj je masanil yul yet Egipto tiꞌ.
Junjun cꞌal abꞌil che yaoc jun kꞌin tuꞌ;
ley chi yun can ey jex,
oj sjije cꞌal ebꞌ je yicꞌaal yet bꞌakꞌin.
18 Chi el yich je loꞌon ixim pan cꞌam yich tuꞌ yet yeycꞌualil,
yet 14 yoc bꞌabꞌel xꞌaaw masantaꞌcꞌal yet 21 yoc sbꞌisil jun xꞌaaw tuꞌ yet yeycꞌualil.
19 Jaꞌ yin jujebꞌ cꞌual tuꞌ,
cꞌam ojabꞌ junoj mactxequel eyecꞌ ixim pan eey yich tuꞌ bꞌey sna.
Ta ey junoj mac chi loꞌon ixim pan tol eey yich yet wan cꞌual tuꞌ,
chi iꞌle el xol je conobꞌ tuꞌ,
caxcꞌal junoj txꞌoj conobꞌal caan ecꞌ je xol,
ma junoj jex jaex Israel jex tiꞌ,
sowalil che yiꞌel je xol.
20 Yuxan cꞌam che loꞌ tzetyetal eey yich,
yal cꞌal bꞌey caan jex ecꞌoj,
asan cꞌal ixim pan cꞌam yich che loꞌ,
ẍi Jehová tet naj Moisés.
21 Jix awtele ebꞌ naj syaawil conobꞌ yu naj Moisés,
jix yalon naj tet ebꞌ:
Asiꞌwej,
che sicꞌlentej junjunoj noꞌ achꞌe meꞌ,
ma noꞌ chiw yet che chiꞌon yetoj ebꞌ caan je yetoj yul je na.
Yet chi cu naꞌontej skꞌinal yet jix cu jajcha el bꞌey txꞌotxꞌ Egipto.
22 Che chaꞌwej ẍiqꞌuil noꞌ yul junoj neet palangana.
Che yiꞌontej junoj yuchan skꞌabꞌ teꞌ hisopo,
che laon eytoj xol ẍiqꞌuil noꞌ noꞌ tuꞌ,
catuꞌ che bꞌonon oc yibꞌan smarcoal stiꞌ smajil je na,
cꞌal yinlaj spacꞌul.
Cꞌam junoj jex chex eltej yul stiꞌ je na tuꞌ masantaꞌcꞌal chi sajbꞌi eloj.
23 Yutol jaꞌ yet oj ecꞌ Jehová yet akꞌbꞌalil tuꞌ,
yetoj ecꞌ smakꞌon cam ebꞌ ánima bꞌey Egipto,
catuꞌ oj yilon oc chicꞌ Naj yin stiꞌ smajil je na tuꞌ,
palan cꞌal yecꞌtoj Naj,
man oj chaꞌle octoj jun inen oc camich tuꞌ yu chi makꞌle cam ebꞌ bꞌabꞌel unin yul je na,
yu Dios.
24 Jaꞌ jun chejbꞌanile tiꞌ oj je jije cꞌal,
catuꞌ oj sjijen cꞌal ebꞌ je yicꞌaal yet bꞌakꞌin.
Jaxca junoj tzetyetal cꞌam slawubꞌal,
queytuꞌ chi yun can ey jex.
25 Jaꞌ yet oj jex apnoj oc bꞌey txꞌotxꞌ txꞌotxꞌ tol yakꞌnaj can stiꞌ Jehová yakꞌon ey jex,
sowalil tol oj je jije jun kꞌin tiꞌ.
26 Jaꞌ yet oj skꞌanlen ebꞌ je yuninal ey jex:
¿Tzet chi yal yeloc apnoj jun kꞌin tiꞌ?
ta ẍi ebꞌ.
27 Jaxa je yalon jaxca tiꞌ:
Jaꞌ jun kꞌin tiꞌ,
yu cu naꞌontej yet jix cu jajcha eltej bꞌey Egipto,
jaꞌton yet jix cam noꞌ meꞌ yin xaambꞌal tet Jehová,
yet jix makꞌle cam sbꞌabꞌel yuninal ebꞌ a Egipto.
Jaxa stiꞌlaj cu na tiꞌ,
palan cꞌal yecꞌtoj Naj.
Jaxca tuꞌ jix yute Jehová scolon el ebꞌ bꞌabꞌel unin yet jun tiempoal tuꞌ,
je chi tet ebꞌ,
ẍi naj Moisés.
Jaꞌ yet jix lawi yalon wan kꞌane tuꞌ naj,
catuꞌ jix ey noan ebꞌ Israel yin eyilal sattaj Jehová.
28 Yin eymanil,
jix swaꞌnen ebꞌ cꞌal sjijen ebꞌ jaxca jix yun yalon Jehová tet naj Moisés cꞌal tet naj Aarón.
Scamichal Ebꞌ Bꞌabꞌel Unin A Egipto
29 Jaꞌ yet chuman akꞌbꞌal,
jix ecꞌ Jehová smakꞌon cam ebꞌ bꞌabꞌel unin bꞌey Egipto.
Jix cam naj bꞌabꞌel scꞌaal naj rey Faraón,
naj tol tꞌinan yoc can sqꞌuexeloj bꞌey sdespacho,
cꞌal ebꞌ sbꞌabꞌel cꞌaal ebꞌ naj eyoc yul preso.
Jacꞌalaꞌ jaxca tuꞌ jix yute pax Dios noꞌ bꞌabꞌel yuneꞌ sjobꞌbꞌeal noꞌ ebꞌ.
30 Masanil ánima bꞌey Egipto tuꞌ,
jix a waan ebꞌ yet jun akꞌbꞌal tuꞌ.
Jix okꞌ naj rey,
yetoj cꞌal ebꞌ eyoc yin yaawilal yetoj,
cꞌal masanil ánima yul yet Egipto tuꞌ,
yutol cꞌamxa junoj na tol ma oc camich.
31 Jaꞌton yet jun akꞌbꞌal tuꞌ,
jix awtele naj Moisés yetoj Aarón yu naj rey tuꞌ,
jix yalon naj jaxca tiꞌ:
—Jaꞌ tinaniꞌ,
asiꞌ yin eymanil,
iꞌeltoj masanil ebꞌ je yet conobꞌ Israel tiꞌ,
catuꞌ chi too je yakꞌon eyilal tet Jehová jaxca je yalon tuꞌ.
32 Iꞌwejtoj masanil noꞌ je jobꞌbꞌeal noꞌ je yetoj:
Noꞌ meꞌ,
noꞌ wacax,
cꞌal noꞌ chiw,
jaxca jix je yute je yalon tuꞌ.
Asiꞌwej,
catuꞌ chex txali pax tet Jehová tuꞌ wu an,
ẍi naj rey tuꞌ.
33 Jaꞌjun ebꞌ a Egipto tuꞌ jix chejon el ebꞌ Israel tuꞌ,
yet chi el ebꞌ yin eymanil yul conobꞌ tuꞌ,
yutol jix snaꞌ ebꞌ tala chi cam ebꞌ masanil.
34 Jaxa ebꞌ Israel tuꞌ,
jix yiꞌontoj ixim jarina ebꞌ,
ixim cꞌamto chi ey yich,
tucꞌal to calbꞌil a ixim,
jix yun yiꞌontoj ebꞌ yul sneetal jix yaon oc ebꞌ yul jun kꞌap sábana,
catuꞌ jix yijontoj ebꞌ.
35 Jix sjije cꞌal ebꞌ tzet jix yal naj Moisés,
jix skꞌanon oro cꞌal plata ebꞌ Israel tuꞌ,
cꞌal pichile tet ebꞌ a Egipto tuꞌ.
36 Jaꞌ Jehová jix kꞌanabꞌ yin snaꞌbꞌal ebꞌ a Egipto tuꞌ,
watxꞌ xacꞌal jix yute snaꞌbꞌal ebꞌ yin ebꞌ.
Jix yakꞌon tzettaj yetal ebꞌ tet ebꞌ Israel tuꞌ,
jaxca tuꞌ jix yun yiꞌon ecꞌ ebꞌ Israel tuꞌ stzettaj yetal ebꞌ a Egipto.
Yet Jix El Ebꞌ Israel Bꞌey Egipto
37 Jix el ebꞌ Israel bꞌey conobꞌ Ramsés,
catuꞌ jix bꞌeytoj ebꞌ,
catuꞌ jix apni oc ebꞌ bꞌey conobꞌ Sucot.
Ey mi junoj 600,000 ebꞌ winaj tol stiempoal xa yoc yin soldadoal,
cꞌam ebꞌ ix ix cꞌal ebꞌ unin eyoc yin sbꞌisiloj.
38 Caw miman sbꞌisil noꞌ meꞌ,
noꞌ chiw,
cꞌal noꞌ wacax jix yiꞌtoj ebꞌ.
Caw ecꞌal pax ebꞌ ánima txꞌoj conobꞌal jix too yetoj ebꞌ.
39 Cꞌamxa tiempo swaꞌnentoj sloꞌbꞌe ebꞌ,
yutol yin xacꞌal eymanil jix yun yujtele el ebꞌ yu ebꞌ a Egipto tuꞌ.
Tuxa cꞌal jix swaꞌne span ebꞌ yetoj ixim jarina iꞌbꞌil oc yu ebꞌ tuꞌ,
jaꞌton ixim cꞌamto chi ey yich.
40 Jaꞌ ebꞌ Israel tuꞌ,
430 abꞌil xa scaey ecꞌ ebꞌ bꞌey Egipto tuꞌ yet jix apni oc scꞌual yeltoj ebꞌ.
41 Jaꞌ yet jun cꞌual tuꞌ jix tzꞌajna 430 abꞌil,
catuꞌ jix el ebꞌ sconobꞌ Dios tituꞌ.
42 Jaꞌ yet jun akꞌbꞌal tuꞌ,
jix mulna Jehová yet chi yiꞌon eltej ebꞌ sconobꞌ.
Yu jun tuꞌ,
sowalil chi snaꞌtej ebꞌ Israel jun tiꞌ yin junjun abꞌil,
jun akꞌbꞌal chi el sweyan ebꞌ yet chi yiꞌon ey sbꞌa ebꞌ tet Jehová.
Sleyalil Kꞌin Yet Jix Jajle El Ebꞌ Conobꞌ Israel
43 Jix yalon Jehová tet naj Moisés cꞌal tet naj Aarón:
Jain chi wal can sleyalil kꞌin yu je naꞌontej yet jix jex wiꞌon eltej bꞌey Egipto:
Cꞌam ojabꞌ junoj ebꞌ txꞌoj conobꞌal chi chiꞌon noꞌ xaambꞌal tuꞌ.
44 Jaꞌ ebꞌ je yakꞌomal servil tol manbꞌil je yu,
ta tol akꞌbꞌil circuncidar ebꞌ winaj,
chi skeꞌ ẍiꞌon ebꞌ,
yetoj ebꞌ ix je yakꞌomal servil.
45 Jal pax junoj ebꞌ txꞌoj conobꞌal eyecꞌ je xol xin,
ma tucꞌal chi sey mulna sbꞌa je xol,
cꞌam chi skeꞌ ẍiꞌon ebꞌ.
46 Asanne yul na bꞌey chi waꞌnele noꞌ chiꞌbꞌe tuꞌ,
jacꞌal tuꞌ chi skeꞌ ẍiꞌle noꞌ,
cꞌam chi skeꞌ ẍiꞌle noꞌ bꞌey junojxa txꞌoj nail,
cꞌam pax chi skeꞌ smakꞌle poꞌo sbꞌajil noꞌ.
47 Jaꞌ jun chejbꞌanile tiꞌ oj je jije je masanil jaex Israel jex tiꞌ.
48 Ta cꞌuxan ey junoj txꞌoj conobꞌal je xol,
chi yoche chi yil kꞌin,
bꞌabꞌel chi akꞌle can circuncidar ebꞌ winaj bꞌey junjun na,
jaxca tuꞌ,
chi skeꞌ snaꞌontej jun kꞌin ebꞌ tuꞌ je yetoj,
jaxca tol je yet conobꞌ chi yun can oc ebꞌ.
Jal pax junoj winaj tol man akꞌbꞌil oj circuncidar xin,
cꞌam chi skeꞌ ẍiꞌon noꞌ xaambꞌal tuꞌ ebꞌ.
49 Jaꞌ jun ley tiꞌ,
sowalil chi sjije ebꞌ ánima chi ali je xol,
cꞌal ebꞌ txꞌoj conobꞌal caan ecꞌ je xol,
ẍi Jehová.