—Asiꞌ sattaj naj rey Faraón tuꞌ,

yutol jix wakꞌ pitbꞌoj el snaꞌbꞌal yetoj ebꞌ eyoc yin yopiso yetoj,

yet watxꞌ chi yil ebꞌ masanil wipalil tol qꞌueyubꞌtaj xacꞌal chi wute.

2 Yet watxꞌ chi skeꞌ je yalon tet ebꞌ je yuninal cꞌal tet ebꞌ je yi je txiquin,

masanil tzet jix yun wetnen ebꞌ bꞌey Egipto tiꞌ,

cꞌal wanxa tol qꞌueyubꞌtaj jix wun xol ebꞌ ánima.

Jaxca tuꞌ chi yun je yotajne eloj,

tol jain ton Jehová jin.

3 Jix lawi tuꞌ xin,

jix too naj Moisés yetoj naj Aarón yilon naj rey tuꞌ junelxa,

jix yalon ebꞌ tet:

—Jaxca tiꞌ yalon Jehová cu Diosal jaon Hebreo jon tiꞌ:

¿Jantaj to wal tiempo oj ja pitne ja bꞌa,

yin tol cꞌam cha wiꞌey ja bꞌa jin sattaj?

Tol oj wal cha chaꞌtoj ebꞌ jin conobꞌ tiꞌ yet chi to oc ebꞌ yin eyilal ey jin.

4 Yutol ta cꞌam tocꞌal cha jajtoj ebꞌ jin conobꞌ tiꞌ,

jaꞌ yet yecal chi wiꞌon jul noꞌ kochiꞌ noꞌ yibꞌan ja nación tiꞌ;

5 catuꞌ oj noel masanil sat txꞌotxꞌ tiꞌ yu noꞌ.

Cꞌamxa niꞌoj txꞌotxꞌ oj txeclo aoj,

catuꞌ oj sloꞌon xacꞌaltoj jantaj to ma lawoj can el yu chꞌen sajbꞌat,

cꞌal masanil teꞌ chi yakꞌ sat oj scꞌuxcantoj noꞌ.

6 Oj noel yul ja palacio yu noꞌ,

cꞌal yul-laj sna ebꞌ eyoc yin yopiso ja wetoj,

cꞌal masanil yul-laj sna ebꞌ ánima bꞌey nación Egipto tiꞌ,

tol cꞌam cꞌal bꞌey jix yil ebꞌ je yichmam juneloj jaxca tiꞌ,

yet tax cꞌal jix jul caey ebꞌ bꞌey jun txꞌotxꞌ tiꞌ,

ẍi Jehová,

ẍi Moisés.

Jaꞌ yet jix lawi yalon Moisés wan tuꞌ,

jix meltzo eltej bꞌey yul sdespacho naj rey Faraón tuꞌ.

7 Catuꞌ jix yalon ebꞌ naj ey yopiso yetoj naj rey tuꞌ:

—¿Bꞌakꞌin oj sbꞌej jun winaj tiꞌ cu yetneni?

¿Tzet yuxan cꞌam cha jajel wan conobꞌ tiꞌ,

yet chi too ebꞌ yin eyilal tet Jehová sDiosal tuꞌ?

¿Tumi cꞌam cꞌal chi naꞌcha el niꞌoj ja wu,

ilaꞌ tuxa jix etextoj yul cu nación tiꞌ?

ẍi ebꞌ.

8 Yu tuꞌ xin,

jix awteletej Moisés yetoj Aarón yu naj rey tuꞌ:

—Asiꞌwej,

ocanwej yin eyilal tet Jehová je Diosal tuꞌ,

che yal can ey jin mactxequel jex cꞌal oj jex toj,

ẍi naj rey.

9 Jix takꞌwi Moisés:

—Cu masanil jon chi cu too jon.

Chi kiꞌtoj ebꞌ kuninal cꞌal ebꞌ icham ánima,

cꞌal ebꞌ cu cꞌaal cꞌal ebꞌ ix cu cutzꞌin jon,

cꞌal masanil cu meꞌ,

cꞌal cu wacax cꞌal noꞌ chiw,

masanil cu jobꞌbꞌeal noꞌ chi kiꞌtoj jon,

yutol caw mimej kꞌin oj kaoc jon,

yu kiꞌon a can sbꞌi Jehová cu Diosal,

ẍi Moisés.

10 Yu tuꞌ xin,

jix yalon naj rey jaxca tiꞌ:

—Caxcꞌal mi eyoc Jehová je Diosal tuꞌ je yetoj,

¿chim la je naꞌ tol oj jex jin chaꞌtoj yetoj je yistil cꞌal yetoj je yuninal tuꞌ?

Cꞌamaj,

ilaꞌ tol txꞌoj tzet che naꞌ.

11 Asanne jaex winaj jex tiꞌ,

chi too je yakꞌ eyilal bꞌey je Diosal tuꞌ;

ilaꞌ tol jaꞌ jun tuꞌ che kꞌanaꞌ,

ẍi naj.

Jix lawi tuꞌ xin,

catuꞌ jix ujtele eltej ebꞌ yu naj.

12 Catuꞌ jix yalon Jehová tet Moisés:

—Atoj ja kꞌabꞌ yibꞌan conobꞌ Egipto,

yet chi jul noꞌ kochiꞌ noꞌ yet chi jul skꞌuxontoj masanil awo jix cancan yu chꞌen sajbꞌat,

ẍi Jehová.

13 Jix yaontoj skꞌojoch naj Moisés yibꞌan Egipto,

catuꞌ jix aletej jun miman kaꞌeꞌ yu Jehová,

Jix tit bꞌey chi aol cꞌu,

jun cꞌu,

jun akꞌbꞌal jix yakꞌ jun miman kaꞌeꞌ tuꞌ,

jaxa yet junxa cꞌu,

jaꞌ jun kaꞌeꞌ tuꞌ jix iꞌontej noꞌ kochiꞌ noꞌ.

14 Masanil yul yet Egipto jix noel yu noꞌ kochiꞌ noꞌ tuꞌ.

Cꞌam tocꞌal bꞌey chi yun juneloj yet tax yalantoj,

cꞌamxa pax bꞌakꞌin oj yun junelxa jaxca tiꞌ.

15 Caw jix noel sat txꞌotxꞌ yu noꞌ,

cꞌamxa niꞌoj txꞌotxꞌ txꞌotxꞌ tuꞌ txequel.

Jaꞌ jantaj to tzet jix can yu chꞌen sajbꞌat,

jix lawi el yu noꞌ.

Cꞌamxa niꞌoj tzet yaax yili jix cancan yu noꞌ bꞌey yul yet Egipto,

masanil sat teꞌ teꞌ,

cꞌal ẍumuc teꞌ,

pilan jix lawi el masanil.

16 Yu tuꞌ xin,

yin eymanil jix awtele naj Moisés cꞌal Aarón,

yu naj rey Faraón,

jix yalon tet ebꞌ jaxca tiꞌ:

—Jix oc jin penail yul sat Jehová je Diosal,

cꞌal ey jex.

17 Chi wal ey jex,

che yakꞌ mimancꞌulal win yu jin penail,

asanxane junel tiꞌ,

che kꞌan tet Jehová je Diosal,

yet chi el jun syaꞌilal tol iꞌbꞌil oc camich yu eyecꞌ bꞌey jin nación tiꞌ,

ẍi naj.

18 Jaꞌ yet jix eltej naj Moisés yul sdespacho naj rey Faraón tuꞌ,

catuꞌ jix txali tet Jehová.

19 Jix lawi tuꞌ,

jix tit jun miman kaꞌeꞌ yu Dios,

jaꞌ bꞌey chi too cꞌu jaꞌ tituꞌ jix tit jun kaꞌeꞌ tuꞌ,

queytuꞌ jix yun stoo can noꞌ kochiꞌ noꞌ yul jaꞌ Cajin Mar,

cꞌamxa junoj noꞌ jix cancan bꞌey yul conobꞌ Egipto tuꞌ.

20 Jacꞌalaꞌ pax oj,

jix akꞌle cꞌal pax pitbꞌoj el snaꞌbꞌal naj rey Faraón tuꞌ yu Jehová,

yuxan ma jajle ebꞌ conobꞌ Israel tuꞌ yu naj.

21 Catuꞌ jix yalon Jehová tet Moisés:

—Jaꞌ tinaniꞌ xin,

iꞌa ja kꞌabꞌ yetcꞌulal satcan,

yet watxꞌ chi oc kꞌejkꞌinal bꞌey masanil yul yet Egipto tiꞌ.

Caw junelne tol kꞌej jolinaj oj yun can eloj,

ẍi Jehová.

22 Jix yiꞌon a skꞌabꞌ Moisés tuꞌ,

catuꞌ jix jul jun miman kꞌejkꞌinal yibꞌan masanil yul yet Egipto.

23 Oxebꞌ cꞌual jix kꞌejbꞌi eloj,

cꞌamxa junojxa mactxequel chi skeꞌ yil-len oc sbꞌa yetoj ebꞌ caan scawilal tuꞌ,

catuꞌ cꞌamxa chi skeꞌ yecꞌ ebꞌ,

jal pax bꞌey yul yet Gosen xin,

caw ey pax sajkꞌinal bꞌey caan ebꞌ Israel tuꞌ.

24 Yu tuꞌ xin,

jix awteletej Moisés yu naj rey Faraón,

jix yaloni:

—Chi skeꞌ je to je yakꞌon eyilal tet Jehová,

iꞌwejtoj je yistil cꞌal je yuninal;

asan xin che yakꞌ can noꞌ je wacax,

cꞌal noꞌ je meꞌ cꞌal noꞌ je chiw,

ẍi naj tet ebꞌ.

25 Jix yalon Moisés:

Chaꞌontoj yetoj masanil cu jobꞌbꞌeal noꞌ tiꞌ jon,

yutol jaꞌ noꞌ chi too kakꞌ yin cu xaambꞌaloj tet Jehová cu Diosal jon.

26 Jaꞌ masanil noꞌ cu jobꞌbꞌeal noꞌ tuꞌ jon,

oj kiꞌtoj noꞌ jon,

cꞌamxa junoj noꞌ oj cu bꞌejcanoj,

yutol jaꞌ xol noꞌ oj cu sicꞌ el noꞌ oj kakꞌ yin cu xaambꞌal tet Jehová cu Diosal jon.

Yajbꞌan cꞌamto chi cu apni oc tituꞌ jon,

cꞌamto chi naꞌcha el ku jon bꞌeytet noꞌ oj kakꞌ yin cu xaambꞌal tet Dios,

ẍi naj Moisés.

27 Jacꞌalaꞌ jix akꞌle pax pitbꞌoj el snaꞌbꞌal naj rey Faraón junelxa yu Dios,

yet cꞌam cꞌal chi jajle el ebꞌ conobꞌ Israel tuꞌ.

28 Yu tuꞌ xin,

jix yalon naj rey tet Moisés:

—Elan jin sattaj tiꞌ.

Cꞌamxa chi woche chi wil ja sat junelxa titiꞌ,

yutol ta chach jul junelxa jin sattaj tiꞌ,

jaꞌ yet jun cꞌual tuꞌ chach cam xacꞌal titiꞌ,

ẍi naj.

29 Catuꞌ jix takꞌwi naj Moisés:

—Caw yel cha walaꞌ,

cꞌamxa bꞌakꞌin oj wil yin ja sat junelxa,

ẍi Moisés.