Kiŋaŋ qaqa jaŋere dâŋ
6
Kiŋaŋ qaqa juŋgopieŋ jaŋe sasawa bomboŋfâc‐jeŋic sâsec‐jopahuc rume‐jarenʒepieŋ, Anuture ʒâŋe biŋe babawaha â miti susure fuazacte iŋuc enʒepieŋ.* 2 Erâ bomboŋfâc‐jeŋic gâcne opâ ruac jaŋe ine ʒiŋuc mi muhuc bawahac‐jopanʒepieŋ: “Mitio sâcnâŋec mocjaha eŋgopeneŋ.” Aricne, “bomboŋfâc‐nâŋec jaŋe Wofuŋ manasiŋkepie âgo jauŋ ejareekacte ehâmo‐nâreeŋgopieŋ”, iŋuc muhuc kiŋaŋ maŋafec jaha qajarepie sâckeocmu. Go dâŋ i jaza mutâc ehuc faŋ qajarezemec.* Moneŋ mafare andac mi ezo
3 Moc e dâŋ i âke sipurâ moc muhuc Wofuŋ‐nâŋec Jesu Kristo ere dâŋbiaŋ qikiŋnehuc miti hatare sâcmutâc râpeckeekac ere ʒiŋuc muzo:* 4 E maŋgâc erâ sahac‐ticne bafehuc dâŋ giŋkeme giŋ baʒihuc muraocmu, izi sasec‐ticne eocmu hâcne. Eme irec iiŋguuŋ, hehefaric, mumusoriŋ, qoqoric, 5 erâ wâc mu qaqatarac hati fuaekac. Ŋic iŋucne jaŋe maŋjeŋic sifuckerâ mamana‐jeŋic ʒikeme, moneŋ mafa fua‐nârezejec muhuc miti bajuniŋte mueŋgopieŋ.* 6 Miti babajuzi jâmbomac sahacte dope bâbâfua‐nârene, mocjaha mukâroŋ tâmiric bajunʒepeneŋ.* 7 Ʒiŋuc manasunʒepeneŋ: Fuanaŋte mâreŋko metariŋ warembeŋ, juku hâmonaŋte iŋuc jaha metariŋ jaha ranaŋmu.* 8 Eme irec hâcne nânâ wiac â ŋaqi qoruc fonâreme manapene sâckeha junʒepeneŋ.* 9 Moneŋ mafa sâko qâhâckezo muniŋmu, jaŋe eesâicte wiwiticko feniŋmu, erâ wiac omane fuŋne fuŋnere sasec bâfuarâ mana utuckehuc sipirickeniŋmu.* 10 Moneŋ mafare andaczi sâqocne gâcnere jâcne hâcne. Ŋic tucnezi irec harac ehuc miti hata qâsorierâ buʒâic sâko bâfuambiŋ.*
Juju sanaŋte heʒakiezo
11 Anuture ŋic go wiac iŋucne geŋkezemec. Ehuc tiŋke biaŋ erâ mitihec â mamanasiŋhec â maŋjauŋhec â sasanaŋhec â buuruchec ecmurâ irec fotac qatariezemec.* 12 Erâ mamanasiŋte juju gie biaŋ bazemec. Baku juju sanaŋte heʒakiezemec. Go irec hâcne hefârecgukicne, erâ go gahac iŋuc ecmurâ ŋic tutumaŋko mupaŋketec manambiŋ.* 13 Anutu wiac sasawa juju bâfua‐jareekac ere maio â Jesu Kristo kia Pilatorao mumupaŋ fârine muwec ere maio musanaŋke‐garekopac:* 14 Go sâcmutâc dâŋ mugarekicne i bâbâsifuc tâmiric â bâbâbiene tâmiric reŋkehuc juhaŋte Wofuŋ‐nâŋec Jesu Kristo fisizejec. 15 Irec dameŋ maickeme juju aŋac â tâpiri buc focneekac Anutu hâcne, eki motâc rome fua taniŋkeocmu. E ŋicwofuŋ jaŋere Wofuŋ Sâko â fekicne jaŋere Fekicne.* 16 E bucticne hâhâmo tâmiriczi, tatamac moczi moc mi raraʒine irec maŋnao juekac. E ŋic moczi moc mi honekicne erâ mi honezo. Mumumbiaŋ â tâpiri focneweczi focnehuc juocmu sanaŋ. Jâmbomac.*
Hobeteŋne fofo sanaŋ bâfuazo
17 Ŋic mâreŋte moneŋ mafa ɋâfoŋne fojarekac jaŋe jazatec sahac‐jeŋic mi bafehuc wiac sisirowenere manapie izi hobeteŋne‐jeŋic eme ira mi âtesiŋnenʒepieŋ. Anutu e mâriri bâfua‐nâreme nâ bac ehuc jueŋgopeneŋ erao âtesiŋnenʒepieŋ.* 18 Erâ mujaretec buafec â bokifac erâ eehâmo gie bahuc mitire fârine bocjaha bâfuanʒepieŋ. 19 Ehuc hobeteŋne‐jeŋic moc fofo sanaŋ i bâfuarâ juju fârine rauckenʒepieŋ.*
Timoteore uŋsawaŋ dâŋ