—Man oj ẍaꞌ yabꞌ ebꞌ ey jin an,

¿tumi oj sjije ebꞌ tzet oj walaꞌ?

Tejan oj yal ebꞌ jaxca tiꞌ:

¿Yel mi wal tol jix xꞌox sbꞌa Dios tuꞌ ey jaach,

ma cꞌamaj?

ẍi mi ebꞌ ey jin an.

2 —Catuꞌ jix skꞌanlen Dios tet naj jaxca tiꞌ:

¿Tzetyetal jun eyoc yul ja kꞌabꞌ tuꞌ?

ẍi Dios tet Moisés.

—Jaꞌ jin kꞌojoch,

ẍi Moisés.

3 —Kꞌojey teꞌ ja kꞌojoch tuꞌ sat txꞌotxꞌ tinaniꞌ,

ẍi Dios.

Catuꞌ jix skꞌojon ey teꞌ skꞌojoch tuꞌ sat txꞌotxꞌ,

eyman jix oc teꞌ yin labꞌail.

Jaxa yet jix yilon jaxca tuꞌ,

eyman jix el jininoj naj.

4 Jix yalon Dios tet naj jaxca tiꞌ:

—Tinaniꞌ aoc ja kꞌabꞌ yin sne noꞌ catuꞌ cha mitxꞌon a noꞌ labꞌa tuꞌ,

ẍi Dios.

Jix smitxꞌon a sne noꞌ labꞌa tuꞌ naj,

jix oc pax teꞌ yin kꞌojocheal junelxa.

5 Jix yalon Jehová tet naj jaxca tiꞌ:

—Jaꞌ yu tzet jix a wil tiꞌ,

yuxan oj yaoc ebꞌ conobꞌ yin scꞌul tol jix jin txꞌox jin bꞌa ey jaach,

jain ton Jehová ja Diosal jin,

sDiosal jin pax ebꞌ je mam icham,

jaꞌton Abraham,

Isaac,

cꞌal Jacob,

ẍi Dios.

6 Jix yalon cꞌal Dios tet naj jaxca tiꞌ:

—Jaꞌ tinaniꞌ,

aoc ja kꞌabꞌ xam ja cꞌul.

Catuꞌ jix yaon oc skꞌabꞌ Moisés xaamscꞌul,

jaxa yet jix yiꞌon el skꞌabꞌ tuꞌ,

eyxa oc jun yaꞌbꞌil chi yij lepra* yin,

tuxa cꞌal saj wejinaj yili.

7 Jix yalon Dios tet naj junelxa:

—Aoc ja kꞌabꞌ xam ja cꞌul tuꞌ junelxa.

Catuꞌ jix yaon pax oc skꞌabꞌ Moisés tuꞌ xaamscꞌul junelxa,

jaxa yet jix yiꞌon el skꞌabꞌ tuꞌ,

caw watxꞌ xacꞌal masanil smimanil tuꞌ.

8 Catuꞌ jix yalon Dios jaxca tiꞌ:

—Ta cꞌam chi yaoc ebꞌ ánima tuꞌ yin scꞌul tzet cha walaꞌ,

yu jun bꞌabꞌel milagro* qꞌueyubꞌtaj yili jix jin txꞌox ey jaach tiꞌ,

jaxa yu jun yet scaabꞌ milagro* qꞌueyubꞌtaj yili jix jin txꞌox ey jaach tiꞌ,

oj yaoc ebꞌ yin scꞌul.

9 Ta jaꞌ yet tuꞌ,

cꞌam cꞌal chi yaoc ebꞌ ánima yin scꞌul yu caabꞌ milagro* tiꞌ,

chi too ja wiꞌatej niꞌoj jaꞌ jaꞌ yul jaꞌ miman Nilo,

catuꞌ cha secon ey jaꞌ sat txꞌotxꞌ,

jaꞌ yet cha secon ey jaꞌ sat txꞌotxꞌ tiꞌ,

catuꞌ chi oc jaꞌ yin chicꞌal,

ẍi Dios.

10 Jix lawi tuꞌ,

jix yalon Moisés jaxca tiꞌ tet Dios:

—¡Ay,

jaach Waawil!

toloj wal man jain oj chin ja chejtoj,

yutol caw cꞌam chi skeꞌ jin kꞌanabꞌi;

manaj to yet cha walon ey jin tiꞌ catuꞌ chi waloni,

yutol chi kꞌabꞌkꞌon jin tiꞌ,

yet tax cꞌal jix jin titoc yin jin yaliẍal,

ẍi Moisés.

11 Jix takꞌwi Dios,

jix yalon jaxca tiꞌ:

—¿Mac yu,

yuxan chi skeꞌ skꞌanabꞌ ebꞌ ánima cha naꞌ?

Jain jix walaꞌ,

yuxan chi skeꞌ skꞌanabꞌ ebꞌ ánima,

jain jix walaꞌ,

yuxan ey ebꞌ chacan,

ey ebꞌ cꞌam chi skeꞌ skꞌanabꞌi,

ey ebꞌ cꞌam chi skeꞌ yilwani.

¿Tumi man jain oj Jehová jin jix jin waꞌne ebꞌ cha naꞌ?

12 Yu tuꞌ xin,

asiꞌ,

jain oj jin oc cꞌal ja wetoj yet oj jaach kꞌanabꞌoj,

jain oj wal tzet oj ja walaꞌ,

ẍi Dios.

13 Jix takꞌwi Moisés,

jix yaloni jaxca tiꞌ:

—¡Ay,

jaach jin Diosal!

Chi wal ey jaach an tol cꞌam chin ja chejtoj,

watxꞌ tol cha sey junojxa mactxequel chi toi,

ẍi naj.

14 Yu jun tuꞌ,

jix tit sjowal Jehová yin Moisés,

jix yaloni:

—¿Tumi man wotaj oj naj ja wuẍtaj Aarón,

naj Levita?

Wotaj tol caw jelan skꞌanabꞌ naj.

Oj tit naj jaach ẍaꞌ yet tuxa chach apni oc bꞌey Egipto,

caw oj tzala a naj yet oj yilon naj ja wapni ocoj.

15 Kꞌanabꞌan yetoj naj,

catuꞌ cha walon tet tzet oj yute kꞌanabꞌ sbꞌa.

Jain xa oj wal ey jex yet lalan je kꞌanabꞌ tuꞌ,

catuꞌ oj wakꞌon je naꞌbꞌal yin masanil tzet oj je yunne.

16 Jaach chach kꞌanabꞌ tet Aarón jin qꞌuexeloj an,

jaxca tol jain chin kꞌanabꞌ tet,

jaxa Aarón tuꞌ oj kꞌanabꞌ tet ebꞌ conobꞌ ja qꞌuexeloj.

17 Iꞌtoj ja kꞌojoch tuꞌ yutol jaꞌ oj ja wakꞌbꞌalne yet oj ja txꞌoxon wan milagro* qꞌueyubꞌtaj yili jix jin txꞌox ey jaach,

ẍi Dios tet Moisés.

18 Jaꞌ yet jix meltzo naj Moisés bꞌey sna sniꞌ,

jaꞌton naj Jetró,

jix yalon naj jaxca tiꞌ:

—Sowalil oj jin meltzo bꞌey Egipto,

yet chi too wilon ebꞌ wet conobꞌ ta iquisto ecꞌ ebꞌ,

ẍi Moisés.

—Asiꞌ xin,

cha teyne cꞌal ja bꞌa yul-laj bꞌe,

ẍi naj Jetró tuꞌ.

19 Jaꞌ yet eyto ecꞌ naj Moisés bꞌey yul yet Madián,

jix yalon Jehová tet jaxca tiꞌ:

—Asiꞌ bꞌey Egipto,

cꞌam chach xiw ja toi,

yutol jaꞌ ebꞌ ian jix jaach makꞌon camoj,

camnajxa ebꞌ,

ẍi Dios.

20 Jix lawi tuꞌ,

jix yiꞌontoj yistil naj Moisés cꞌal ebꞌ yuninal yetoj,

jix yaon atoj ebꞌ yibꞌan noꞌ bꞌuru,

jix too ebꞌ bꞌey Egipto.

Iꞌbꞌil oc teꞌ skꞌojoch naj tuꞌ yu,

jaꞌton teꞌ jix yal Dios tol oj skꞌanbꞌalne naj yin yopiso.

21 Catuꞌ jix yalon Jehová tet naj:

—Jaꞌ yet oj jaach apnoj oc bꞌey Egipto tuꞌ,

naꞌan cꞌal ja wu,

yetoj jaach apnoj sattaj naj rey,

tol oj ja txꞌox wan milagro* qꞌueyubꞌtaj xacꞌal yili sattaj naj,

wan jix jin txꞌox ey jaach.

Jain oj wakꞌ pitbꞌoj el snaꞌbꞌal naj rey tuꞌ,

yet man oj jex chaꞌle el yu bꞌey conobꞌ tuꞌ.

22 Chi lawi tuꞌ,

catuꞌ cha walon tet naj rey tuꞌ.

Tol jain Jehová jin chi wal jaxca tiꞌ:

Caw ey jin camcꞌulal yin jin conobꞌ Israel tiꞌ,

jaxca wal tol jin bꞌabꞌel unin yeoc ebꞌ.

23 Yu jun tuꞌ,

chi wal ey jaach an,

tol cha chaꞌtoj ebꞌ wuninal tiꞌ,

yet chi oc ebꞌ yin eyilal ey jin.

Yutol cꞌam cha woche chi too ebꞌ,

yuxan oj jin makꞌ cam naj ja bꞌabꞌel cꞌaal,

ẍi Jehová,

ja chi tet naj rey tuꞌ.

24 Jix lawi tuꞌ xin,

catuꞌ jix too naj Moisés bꞌey Egipto,

jaxa yul-laj bꞌe bꞌey jix wey naj Moisés yetoj ebꞌ yuninal,

jaꞌ tituꞌ jix xꞌox sbꞌa Jehová tet.

Jaꞌ tituꞌ ian wal jix makꞌle cam naj yu Dios.

25 Yin xacꞌal eymanil jix yiꞌon eltej jun snawax ix Séfora,

catuꞌ jix kꞌuple el stzꞌuumal sjolom swinajil naj unin tuꞌ yu ix,

catuꞌ jix ẍilon oc ix yin yajan naj Moisés tuꞌ,

jix yalon ix jaxca tiꞌ:

Yutol wichamil jaach an,

yuxan ey walon wet yin jun chicꞌ tiꞌ,

ẍi ix.

26 Jaxca tuꞌ jix yun yalon ix yu jun circuncisión* tuꞌ.

Yu jun tuꞌ,

yuxan ma xa makꞌle cam naj Moisés yu Dios.

27 Jix yalon Jehová tet naj Aarón jaxca tiꞌ:

Asiꞌ,

ani chaꞌ naj ja wuẍtaj Moisés bꞌey cusiltaj txꞌotxꞌ.

Yuxan jix too naj Aarón tuꞌ ẍaꞌ jun yuẍtaj tuꞌ bꞌey cusiltaj txꞌotxꞌ,

jaꞌton bꞌey jun wonan jix xꞌox sbꞌa Dios tet.

Jaꞌ yet jix ẍaꞌlen sbꞌa ebꞌ naj,

jix yakꞌlen scawil scꞌul ebꞌ yin stzꞌubꞌon el stiꞌ ebꞌ.

28 Jix lawi tuꞌ xin,

jix oc ian naj Moisés yalon tet naj Aarón masanil tzet jix al-le tet naj yu Jehová,

cꞌal yetoj wan milagro qꞌueyubꞌtaj yili jix akꞌle yun naj yu Dios.

29 Jix lawi tuꞌ,

jix too ebꞌ scawanil,

catuꞌ jix yambꞌale oc ebꞌ naj icham winaj yeoc yul conobꞌ Israel bꞌey Egipto yu ebꞌ.

30 Catuꞌ jix oc ian naj Aarón yalon tet ebꞌ masanil tzet jix yal Jehová tet naj Moisés,

catuꞌ jix xꞌoxon pax wan milagro qꞌueyubꞌtaj yili sattaj ebꞌ conobꞌ tuꞌ.

31 Jaꞌ yet jix yabꞌen ebꞌ conobꞌ tuꞌ tzet jix yal ebꞌ cawan tuꞌ,

jix yaoc ebꞌ ánima tuꞌ yin scꞌul,

yet jix yabꞌen ebꞌ,

tol jix naꞌletej ebꞌ yu Jehová,

yutol caw okꞌbꞌalcꞌule chi utele ebꞌ bꞌey eyecꞌ ebꞌ tuꞌ,

yuxan jix ey noan ebꞌ yin eyilal sattaj Dios.