Paulo e Roma haeo mecne kâpâcwâruo ŋehuc papia i qâreŋkewec. Mârâc kâpâcwâru bapie ŋewec dameŋ ira mâcne, ʒâhec mocwâc rorâ Roma haeo bararâ kâpâcwâru bapie ŋewec, dameŋ ira papia namba 2 qâreŋkewec. Mârâcko Roma haeo momori moczi soŋaŋkehame fic omanao ŋewec. Ŋehame ŋic jaŋe iqickezo murâ sâcne iqickembiŋ. Ʒâhec ine kâpâcwâru fic jâmbâŋko râepie ŋehame Onesiforozi basaku jaha bâfuawec (gaŋ 1:15–17). Motecfâcne gâcne jaŋe mamac‐jeŋic behe‐fârembiŋ, Luka e mocjahazi ehec juwec (gaŋ 4:10-11). Kiazi Paulo dâŋte hefâreme ŋic moczi Paulore riŋ rorâ dâŋ mumu i aricne (gaŋ 4:16). Eme irec Timoteore ecneme ʒiŋuc qâreŋkewec: Go ŋeŋe ʒeʒepec boc mi ehuc biac norao warezemec (gaŋ 4:9 erâ 21). Erâ Mareko jowame mâmâc erao ranicte muwec (gaŋ 4:11).

Timoteozi biac ra fisirâ honeocmu me mâcne, irec maŋjahec erâ papia qâreŋkecnewec. Timoteo e Efeso haeoa huhame râecnewec. Ira mitire mumusifuc dâŋ boc haŋ bawec. Eme Timoteozi hehâmoocte giene bame ŋic gâcne jaŋe râsi boc ecnepie ʒâic busâqocko juhuc maŋne betaŋkezo ewec. Irec Paulozi ʒiŋuc qâreŋkecnewec: Go hâbige mi goroŋkezejec (gaŋ 1:6–8), â ʒârâ hâriŋ kâdoc rocmurâ mi takicguzejec (gaŋ 2:1–7 â 4:1–5). Erâ mitire mumusifuc ŋic jaŋere dâŋ bawahaocte â tatakic tâmiric mu bâuruec ejareocte qâreŋkecnewec (gaŋ 2:23–26). Ŋic iŋucnezi Anuture qânâ wâtuŋ mi herândiŋkeniŋmu (gaŋ 2:19). Gie i bahuc mitidâŋ qazucnekicne ira siŋkeocte (gaŋ 3:14-17) â miti muminʒiriŋkeocte irec dâŋ mâmâc qâmockecnewec (gaŋ 4:2).

Paulo e hâmohape miti gie i weniŋuc foocmu, iŋuc muhuc manabâc mi ewec. E mitire ʒiŋuc manawec: I ŋiczi mi niŋgiŋkeniŋmu (gaŋ 2:9), â mumusifuc ŋic jaŋere ʒiŋuc muwec: Fuŋne‐jeŋic taniŋkeocmu (gaŋ 3:8–9). Erâ hâmocte wâc mi hâwickewec. E Wofuŋtao qohota sanaŋkehuc ʒiŋuc muwec: Wofuŋ e hâmoc qâmiziewec (gaŋ 1:10), ehec ʒâic fâro manahuc juku hâmorâ juju‐ticnao fisizo (gaŋ 2:10–13), erâ Wofuŋte meonec eri hendiŋ rozo (gaŋ 4:6-8). Paulo e Wofuŋte mamanac iŋuc hâcne juhame Nerozi mume qambiŋ. E fuŋne ʒiŋuc manawec: Hâmoc dameŋ‐nane maickekac, iŋuc manahuc papia ʒi hâcne mâmâzoc dâŋ qâreŋkewec. Gie‐ticne â papia qâqâreŋ‐ticne ira hâcne tarawec. Baweme‐ticnezi hâcne Timoteore papia II qâreŋkewec.