—Toloj wal taꞌ jix el yin scꞌul Dios tol jaꞌ bꞌey Egipto jix cu camtoj.

Jaꞌ tituꞌ nonaj cu xi yu chiꞌbꞌe,

catuꞌ chi cu ey chotan lowoj,

masantaꞌcꞌal chi no cu cꞌul;

tol oj taꞌ ma jon je yiꞌtej titiꞌ yet chi cu cam cu masanil yu wail bꞌey jun cusiltaj txꞌotxꞌ tiꞌ,

ẍi ebꞌ.

4 Yu tuꞌ xin,

jix yalon Jehová tet naj Moisés:

—Oj wakꞌ tit bꞌey satcan tzet oj sloꞌ ebꞌ ánima tiꞌ.

Junjun cꞌal cꞌu oj eltoj ebꞌ syambꞌa a tzet oj sloꞌ yin junjun cꞌu,

yuxan oj wilaꞌ ta tol oj sjije jin chejbꞌanil ebꞌ,

ma cꞌamaj.

5 Jaꞌ yet swaj cꞌual xin,

chi syambꞌa can yet ebꞌ chi sloꞌ yet junxa cꞌu,

yuxan ey tzet oj sloꞌ ebꞌ yet sjuj cꞌual tuꞌ,

ẍi Jehová.

6 Jix yalon naj Moisés,

cꞌal naj Aarón tet ebꞌ conobꞌ Israel:

—Jaꞌ yet jun yeycꞌualil tiꞌ,

oj je yotajne eloj tol yel jaꞌ Jehová jix jex iꞌon eltej bꞌey Egipto.

7 Jaꞌ yet skꞌinibꞌ yecal,

jatuꞌ che yil yin yipalil Dios,

yutol jix yabꞌ tzet jix yun je kꞌanabꞌ yin,

cꞌal kin jaon tiꞌ jon,

¿mac jon txequel jaon tiꞌ jon yuxan che yal cu kꞌumal jon?

ẍi ebꞌ.

8 Catuꞌ jix yalon cꞌal naj Moisés:

—Jaꞌ yet yeycꞌualil tiꞌ oj akꞌle je chiꞌbꞌe yu Jehová,

jaxa yet skꞌinibꞌ yecal,

chi yakꞌon Naj je loꞌbꞌe.

Yutol jix yabꞌ Dios je yalon pena kꞌane yin,

jix tit pax je jowal kin jon,

caxcꞌal jaꞌ kin chi tit je jowal,

jaxca tol jaꞌ yin Dios chi tit je jowal,

ẍi naj Moisés.

9 Jix lawi tuꞌ xin,

jix yalon naj Moisés tet yuẍtaj Aarón:

—Al tet masanil ebꞌ tol chi sjitztej sbꞌa ebꞌ sattaj Jehová,

yutol jaꞌ Naj jix yabꞌ tzet utbꞌil chi yute kꞌanabꞌ sbꞌa ebꞌ,

ẍi Moisés.

10 Yet lalantocꞌal wal skꞌanabꞌ naj Aarón tet ebꞌ Israel tuꞌ,

jix too tꞌanan ebꞌ bꞌey cusiltaj txꞌotxꞌ,

jix xꞌoxon a sbꞌa stzejejial Jehová xol jun miman bꞌocꞌan asun.

11 Jix yalon Jehová tet naj Moisés:

12 —Tuxa jix wabꞌoc tzet chi yute kꞌanabꞌ sbꞌa ebꞌ Israel tiꞌ win;

asan xin,

al tet ebꞌ tol jaꞌ yet skꞌejbꞌintajil tinaniꞌ oj wakꞌ ẍiꞌbꞌe ebꞌ,

jaxa yet skꞌinibꞌ yecal,

loꞌbꞌe oj wakꞌ sloꞌ ebꞌ,

masantaꞌcꞌal chi no can el scꞌul ebꞌ;

jaxca tuꞌ oj yun yotajne el ebꞌ tol jain ton Jehová jin,

je Diosal jin,

ẍi Dios.

13 Jaꞌ yet jun yeycꞌualil tuꞌ,

jix cꞌoli sjul jenenoj noꞌ tzꞌiquin chi yij ubꞌ,

pilan jix noel yinlaj bꞌey waꞌnebꞌil a bꞌulan skꞌap na ebꞌ tuꞌ,

jaxa pax yet skꞌinibꞌalil xin,

ey yal akꞌbꞌal bꞌey yinlaj bꞌey eyecꞌ ebꞌ tuꞌ.

14 Jaxa yet jix tantoj yal akꞌbꞌal tuꞌ xin,

ey wan jaxca yili chꞌen cheew jix cancan wejan bꞌey sat txꞌotxꞌ,

laan yili jaxca scꞌail ixim pan.

15 Tutun man yotaj oj ebꞌ Israel tzetyetal wan tuꞌ.

Jaꞌ yet jix yilon oc ebꞌ catuꞌ jix yal-len ebꞌ tet junjun:

¿Tzetyetal wan tiꞌ?^a

ẍi ebꞌ.

Jix yalon naj Moisés tet ebꞌ:

—Jaꞌton je loꞌbꞌe chi yakꞌ Jehová.

16 Jaꞌton jun chejbꞌanile jix yakꞌ Jehová tiꞌ,

tol chi skeꞌ je yambꞌan can jantaj che loꞌ yul junjun cꞌu,

jatacꞌalaꞌ je bꞌisil yul je na.

Iꞌwej a junjunoj echbꞌal yet junjun ánima,

ẍi naj Moisés.

17 Jaxca ton tuꞌ jix yute ebꞌ ánima tuꞌ.

Ey ebꞌ miman jix syambꞌa aoj,

ey pax mactxequel txenne jix syambꞌa aoj.

18 Jatacꞌalaꞌ yechbꞌal ebꞌ jix skꞌanaꞌ,

ma yakꞌ sobra yet ebꞌ miman jix syambꞌa a tuꞌ,

jacꞌalaꞌ cꞌuxan cꞌal jix yabꞌ pax yet ebꞌ txenne jix syambꞌa a tuꞌ,

junjun cꞌal ebꞌ jix syambꞌa yet jantaj chi sloꞌ yin junjun cꞌu.

19 Jix yalon pax naj Moisés tet ebꞌ:

—Cꞌam chi skeꞌ che cꞌubꞌan can je yet che loꞌ yet yecal.

20 Ey pax mactxequel ma sjije tzet chi yal naj Moisés,

jix scꞌubꞌa can niꞌojxa ebꞌ yet chi sloꞌon ebꞌ yet yecal yaloni,

jaꞌ wan jix syambꞌa can ebꞌ tuꞌ,

jun txolan jix oc noꞌ jaꞌ yin,

jix a sabꞌ,

caw jix tit sjowal naj Moisés yin ebꞌ ma jijeni.

21 Junjun cꞌal skꞌinibꞌalil chi syambꞌa ebꞌ jantaj chi sloꞌ yin junjun cꞌu,

jaxa yet jow yajan cꞌu chi ulitoj jantaj to chi cancan bꞌey sat txꞌotxꞌ tuꞌ.

22 Jaxa yet swaj cꞌual xin,

junjunto echbꞌal loꞌbꞌeal yet junjun ánima jix syambꞌa cantoj,

chi yal yeloc apnoj tol caabꞌcaabꞌ echbꞌal yet junjun ánima;

jaxa ebꞌ eyoc yaawil xol ebꞌ ánima tuꞌ jix bꞌet yal ebꞌ tet naj Moisés,

23 jix yalon naj tet ebꞌ:

—Jaꞌ jun tuꞌ jaꞌ Jehová jix aloni,

yutol jaꞌ yecal scꞌual xewilal.^b

Jaꞌ jun xewilal tuꞌ scꞌual yet chi iꞌle a can sbꞌi Jehová.

Jaꞌ tzet che loꞌwej yet yecal,

txicwej can tinaniꞌ,

akꞌwej can jujoj jantaj tzetyetal che kꞌan yet yecal,

catuꞌ che cꞌubꞌan can aoj,

ẍi naj tet ebꞌ.

24 Jix sjije ebꞌ ánima tzet jix yal naj Moisés,

catuꞌ jix scꞌubꞌan cantoj ebꞌ masanil tzet chi sloꞌ ebꞌ yet yecal;

ma etextoj ma cꞌal oc noꞌ jaꞌ yin.

25 Jaxa yet junxa cꞌu jix yalon naj Moisés:

—Loꞌwej je loꞌbꞌe jix je yambꞌa can yet ewi,

yutol scꞌual xewilal tinaniꞌ,

catuꞌ che jijen je yiꞌon a can sbꞌi Jehová.

Jaꞌ yet jun cꞌual tiꞌ,

cꞌam cꞌal niꞌoj tzet chi ilcha je yu bꞌey yinlaj je na tinaniꞌ.

26 Yutol asan yin wajebꞌ cꞌu yul semana chi skeꞌ je yambꞌan tzet che loꞌ;

jaxa yet sjuj cꞌual xin,

cꞌam tzet chi juli,

yutol scꞌual xewilal,

ẍi naj Moisés.

27 Ey ebꞌ jix eltoj to seyon yet sjuj cꞌual tuꞌ,

cꞌam cꞌal niꞌoj tzet jix ilcha yu ebꞌ.

28 Catuꞌ jix yalon Jehová tet naj Moisés:

—Yel xacꞌal cꞌam che jije jin chejbꞌanil cꞌal jin ley.

¿Bꞌakꞌin wal oj je jije jin chejbꞌanil cꞌal jin ley?

29 Naꞌwej sicꞌlebꞌil,

yutol jain Jehová jin chi walaꞌ,

tol sowalil che jije scꞌual xewilal.

Yuxan jaꞌ yet swaj cꞌual chi wakꞌ je loꞌbꞌe yin caabꞌ cꞌual,

jaxa yet sjuj cꞌual tuꞌ watxꞌ cꞌal je yeoc yul je na,

cꞌam mac chi eltoj seyo maná yinlaj na,

ẍi Jehová.

30 Jix xew ebꞌ ánima yet sjuj cꞌual tuꞌ.

31 Jaꞌ ebꞌ Israel tuꞌ,

maná jix yakꞌ yij sbꞌi wan sloꞌbꞌe ebꞌ jix syambꞌa a tuꞌ,

sajin yili jaxca sat teꞌ cilantro,

caw chiꞌ sloꞌi jaxca ixim wocꞌox pan tol eyoc yal awcabꞌ yin.

32 Jix lawi tuꞌ xin,

jix yalon naj Moisés tet ebꞌ Israel:

—Jix yal Jehová ey jin jaxca tiꞌ:

Cꞌubꞌawej can a junoj echbꞌal maná,

yet oj yilon ebꞌ je yuninal yet bꞌakꞌin,

oj yil ebꞌ tzet jix wakꞌ je loꞌ bꞌey txꞌotxꞌ cusiltaj txꞌotxꞌ tiꞌ,

yet jix jex wiꞌon eltej bꞌey Egipto,

ẍi Jehová,

ẍi naj Moisés.

33 Yu tuꞌ xin,

jix yalon Moisés tet naj Aarón:

—Iꞌtej junoj txꞌotxꞌ xi,

catuꞌ cha waon eytoj junoj echbꞌal maná yul jaxca jix yun yalon Dios.

Chi lawi tuꞌ xin,

cha cꞌubꞌa cantoj,

yet watxꞌ oj yil ebꞌ kicꞌaal yet bꞌakꞌin,

ẍi naj Moisés.

34 Jaxca jix yun yalon Jehová tet naj Moisés,

jaxca tuꞌ jix yute naj Aarón,

catuꞌ jix scꞌubꞌa cantoj naj bꞌey scꞌatan chꞌen chꞌen bꞌey tzꞌibꞌebꞌilcan oc jun swa kꞌane Dios yetoj ebꞌ sconobꞌ.

35 Cawinaj abꞌil jix sloꞌ maná ebꞌ Israel tuꞌ,

masantaꞌcꞌal jix apni oc ebꞌ bꞌey smoonal txꞌotxꞌ Canaán.

36 (Jaꞌ jun echbꞌal tuꞌ,

gomer sbꞌi;

ey mi nanoj yox litro jaꞌ chi ey yul,

laonebꞌ gomer yin jun efa.)