Tesalonike ŋic jaŋere papia II i Paulozi Korinti haeoa juhuc qâreŋkewec. Papia namba 1 qâreŋke‐jarerâ râeme rame mi ʒorahame Paulozi jaŋeraonec dâŋ biŋe kecʒiŋuc manawec: Tesalonike haeonec miti ŋic ŋokac jaŋe harierâ ʒârâ hâriŋ faio fembiŋ juŋgopieŋ (gaŋ 1:5–10). Erâ moc ʒiŋuc manawec: Papia mârâcko râepe rawec, izi wiac bâtâcne bâtimuŋ sâcne mi efârewec. Aricne, Jesu fifisi‐ticnere mumusifuc bâfuarâ Paulorao âke hotahuc ʒiŋuc mumbiŋ: Dâŋ iŋuc mume warekac, dâŋ iŋuc qâreŋkeme warekac (gaŋ 2:2). Â gâcnezi ʒiŋuc mumbiŋ: Wofuŋ e biac warerâ hetarac‐nâpowec (2:1–3). Dâŋ i â gâcne fuame ŋic tucne jaŋe gie qikiŋnerâ sisi hâhâŋ jumbiŋ (gaŋ 3:10-12).

Paulo e dâŋ iŋuc manarâ papia mocwâc qâreŋke‐jarewec. Ehuc mitire erâ ʒâic fârohec juipiehuc mi dockembiŋ, irec bubiaŋ dâŋ qâreŋke‐jarewec (1:3–4), erâ Wofuŋzi juku okacne sâckoa bazu‐nâreocmu, irec fuŋne wâc mujaŋgeŋkewec (gaŋ 1:5–10). Erâ mumusifuc â qac qâsoric wiac fuawec, irec fuŋne kecʒiŋuc mu rituc ewec: Wofuŋ e acmâc jaha mi fisiocmu, â ŋic sindaŋnezi fua tâcnerâ eeatuc hâhâwicne bâfuaocmu (gaŋ 2:1-12). Wiac iŋucne mi fuahame Jesure dameŋ maickekac mi muzo. Iŋuc qâreŋkerâ miti paŋʒâic bajuhuc irec fârine maŋkopec â sahackopec bâfuaniŋte faŋ qajarewec (gaŋ 2:13 â gaŋ 3:18).