—Asiꞌ bꞌey naj rey Faraón,

cha walon tet:

Jaxca tiꞌ yalon Jehová cu Diosal jaon Hebreo jon tiꞌ:

Jajtoj ebꞌ jin conobꞌ tiꞌ yet chi oc ebꞌ yin eyilal ey jin.

2 Ta man oj ja chaꞌtoj ebꞌ,

ta oj ja mitxꞌ cꞌal ey ebꞌ.

3 Oj tit jin jowal catuꞌ oj waontoj yaꞌbꞌil yibꞌan noꞌ ja jobꞌbꞌeal noꞌ,

oj cam masanil noꞌ yu jun yaꞌbꞌil tuꞌ,

jaꞌton noꞌ che,

noꞌ wacax,

noꞌ camello,

noꞌ bꞌuru,

cꞌal noꞌ meꞌ cꞌamxa mac oj skeꞌ yanten noꞌ.

4 Asan cꞌal noꞌ je yet jaex a Egipto jex tiꞌ oj camoj,

jal pax noꞌ yet ebꞌ conobꞌ Israel tiꞌ xin,

cꞌam junoj noꞌ oj camoj,

ẍi Jehová.

5 Jix yaoc Dios scꞌual yet chi jul syaꞌilal masanil noꞌ jobꞌbꞌeal noꞌ,

bꞌey Egipto tiꞌ.

—Yet yecal chi watoj jun syaꞌilal tuꞌ,

ẍi Dios.

6 Jaxa yet junxa cꞌual xin,

jix yaontej Jehová jun syaꞌilal yibꞌan noꞌ noꞌ.

Masanil noꞌ sjobꞌbꞌeal noꞌ ebꞌ a Egipto jix cami,

jal pax yet ebꞌ conobꞌ Israel xin,

cꞌam junoj noꞌ jix cami.

7 Yin eymanil jix too naj rey yiloni ta cꞌam noꞌ yet ebꞌ Israel tuꞌ jix cami.

Caxcꞌal mi yel cꞌam junoj noꞌ jix cami,

jix pitbꞌi cꞌal el snaꞌbꞌal naj rey tuꞌ junelxa,

ma cꞌaltaꞌ jajle el ebꞌ Israel tuꞌ yu naj.

8 Jix lawi tuꞌ xin,

jix yalon Jehová tet Moisés cꞌal tet Aarón:

—Asiꞌ,

iꞌwejtej junoj wojan stikꞌakꞌil taan yul junoj jorna,

catuꞌ oj stiẍon a Moisés sattaj jun rey Faraón tuꞌ.

9 Catuꞌ oj oc yin pojojal,

oj sajlem cantoj bꞌey masanil yul nación Egipto,

jaxa spitzcꞌu a yaax yaꞌbꞌil yin ebꞌ ánima,

cꞌal yin noꞌ noꞌ yu chꞌen stikꞌakꞌil taan tuꞌ,

ẍi Jehová.

10 Jix lawi yabꞌen Moisés yetoj Aarón tuꞌ,

jix too yiꞌontej chꞌen stikꞌakꞌil taan ebꞌ bꞌey yul jorna,

catuꞌ jix too ebꞌ sattaj naj rey.

Jaꞌ yet jix apni oc ebꞌ naj,

jix stiẍon a chꞌen stikꞌakꞌil taan naj Moisés tuꞌ,

jaxa spitzcꞌu a jun yaax yaꞌbꞌil yin ebꞌ ánima,

cꞌal yin masanil noꞌ noꞌ.

11 Jaxa ebꞌ jelan yetoj tzet cuybꞌil yu,

ma xa skeꞌ xꞌoxon sbꞌa ebꞌ sattaj Moisés,

yutol yaꞌey ebꞌ yu yaax yaꞌbꞌil tuꞌ.

12 Catuꞌ jix pitbꞌi pax el snaꞌbꞌal naj rey junelxa yu Jehová,

ma cꞌal ẍaꞌ yabꞌ tzet jix yal Moisés cꞌal Aarón,

jaxca jix yute yalon Jehová tet.

13 Jix lawi tuꞌ xin,

jix yalon Jehová tet Moisés:

—Sebꞌ chach a waan yet yecal,

catuꞌ chi too ja walon tet naj rey Faraón jaxca tiꞌ:

Tol jaꞌ Jehová cu Diosal jaon Hebreo jon tiꞌ,

chi aloni:

Jajel ebꞌ jin conobꞌ yet chi to oc ebꞌ yin eyilal ey jin.

14 Jaꞌ yet jun tiempoal tiꞌ,

oj watoj wan syaꞌilal tiꞌ ja wibꞌan cꞌal yibꞌan ebꞌ ey yopiso ja wetoj,

cꞌal yibꞌan ebꞌ ja conobꞌ,

yet watxꞌ cha wotajne eloj tol jain ton miman weloc apnoj,

catuꞌ cꞌam junojxa laan jaxca jin bꞌey yul yibꞌankꞌinal tiꞌ.

15 Ta chi yal jin cꞌul,

chi skeꞌ jin txꞌoxon wipalil ey jaach,

catuꞌ chi waon oc syaꞌilal ja wibꞌan cꞌal yibꞌan masanil ebꞌ ánima bꞌey ja nación tiꞌ,

catuꞌ chi skeꞌ je qꞌueycan el bꞌey sat txꞌotxꞌ tiꞌ.

16 Jajxa xin,

cꞌamto chach jin qꞌueycan eloj,

yutol chi woche chin txꞌox wipalil ja win,

catuꞌ eyxa smey sbꞌinale jin bꞌi bꞌey masanil yul yibꞌankꞌinal tiꞌ.

17 Caxcꞌal ecꞌal syaꞌilal chin txꞌox ja wilaꞌ,

jacꞌalaꞌ ja pitnen cꞌal ja bꞌa,

cꞌam cꞌal cha jajel ebꞌ jin conobꞌ tiꞌ.

18 Yu tuꞌ xin,

jaꞌ yet yecal yabꞌ jaxca tiꞌ,

chi waon eytej chꞌen sajbꞌat yibꞌan conobꞌ tiꞌ,

tol cꞌamto bꞌey chi yun juneloj mimej sajbꞌat jaxca junoj oj ey tiꞌ,

yet tax cꞌal jix jobꞌcha nación Egipto tiꞌ.

19 Yu tuꞌ xin,

jaꞌ masanil noꞌ jobꞌbꞌeal noꞌ,

cꞌal masanil tzet ey xol ja mulnail chi oc cantoj yul-laj pat,

yutol jaꞌ yet oj eyqꞌuey chꞌen mimej sajbꞌat tuꞌ,

masanil noꞌ noꞌ cꞌal masanil ánima tol cꞌam yenel eyocoj,

oj cam yu chꞌen sajbꞌat tuꞌ,

ẍi Jehová,

ja chi tet naj.

20 Jaxa ebꞌ naj eyoc yaawilal yetoj naj rey tuꞌ,

jix xiwa ebꞌ yet jix yabꞌen oc ebꞌ tzet jix yal Jehová.

Yu tuꞌ xin,

jix yaoc yenel sjobꞌbꞌeal noꞌ ebꞌ,

cꞌal masanil yakꞌomal servil ebꞌ,

jix oc cantoj ebꞌ yul-laj na.

21 Ey wanxa ebꞌ ma yaoc yin scꞌul tzet jix yal Dios,

ma syambꞌa oc sjobꞌbꞌeal noꞌ ebꞌ,

cꞌal ebꞌ yakꞌomal servil ebꞌ.

22 Jix lawi tuꞌ xin,

jix yalon Jehová tet Moisés:

—Iꞌa ja kꞌabꞌ satcan,

yet chi eytej mimej sajbꞌat yibꞌan masanil ebꞌ ánima,

cꞌal yibꞌan masanil noꞌ noꞌ,

cꞌal yibꞌan masanil awo ey bꞌey yul yet Egipto tiꞌ,

ẍi Dios.

23 Catuꞌ naat jix yiꞌa skꞌojoch naj Moisés,

jix ẍaꞌon oc smakꞌwa nabꞌ,

jaxa yeyqꞌuey mimej sajbꞌat bꞌey masanil yul yet Egipto,

yu Jehová.

24 Cꞌamxa chi oc tucan yeyqꞌuey chꞌen sajbꞌat,

cꞌal smakꞌwa nabꞌ,

cꞌal skoplabꞌi.

Cꞌam cꞌaltaꞌ bꞌey xax yakꞌ juneloj sajbꞌat yet yalantoj yul yet Egipto.

25 Masanil tzetyetal ey bꞌey Egipto,

jix etextoj yu chꞌen mimej sajbꞌat tuꞌ.

Jix cam ebꞌ ánima cꞌal noꞌ noꞌ ey can eltoj yinlaj na,

cꞌal masanil tzet ey xol-laj mulnail,

pilan jix lawi el yu chꞌen,

jix kꞌatoj masanil teꞌ teꞌ.

26 Asanxane yul yet txꞌotxꞌ Gosen bꞌey eyecꞌ ebꞌ conobꞌ Israel,

cꞌam junoj qꞌuetxan chꞌen sajbꞌat tuꞌ jix eyqꞌueyi.

27 Yu tuꞌ xin,

jix awtele Moisés cꞌal Aarón,

yu naj rey Faraón,

jix yaloni:

—Jix naꞌcha el wu tinaniꞌ tol jain ey jin penail yetoj ebꞌ jin conobꞌ tiꞌ.

Jaꞌ Jehová,

caw jichan chi yun swaꞌnen yeocoj.

28 Yel xacꞌal jix ecꞌ yibꞌan smakꞌwa nabꞌ,

cꞌal yeyqꞌuey mimej sajbꞌat.

Yu tuꞌ xin,

cꞌamxa chi wiꞌecꞌ je tiempo,

chi skeꞌ chex too xacꞌal bꞌey chi yal je cꞌul,

asan xin,

toloj wal chi el yin je cꞌul che yal tet Jehová tol chi yiꞌel jun syaꞌilal tiꞌ,

ẍi naj rey.

29 Jix takꞌwi naj Moisés tet naj rey:

—Asanne wal welcantoj yul conobꞌ tiꞌ,

catuꞌ chin mobꞌan jin kꞌabꞌ jin txali tet Jehová,

catuꞌ chin kꞌanon tet,

yet chi sbꞌej yeyqꞌuey chꞌen sajbꞌat tiꞌ,

catuꞌ manxa oj makꞌwa nabꞌ,

yet watxꞌ chi naꞌcha el ja wu tol yet Jehová masanil yul yibꞌankꞌinal tiꞌ.

30 Wotaj sicꞌlebꞌil,

tol jaach tiꞌ,

yetoj ebꞌ ja wet yaawil,

cꞌam je xiwcꞌulal tet Dios,

ẍi naj Moisés.

31 Jaꞌ jantaj tzet awbꞌil,

jaxca an lino cꞌal cebada,

jix etextoj masanil.

Jaꞌ ixim cebada eyxa sat,

jacꞌalaꞌ an lino eyxa xumac.

32 Jal pax ixim tiriw cꞌal ixim centeno,

cꞌam tzet jix ioni,

yutol tzunan xa chi yakꞌ sat.

33 Jaꞌ yet jix lawi skꞌanabꞌ naj Moisés yetoj naj rey tuꞌ,

jix el ebꞌ stiꞌel conobꞌ tuꞌ,

jix yiꞌon a skꞌabꞌ naj,

catuꞌ jix txali tet Dios.

Jaꞌ yet jun txolan tuꞌ,

jix oc tucan yakꞌon sajbꞌat,

cꞌal yeyqꞌuey nabꞌ,

cꞌal smakꞌwa nabꞌ.

34 Jaxa yet jix yilon naj rey tol cꞌamxa nabꞌ chi eyi,

catuꞌ cꞌamxa chꞌen sajbꞌat chi eyi,

cꞌamxa chi makꞌwa nabꞌ,

jacꞌalaꞌ jix oc pax spenail naj junelxa,

jix pitbꞌi el snaꞌbꞌal naj,

yetoj cꞌal ebꞌ eyoc yin yaawilal yetoj.

35 Ma cꞌal jajle el ebꞌ conobꞌ Israel tuꞌ yu naj,

jaxca jix yun yalon Jehová tet Moisés.