—Oj to wal ja wilaꞌ tzet oj wute naj sreyal Egipto tiꞌ,

yetoj wipalil catuꞌ oj jex sjajon eloj.

Jain oj waoc yin snaꞌbꞌal,

yet watxꞌ jaxa oj alon ey jex catuꞌ oj jex ẍejon el yul snación tiꞌ,

ẍi Jehová.

2 Jix kꞌanabꞌ pax Jehová tet naj Moisés jaxca tiꞌ:

—Jain ton Jehová jin.

3 Jin txꞌoxnaj jin bꞌa tet Abraham,

tet Isaac cꞌal tet Jacob,

Dios jin,

chi skeꞌ wu masanil.

Asan tol ma wakꞌ yotajne el ebꞌ jin bꞌi:

TOL JAIN JEHOVÁ JIN.

4 Jix jin waꞌne jun jin wa kꞌane yetoj ebꞌ,

jix wakꞌ jin tiꞌ wakꞌon txꞌotxꞌ Canaán tet ebꞌ,

jaꞌton txꞌotxꞌ bꞌey jix ecꞌle caan ebꞌ yet yalantoj.

5 Jaꞌ tinaniꞌ xin,

jix wilaꞌ tol caw chi etnele ebꞌ jin conobꞌ bꞌey Egipto tiꞌ,

caw chi etex ebꞌ yin mulnail.

Yu tuꞌ xin,

caw chin naꞌtej jun jin wa kꞌane jix wal can yetoj ebꞌ je yichmam.

6 Jaꞌ tinaniꞌ xin,

asiꞌ al tet ebꞌ ja wet Israelal,

tol jain Jehová jin chi wal jaxca tiꞌ:

Oj jex jin colel bꞌey ey jex oc yin yakꞌomaloj servil tiꞌ,

bꞌey okꞌbꞌal jex cꞌul yin mulnail bꞌey Egipto tiꞌ,

tol oj jin txꞌoxel wipalil,

catuꞌ oj waon oc mimej syaꞌilal yibꞌan ebꞌ.

Jaxca wal tuꞌ oj yun jex jin colon el yul skꞌabꞌ jun conobꞌ tiꞌ.

7 Catuꞌ oj jex wiꞌon oc jin conobꞌoj,

jaxa jex jaex tiꞌ,

je Diosal jin.

Jaxca tuꞌ oj yun je yotajne eloj,

tol jain Jehová je Diosal jin,

jain oj jex jin colcan el yul skꞌabꞌ ebꞌ naj a Egipto bꞌey ey jex oc yin syaꞌtajilal yin mulnail tiꞌ.

8 Oj jex wiꞌtoj bꞌey sat txꞌotxꞌ txꞌotxꞌ bꞌey jix wakꞌcan jin tiꞌ wakꞌon tet Abraham,

tet Isaac cꞌal tet Jacob.

Jain Jehová jin tiꞌ oj wakꞌcan txꞌotxꞌ ey jex,

tol je yet oj yun can oc txꞌotxꞌ,

ẍi Jehová,

ja chi tet ebꞌ.

9 Jaꞌ masanil tzet jix yal Dios,

jaꞌ jix yal naj Moisés tet ebꞌ conobꞌ Israel tuꞌ,

jaxa ebꞌ ánima tuꞌ cꞌam chi ẍaꞌ ebꞌ yabꞌe,

yutol caw eyoc ebꞌ yin somcꞌulal yu syaꞌtajil mulnail tuꞌ.

10 Jix lawi tuꞌ xin,

jix yalon pax Dios tet naj Moisés:

11 —Asiꞌ al tet naj rey Faraón,

tol chi jajle el ebꞌ jin conobꞌ Israel tiꞌ yu naj bꞌey Egipto tiꞌ,

ẍi Jehová.

12 Catuꞌ jix takꞌwi naj Moisés tet Jehová:

—Tol cꞌam tax wal chi ẍaꞌ yabꞌ ebꞌ conobꞌ Israel tzet chi walaꞌ,

jajxam wal naj rey,

tumi oj ẍaꞌ naj yabꞌe,

ilaꞌ tol cꞌam chi skeꞌ jin kꞌanabꞌ yin watxꞌ,

ẍi naj Moisés.

13 Yuxan jix chejletoj naj Moisés yetoj naj Aarón yu Dios,

yet chi kꞌanabꞌ yetoj ebꞌ yet Israelal,

cꞌal tet naj rey,

yutol albꞌilxa yabꞌ ebꞌ,

tol sowalil jaꞌ ebꞌ chi iꞌon eltoj ebꞌ conobꞌ tiꞌ bꞌey Egipto.

14 Jaꞌton xolilal ebꞌ yaaw yeoc yin junjun conobꞌal ebꞌ yicꞌaal Israel tiꞌ:

Rubén naj bꞌabꞌel yuninal naj Israel,

ebꞌ yuninal naj,

jaꞌton Hanoc,

Falú,

Hesrón,

yetoj Carmí.

Jaꞌ ebꞌ tiꞌ yaaw yeoc ebꞌ xol junjun tujan ebꞌ yicꞌaal Rubén tuꞌ.

15 Ebꞌ yuninal Simeón,

jaꞌton ebꞌ tiꞌ:

Jemuel,

Jamín,

Óhad,

Jaquín,

Sóhar,

yetoj Saúl yuneꞌ jun ix a Canaán;

jaꞌton ebꞌ tiꞌ yaaw yeoc ebꞌ xol junjun tujan ebꞌ yicꞌaal Simeón.

16 Jaꞌ Leví,

ey 137 abꞌil jix yilaꞌ,

jaꞌ ebꞌ yuninal jaꞌton ebꞌ tiꞌ:

Guersón,

Quehat,

cꞌal Merarí.

17 Ebꞌ scꞌaal Guersón,

jaꞌton Libní,

yetoj Simí;

caw ecꞌal yuninal ebꞌ jix ali.

18 Jaꞌ naj Quehat tuꞌ,

ey 133 abꞌil jix yilaꞌ.

Jaꞌ sbꞌi ebꞌ scꞌaal,

jaꞌton Amram,

Ishar,

Hebrón,

cꞌal Uziel.

19 Ebꞌ yuninal Merarí,

jaꞌton Mahli,

cꞌal Musí.

Jaꞌ ebꞌ tiꞌ yaaw yeoc ebꞌ xol junjun tujan ebꞌ yicꞌaal Leví,

yetoj cꞌal yuninal junjun ebꞌ.

20 Jaꞌ naj Amram tuꞌ,

jix yiꞌle sbꞌa yetoj jun ix yanabꞌ smam,

Jocabed sbꞌi ix,

jaꞌton ebꞌ tiꞌ smam xutx naj Aarón yetoj Moisés;

ey 137 abꞌil jix yil Amram tuꞌ,

catuꞌ jix cami.

21 Ebꞌ scꞌaal Ishar,

jaꞌton Coré,

Néfeg,

yetoj Zicrí.

22 Ebꞌ scꞌaal Uziel,

jaꞌton Misael,

Elsafán,

yetoj Sitrí.

23 Jal naj Aarón xin,

jix yiꞌle sbꞌa yetoj ix Eliseba,

scutzꞌin Aminadab,

yanabꞌ Nahasón,

jix lawi tuꞌ,

jix ali yuninal ebꞌ,

jaꞌton Nadab,

Abihú,

Eleazar yetoj Itamar.

24 Ebꞌ yuninal Coré,

jaꞌton Asir,

Elcaná,

yetoj Abiasaf;

jaꞌton ebꞌ yicꞌaal Coré tiꞌ.

25 Jaꞌ Eleazar scꞌaal naj Aarón,

jix yiꞌle sbꞌa yetoj ix scutzꞌin Futiel,

jaꞌton xutx Finees,

jaꞌton ebꞌ tiꞌ yaaw yeoc xol junjun tujan ebꞌ yicꞌaal Leví.

26 Jaꞌ Aarón yetoj Moisés chi bꞌina xol wan bꞌie tiꞌ,

jaꞌton tet ebꞌ tiꞌ jix yal Jehová tol jaꞌ ebꞌ chi iꞌon eltej ebꞌ Israel yul yet Egipto,

yin xolilal.

27 Jaꞌton ebꞌ jix bꞌetecꞌ kꞌanabꞌ yetoj naj sreyal Egipto,

yet chi kꞌanle jajcha el ebꞌ conobꞌ Israel.

28 Jaꞌ yet jix kꞌanabꞌ Dios tet Moisés bꞌey Egipto,

jix yaloni:

29 —Jain ton Jehová jin.

Al tet naj sreyal Egipto masanil tzet chi wal ey jaach tiꞌ,

ẍi Naj.

30 Catuꞌ jix takꞌwi Moisés jaxca tiꞌ:

—Jaach jin Diosal,

caw cꞌam chi skeꞌ jin kꞌanabꞌ yin watxꞌ,

¿tzet to wal oj yun ẍaꞌon yabꞌ naj rey tzet oj walaꞌ?

ẍi naj.