—Jaꞌ tinaniꞌ cꞌam chach oc il,

jaach chach too kꞌanabꞌ sattaj naj sreyal Egipto tuꞌ jin qꞌuexeloj,

jaxa naj ja wuẍtaj Aarón oj kꞌanabꞌ ja qꞌuexeloj.

2 Jaꞌ masanil tzet chin chej ja walaꞌ,

al tet naj ja wuẍtaj tuꞌ masanil,

jaxa naj oj kꞌanabꞌ sattaj naj rey tuꞌ,

yet chi jajcha el ebꞌ jin conobꞌ eyecꞌ yul snación.

3 Jain xa oj wakꞌ pitbꞌoj el snaꞌbꞌal naj rey tuꞌ,

yet oj stecꞌbꞌa sbꞌa,

catuꞌ ecꞌal tzetyetal qꞌueyubꞌtaj yoqui oj jin txꞌox bꞌey conobꞌ Egipto tiꞌ.

4 Jaꞌ naj rey tuꞌ,

man oj ẍaꞌ yabꞌ tzet oj je yalaꞌ,

yuxan jain oj jin txꞌox wipal yil naj rey tuꞌ,

yet oj waontej syaꞌilal yibꞌan ebꞌ a Egipto tiꞌ,

jaxca tuꞌ oj yun wiꞌon eltej jin conobꞌ Israel tiꞌ.

5 Jaꞌ yet oj jin txꞌoxon wipalil yet oj jex eltej wu bꞌey Egipto tiꞌ,

jaxca ton tuꞌ oj yun snaꞌcha el yu ebꞌ a Egipto tiꞌ,

tol jain ton Jehová jin,

ẍi Dios tet Moisés.

6 Jix sjije naj Moisés cꞌal Aarón yunen tzet jix yal Jehová.

7 Jaꞌ naj Moisés,

ey 80 abꞌil skꞌinal,

jal naj Aarón xin,

ey 83 abꞌil skꞌinal yet jix kꞌanabꞌ ebꞌ yetoj naj sreyal Egipto tuꞌ.

8 Jix yalon Jehová tet Moisés cꞌal tet Aarón jaxca tiꞌ:

9 —Ta tol chi yoche jun rey tuꞌ che txꞌox junoj milagro qꞌueyubꞌtaj yili tet naj,

cha wal tet Aarón tiꞌ,

tol chi skꞌojey skꞌojoch sat txꞌotxꞌ sattaj naj rey tuꞌ,

catuꞌ chi oc teꞌ yin labꞌail,

ẍi Dios.

10 Jix lawi tuꞌ xin,

catuꞌ jix too Moisés yetoj Aarón sattaj naj rey tuꞌ,

jix sjije ebꞌ yunen jaxca jix yun yalon Jehová tet ebꞌ:

Jaꞌ naj Aarón jix skꞌojey teꞌ skꞌojoch sattaj naj rey cꞌal sattaj masanil ebꞌ eyoc yin yaawilal yetoj naj,

yin eymanil jix oc teꞌ kꞌojoche tuꞌ yin labꞌail.

11 Jaꞌ yet jix yilon naj rey jaxca tuꞌ,

eyman jix yawtetej ebꞌ jelan snaꞌbꞌal naj,

cꞌal ebꞌ ey tzet chi skeꞌ yu,

jix swaꞌnen ebꞌ yet jaxca jix yute yet Aarón.

12 Junjun cꞌal ebꞌ jix skꞌojey skꞌojoch sat txꞌotxꞌ,

catuꞌ jix oc teꞌ yin labꞌail;

jaxa teꞌ skꞌojoch Aarón tuꞌ jix bꞌukꞌon eytoj teꞌ yet ebꞌ jelan tuꞌ chi yute yaloni.

13 Caxcꞌal jaxca tuꞌ jix yunne,

cꞌam cꞌal niꞌoj jix ẍaꞌ naj rey tuꞌ yabꞌe,

jaxca cꞌal jix yute yalon Dios.

14 Jix lawi tuꞌ xin,

jix yalon Jehová tet Moisés:

—Jix cawbꞌi el snaꞌbꞌal jun rey tuꞌ,

ma jajle el ebꞌ jin conobꞌ Israel tiꞌ yu.

15 Yet skꞌinibꞌ yecal,

chi too ja wil naj Faraón,

oj apnoj naj stiꞌ jaꞌ miman jaꞌ Nilo,

jaꞌ tituꞌ cha wechbꞌane,

catuꞌ cha wiꞌontoj teꞌ ja kꞌojoch jix oc yin labꞌail,

16 catuꞌ cha walon tet jaxca tiꞌ:

Jaꞌ Jehová cu Diosal jaon Hebreo jon tiꞌ,

jaꞌ jix jin chejontej jul walon ey jaach,

tol cha jajel ebꞌ sconobꞌ Naj,

yet watxꞌ chi too ebꞌ yin eyilal bꞌey cusiltaj txꞌotxꞌ;

jacꞌalaꞌ cꞌam cꞌal cha chaꞌ ja wabꞌe.

17 Jix yalon Jehová jaxca tiꞌ:

Oj ja wotajne eloj mac jin txequel yu tzet oj wunne.

Jaꞌ yet oj jin makꞌon sat jaꞌ jaꞌ yetoj jin kꞌojoch mitxꞌbꞌil a wu tiꞌ,

jaxa jaꞌ jaꞌ tiꞌ oj oc jaꞌ yin chicꞌal.

18 Masanil noꞌ pescado ey yul jaꞌ miman Nilo tiꞌ oj camoj,

jaxa ya sabꞌ jaꞌ jaꞌ tuꞌ;

jaxa ebꞌ a Egipto manxa oj yal scꞌul ebꞌ oj yucꞌ jaꞌ,

ja chi tet,

ẍi Dios tet naj Moisés.

19 Jix yalon pax Jehová tet Moisés:

—Al tet Aarón:

Iꞌa ja kꞌojoch,

catuꞌ cha waontoj yibꞌan masanil jaꞌ jaꞌ bꞌey yul yet Egipto tiꞌ,

cꞌal yibꞌanlaj snukꞌ jaꞌ,

cꞌal yibꞌan jaꞌ yaliẍ jaꞌ,

cꞌal yibꞌan jaꞌ paam jaꞌ,

cꞌal jantaj bꞌey chi yami jaꞌ jaꞌ bꞌey yul yet Egipto tiꞌ,

oj oc jaꞌ jaꞌ tuꞌ yin chicꞌal,

cꞌal jaꞌ eey yul-laj jolan chꞌen,

cꞌal yul-laj jucubꞌ teꞌ,

ẍi Dios.

20 Jaxca wal jix yun yalon Jehová,

queytuꞌ jix yute Moisés cꞌal Aarón.

Jix yiꞌon a teꞌ skꞌojoch naj Aarón,

catuꞌ jix smakꞌon ey naj yibꞌan jaꞌ jaꞌ sattaj naj rey cꞌal sattaj masanil ebꞌ naj eyoc yin yaawilal yetoj.

Yet cꞌal jun txolan tuꞌ jix oc jaꞌ yin chicꞌal.

21 Masanil noꞌ pescado ey yul jaꞌ miman jaꞌ tuꞌ jix cami,

catuꞌ jix a sabꞌ jaꞌ,

ma xa skeꞌ yuqꞌuen ebꞌ a Egipto tuꞌ.

Masanil jaꞌ jaꞌ ey tituꞌ,

chicꞌ xacꞌal jix yun can el jaꞌ.

22 Quey cꞌal pax tuꞌ jix yute ebꞌ naj jelan snaꞌbꞌal ey yul yet Egipto yu tzet cuybꞌil yu.

Queytuꞌ jix yun spitnen pax sbꞌa naj rey junelxa yin tzet jix yal naj Moisés cꞌal Aarón jaxca jix yute yalon Jehová.

23 Cꞌam cꞌal niꞌoj yeloc apnoj yul sat naj rey tuꞌ,

catuꞌ jix meltzo octoj yul sdespacho.

24 Jaꞌ masanil ebꞌ ánima bꞌey Egipto,

jix swaꞌne ebꞌ yucꞌbꞌal jaꞌ bꞌey stiꞌlaj jaꞌ jaꞌ tuꞌ,

yutol masanil jaꞌ jaꞌ tuꞌ cꞌamxa chi skeꞌ yucꞌle jaꞌ.

25 Yet jujebꞌxa cꞌual yetextoj jaꞌ miman jaꞌ Nilo yu Jehová.