—Oj watoj junojxa syaꞌilal yibꞌan naj rey Faraón cꞌal yibꞌan masanil conobꞌ Egipto tiꞌ.

Oj lawoj tuꞌ,

man asanne oj tol oj jex jajle el yu naj,

jaꞌcaw oj jex ujten el titiꞌ yin junelne.

2 Yu tuꞌ xin,

al tet masanil ebꞌ ja wet Israelal tiꞌ,

ebꞌ winaj cꞌal ebꞌ ix ix,

tol chi skꞌan oro cꞌal plata ebꞌ tet ebꞌ a Egipto caan scawilal junjun ebꞌ.

3 Yuxan jaꞌ Jehová jix kꞌanabꞌ yin snaꞌbꞌal ebꞌ ánima a Egipto tuꞌ,

yet chi yakꞌon swatxꞌcꞌulal ebꞌ tet ebꞌ Israel,

jacꞌalaꞌ ebꞌ naj ey yopiso yetoj naj rey,

jix yalon ebꞌ tol miman yeloc apnoj naj Moisés yul sat ebꞌ,

jaxca cꞌal tuꞌ chi yun yalon masanil ebꞌ ánima a Egipto.

4 Jaꞌ yet cꞌamto chi eltej Moisés sattaj naj rey tuꞌ,

jix yalon can naj jaxca tiꞌ:

—Jaꞌ Jehová chi alon jaxca tiꞌ:

Jaꞌ yet oj oc chuman akꞌbꞌal,

oj jin ecꞌ bꞌey masanil yul yet Egipto tiꞌ.

5 Oj ecꞌ jin makꞌ cam ebꞌ bꞌabꞌel winaj unin bꞌey yul-laj junjun nail ebꞌ a Egipto;

yetoj naj ja bꞌabꞌel cꞌaal tol tuxa wal chi oc ja qꞌuexeloj bꞌey ja despacho tiꞌ.

Oj cam pax ebꞌ sbꞌabꞌel unin ebꞌ ix ja chejabꞌ chi mulna yin chꞌen caꞌ,

catuꞌ oj cam pax noꞌ bꞌabꞌel yuneꞌ noꞌ ja jobꞌbꞌeal noꞌ.

6 Jaꞌ masanil yul yet Egipto tiꞌ,

manxa jantajoj okꞌil oj ocoj,

cꞌam tocꞌal bꞌey chi yun juneloj,

cꞌam pax bꞌakꞌin oj yun junelxa.

7 Jaxca ton tuꞌ oj yun je yotajne eloj,

tol jain ton Jehová jin,

catuꞌ oj je yotajne eloj tol ey sqꞌuexanil ebꞌ conobꞌ Israel je yintaj jaex a Egipto jex tiꞌ,

tol caw xaan ebꞌ conobꞌ Israel tiꞌ wu an,

cꞌam tzet oj iꞌon ebꞌ yetoj sjobꞌbꞌeal noꞌ,

ẍi Jehová.

8 Jaꞌ yet tuꞌ,

oj jul ebꞌ naj eyoc yin yaawilal ja wetoj jin cꞌatan,

catuꞌ oj ey xacꞌal kaan ebꞌ,

oj skꞌanon ebꞌ ey jin:

Iꞌeltoj masanil ebꞌ conobꞌ jaꞌjun ja wetoj tiꞌ,

ẍi xacꞌal ebꞌ.

Jaꞌ yet oj yunen el jun tuꞌ,

jaxa cu too xacꞌal tuꞌ jon,

ẍi naj Moisés.

Caw jow naj Moisés yet jix eltej sattaj naj rey Faraón tuꞌ.

9 Jaꞌton wan kꞌane jix yal Jehová tet Moisés yet jix yalon jaxca tiꞌ:

—Man cꞌaltaꞌ oj ẍaꞌ yabꞌ naj rey tzet oj je yalaꞌ,

yuxan ecꞌal tocꞌal tzet qꞌueyubꞌtaj yili oj el wunen bꞌey Egipto tiꞌ,

ẍi Dios.

10 Jaꞌ Moisés cꞌal Aarón jix yun masanil tzet jix al-le tet ebꞌ,

jaꞌton tzet qꞌueyubꞌtaj yili jaꞌ jix xꞌox ebꞌ sattaj naj rey Faraón tuꞌ,

jacꞌalaꞌ jix akꞌle cꞌal pax pitbꞌoj el snaꞌbꞌal naj rey yu Jehová,

ma cꞌaltaꞌ jajle el ebꞌ Israel tiꞌ yul yet Egipto tuꞌ yin eymanil.