3 Hozec sâsec‐jopahuc dâŋjeŋic dopeckezemec, hozec jâmbâŋ jaŋere mukopac. 4 Hozec moc naru motec me ŋosafâcne juniŋmu, ine jaŋe qanaŋ jaŋacne ficko miti gie bahuc ŋic ŋokac qizefâc‐jeŋic jauŋ‐jopanʒepieŋ, ehuc juwicnao wiac ejarekicne irec tofa bazunʒepieŋ. Anutu e irec maname sâckeocmu. 5 Hozec fârine ine e jahackoaŋ juhuc Anuturao roweckeekac, ehuc ŋafe furec nunumu wâwâsic ecneekac.^* 6 Â hozec moc sasec gie baocmu ere ine ɋâricnezi hâmocne mucnezo. 7 Dâŋ i wâc jaza sanaŋketec manarâ bahacmâc junʒepieŋ. 8 Moc e wiacfâcne â soctofafâcne hone jauŋ â kime dopec mi ejareocmu e miti beherâ qâpuc sanaŋ ewec mucnezo.

9 Hozec moc jara‐ticne 60 bazuwec, erâ ŋic mocjahahec juwec, iŋucne sawa ʒâŋe‐ticne bâmec papiao râezo. 10 Erâ eehâmo gie bawec me mâcne, irec fuŋne taniŋkeocte kecʒiŋuc mu wioc ezo: Naru motec rocjoparâ gume jowac ejarewec me mâcne? Erao ŋic furune fisipie hezu hewâneŋ ejarewec me mâcne? Mitiŋic bâmec bajarewec me aricne? Jauŋ gie fuŋne fuŋne bawec me mâcne? Fuŋne‐jeŋic iŋuc hâcne manazo.^* 11 Hozec sahac ɋâri jaŋe ʒâŋe‐jeŋic bâmec papiao feocte mupie ine qatara‐jarezemec. Iŋucne jaŋe sasecte ejareme Kristo qâoma ecnerâ ŋicte sahac bapa eeŋgopieŋ. 12 Erâ mârâc dâŋ mupaŋkembiŋ i qâsuapie bahacnehec eekac.

13 Erâ wâc gie tâmiricte ficbiri juhuc oma qâoma erâ jueŋgopieŋ, erâ i sawa mâcne, dâŋ jawane â simbiŋne kosa wosepie feekac.^* 14 Irec no ʒiŋuc mukopac: Hozec sahac ɋâri jaŋe ŋic mocwâc rorâ naru motec rocjoparâ dete mamac â ro rikec qâ rikec enʒepieŋ. Iŋuc ehuc jupie kisâ jaŋe sâqocnere ojowa baniŋmurâ dâŋ basarâ behenʒepieŋ.^* 15 Hozec gâcne jaŋe ine biac hata qâsoriembiŋ Sataŋ bâjâpeeŋgopieŋ. 16 Hozec moc e miti ŋokac mocte ficko juhuc gie bafickeme ine eki bâmec bacnezejec, â qâqâhâc‐jeŋickonec mi rozejec, qâqâhâc‐jeŋic i hozec waha qaqane jaŋere ezejec.

17 Soŋaŋzi gie‐jeŋic bapie biaŋkeme wiac bafehuc ehâmo‐jarezo, ine miti mumu â qaqazu gie paŋʒâic baeŋgopieŋ jaŋe hâcne iŋuc ejarezo.^* 18 Miti papiao dâŋqâreŋ ʒiŋuc hâcne fokac: “Bulimakaozi gi bagarehuc sopâc kecɋaŋ nâzo mume mi sakarecnezemec.” Erâ moc ʒiŋuc: “Gie bapa ŋic e furi fuacneme sâckeocmu.”^* 19 Ŋic mocjahazi soŋaŋ moc dâŋko râezo mume mi manacnezemec, ŋic 2 me 3 jaŋe mupie ine manarâ giene bazemec.^* 20 Moczi bahac bâfuame âgo guru jaŋere maio mu bâtiŋ ecnetec gâcne jaŋe manahuc hâwic‐jopazejec wâc.^* 21 No Anutu â Jesu Kristo ere maio â aŋelo bufuŋfâc‐ticne jaŋere maio kecʒiŋuc mupaŋke‐garekopac: Dâŋ gaza qâmoc ekopac i aimuŋ soŋaŋkehaŋ moc mi wahazejec, ehuc maŋgere ŋic ŋokac wiac sâctiri moc mi ejarezemec.^* 22 Go ŋic miti giere fâro ehuc biac mi jambuŋ‐jopazemec, jaŋere kiŋzi gore faio fezacte. Gahacne maŋ sahac soŋaŋketec ɋaɋacnea fozejec.^*

23 Go bukiki â huc ʒâic gâbâ egareekacte opâ sawa mi nâzemec, waiŋ opâ afecne mac nâzemec wâc. 24 Ŋic tucne jaŋere sâqocne i fuŋne babataniŋ dameŋ mi maickeha qanaŋ fua taniŋkeekac, tucne jaŋere soŋsoŋ foku ʒâhec fuaocmu. 25 Eme eehâmo gie i iŋuc jaha fua taniŋkeekac, â iŋuc mi eekacko soŋsoŋ foku ʒâhec fua taniŋkeocmu.