Jix Kꞌanabꞌ Moisés Cꞌal Naj Aarón Yetoj Naj Rey Faraón
5
Yet jix lawi skꞌanabꞌ ebꞌ xol ebꞌ conobꞌ Israel tuꞌ,
jix too naj Moisés yetoj naj Aarón kꞌanabꞌ sattaj naj sreyal Egipto,
jix yalon ebꞌ tet naj jaxca tiꞌ:
—Jaxca tiꞌ yalon Jehová cu Diosal jaon Israel jon tiꞌ:
Tol cha chaꞌtoj ebꞌ jin conobꞌ tiꞌ bꞌey cusiltaj txꞌotxꞌ yet chi yiꞌon a can jin bꞌi ebꞌ yetoj junoj kꞌin,
ẍi Dios,
ẍi ebꞌ naj.
2 Jix takꞌwi naj rey tet ebꞌ jaxca tiꞌ:
—¿Mactxequel jun Dios che yal tuꞌ?
yet watxꞌ chin jijen tzet chi yalaꞌ,
catuꞌ chin chaꞌontoj ebꞌ conobꞌ Israel tiꞌ.
Man wotaj oj jun Dios che yal tuꞌ,
cꞌam chi skeꞌ jin chaꞌontoj ebꞌ,
ẍi naj rey tuꞌ.
3 Jix yalon pax ebꞌ tet naj jaxca tiꞌ:
—Jaꞌ cu Diosal jaon Israel tiꞌ jon,
jix xꞌox sbꞌa ey jon,
yuxan chi kal ey jaach tol chon ja chaꞌtoj bꞌey txꞌotxꞌ cusiltaj txꞌotxꞌ yet chi too kakꞌon cu xaambꞌal tet Jehová cu Diosal tuꞌ jon,
ey oxebꞌ cꞌual stecꞌbꞌanil bꞌey oj cu toj tuꞌ jon.
Ta cꞌam chi cu too jon,
jaxa tala chi yunne chi cu yakꞌ cam Naj yu junoj syaꞌilal,
ma yu jowal,
ẍi ebꞌ tet naj rey.
4 Catuꞌ jix yalon naj rey tet ebꞌ jaxca tiꞌ:
—Jaach Moisés yetoj jaach Aarón,
¿tzet yuxan che yiꞌecꞌ stiempo wan je yet conobꞌ tiꞌ yin smulnail?
Asiꞌwej mulnail.
5 ¿Tumi cꞌam che yilaꞌ tol ecꞌal ebꞌ je yet conobꞌ eyecꞌ yul conobꞌ Egipto tiꞌ?
Caw tucꞌal che yiꞌecꞌ stiempo ebꞌ naj yin smulnail,
ẍi naj rey tuꞌ.
6 Jaꞌton yet jun cꞌual tuꞌ,
jix yakꞌon naj rey Faraón jun ley tet ebꞌ a Egipto,
ebꞌ syaawil ebꞌ ilom mulnail tuꞌ,
jix yalon naj tet ebꞌ jaxca tiꞌ:
7 —Cꞌamxa che yakꞌ an chꞌim scaloj stzokꞌom ebꞌ naj Israel tuꞌ,
jaxca cꞌaltaꞌ che yunne,
jaxa cꞌal oc ebꞌ naj oj toj seyontej yet.
8 Catuꞌ jacꞌalaꞌ sbꞌisil txꞌotxꞌ xaan chi swaꞌne ebꞌ naj jaxca cꞌal yet yalantoj.
¡Cꞌam ojabꞌ junojxa man tzꞌajanoj!
Isail mi chi iꞌon ebꞌ naj,
yuxan txꞌojwal chi el yaw ebꞌ naj,
chi yal ebꞌ naj tol chi too kakꞌ cu xaambꞌal tet cu Diosal,
ẍi ebꞌ.
9 Akꞌwej mulna ebꞌ naj sicꞌlebꞌil,
yet watxꞌ cꞌamxa scolanil ebꞌ naj yabꞌen jun lekꞌtiꞌal kꞌane chi yal naj Moisés yetoj naj Aarón tuꞌ,
ẍi naj rey.
10 Yu tuꞌ xin,
jix too ebꞌ naj syaawil ebꞌ ilom mulnail tuꞌ yalon xol ebꞌ Israel tuꞌ,
jix yalon ebꞌ tet ebꞌ mulnawom tuꞌ jaxca tiꞌ:
—Jix yal naj rey tol manxa oj akꞌle je chꞌim che yaoc xol je stzokꞌom.
11 Jaꞌ tinaniꞌ,
junne xa oj toj je sey je chꞌim che kꞌanaꞌ,
catuꞌ jacꞌalaꞌ pax sbꞌisil txꞌotxꞌ xaan oj je waꞌne,
ẍi ebꞌ naj tet ebꞌ.
12 Jix lawi tuꞌ,
sajleminaj stoo ebꞌ naj Israel bꞌey masanil yul yet Egipto seyon yajan tiriw yet chi skꞌanon ebꞌ naj sqꞌuexeloj an chꞌim tuꞌ.
13 Jix yalon ebꞌ naj syaawil ilom mulnail tuꞌ:
¡Che lawej ocoj!
Junjun cꞌal cꞌu che yakꞌwej tzꞌajna txꞌotxꞌ xaan,
jaxca cꞌaltaꞌ yet chi akꞌle an chꞌim ey jex.
14 Jaꞌ ebꞌ Israel eyoc yilomaloj mulnail tuꞌ,
caw chi makꞌle ebꞌ naj yu ebꞌ a Egipto eyoc yin yopiso yu naj rey tuꞌ,
chi yalon ebꞌ naj tet ebꞌ jaxca tiꞌ:
—¿Tzet yuxan man tzꞌajanoj che yiꞌtej txꞌotxꞌ xaan yet ewi,
cꞌal tinaniꞌ jaxca cꞌaltaꞌ che yute je yiꞌontej yet yalantoj?
ẍi ebꞌ yaaw tuꞌ.
15 Jaꞌ ebꞌ Israel eyoc yibꞌan yilon mulnail tuꞌ,
jix too ebꞌ yalon sbꞌa tet naj jaxca tiꞌ:
—¿Tzet yuxan caw chi cu etnele jaon ja chejabꞌ jon tiꞌ jaach rey?
16 Ilaꞌ tol cꞌamxa chi akꞌle an chꞌim ey jon,
yet chi kaon oc an xol txꞌotxꞌ xaan chi cu waꞌne jon,
tol abꞌ tzꞌajan pax chi cu waꞌne txꞌotxꞌ jaxca yet yalantoj,
catuꞌ chi cu makꞌle pax jon;
tumi jaon ey cu penail jon,
ẍi ebꞌ.
17 Jix takꞌwi naj rey tet ebꞌ jaxca tiꞌ:
—Jaex tiꞌ,
isail chex ioni,
yuxan che yalaꞌ:
Tol chi too kakꞌ cu xaambꞌal tet Jehová,
je chi.
18 Asiꞌwej mulnail,
caxcꞌal jaex che sey an chꞌim che yaoc xol txꞌotxꞌ xaan tuꞌ,
asan tol jacꞌalaꞌ sbꞌisil txꞌotxꞌ che waꞌne,
ẍi naj rey tuꞌ tet ebꞌ.
19 Yu tuꞌ xin,
jaꞌ ebꞌ naj Israel eyoc yilomaloj mulnail tuꞌ,
caw jix tac scꞌul ebꞌ naj,
yutol jix al-le tet ebꞌ naj,
tol jacꞌalaꞌ sbꞌisil txꞌotxꞌ xaan chi swaꞌne ebꞌ naj junjun cꞌu.
20 Jaꞌ yet jix eltej ebꞌ naj yul sdespacho naj rey tuꞌ,
jix ẍaꞌlen sbꞌa ebꞌ naj yetoj Moisés cꞌal naj Aarón,
lalan yechbꞌanele ebꞌ yu ebꞌ naj.
21 Jix yalon ebꞌ naj jaxca tiꞌ:
—Ojxam yil Dios tzet oj jex yute,
yutol jaex ey je penail,
yutol jaꞌ naj rey cꞌal ebꞌ eyoc yaawilal yetoj,
caw cꞌam chi cu yoche ebꞌ tinaniꞌ.
Tol abꞌ jaex jix je yakꞌ chꞌen espada tet ebꞌ naj yet chi cu smakꞌon cam ebꞌ,
ẍi ebꞌ.
Jix Txali Naj Moisés
22 Jix lawi tuꞌ xin,
jix txali naj Moisés tet Dios: