Maŋ wâwânâŋhec aricne, maŋtaniŋ juzo
4
Âgofâc‐nane, Wofuŋ Jesure erâ uŋ sawaŋ eŋarehuc moc ʒiŋuc ŋazapene mananiŋ: Mitio juju bapa‐ŋeŋiczi Anutu âgo ecneocte fuŋne ŋaza qazuc embeŋ, ijaha junʒepieŋ. Mitio juju i sâcne jueŋgopieŋ, mâc juŋɋârâŋkeniŋte ŋazaŋgopeneŋ.* 2 Wofuŋ Jesure micte dâŋ ŋaza qâmoc embeŋ, irec kâuc mi baŋgopieŋ. 3 Anutu e ʒiŋuc hâcne muekac: Boe sau qikiŋnehuc maŋɋaɋac junʒepieŋ.* 4 Ŋoŋerao moczi e jahacne ŋonâŋ maŋɋaɋacko â pectâcko rauckezejec,* 5 sasecte ʒocbâruŋko misac, i ŋic qâpuc Anuture kâuc baeŋgopieŋzi eeŋgopieŋ.* 6 Moczi moc aka huckehuc wiac iŋucnao âgo‐ticne mi eatuckezejec. Wofuŋ e wiac irec okacne bazu‐fâreocmu; nâŋe dâŋ i mârâc jaha mujomirerâ ŋazambeŋ.* 7 Maŋwânâŋhec junaŋte aricne, maŋɋaɋac junaŋte Anutuzi hefârec‐nâpowec.* 8 Irec moc e dâŋ i bâsueocmu, e ŋic moc mâcne, Anuctu e jahacne bâsueocmu, Tiri Mâro maŋŋeŋicko râeekac e hâcne bâsueocmu.* Maŋjauŋhec juhuc gie ʒoɋac bazo
9 Ŋoŋe miti mamanazi maŋzi jauŋ babac eniŋte wemocte boc qâreŋke‐ŋarenaŋmu, Anutu e jahac maŋzi jauŋ babac eniŋte fuŋne ŋaza ŋowatuc ewec.* 10 Erâ ŋoŋe Makedonia mâreŋ hae sâc opâ ruac juraŋgopieŋ jaŋe maŋjauŋ ejarehuc jueŋgopieŋ. Erâ sifu mocwâc ɋârâŋkeocte ŋazaŋgopeneŋ.* 11 Erâ dâŋ moc ʒiŋuc ŋaza qâmoc embeŋ: Rac warec juhuc dâŋ ojowa mi ee, hae‐ŋeŋicko ŋezurâ ŋehuc mezi gie muŋarekicne aijakic jaha baniŋte ɋicwânʒâŋ enʒepieŋ.* 12 Ehuc qâpuc jaŋere maio roroc tâmiric pectâc junʒepieŋ.*
Jesu fifisi‐ticnere dâŋ
13 Âgofâc, ŋoŋe hâmokicne jaŋere kâuc bârâ, miti tâmiriczi maŋjeŋic ʒickeme ki mamakuc eeŋgopieŋ iŋuc enʒipiŋte ŋazapene mananiŋ:* 14 Nâŋâc Jesu hâmorâ faharewec dâŋ i maŋkerâ ʒiŋuc mananʒepeneŋ: Anutu e Jesu ecneme hâmokicne jaŋe e jahacnehec amec‐jopa fisiocmu.* 15 Â moc i Wofuŋ e jahacne micdâŋ ŋazanaŋ: Mâreŋko ɋâricne juhapene Wofuŋ fisiocmu nâŋâc hâmokicne mi siric‐jopanaŋmu.* 16 Wofuŋ e sambâŋkonec wahaocte ine dâŋ wiwira â aŋelo qizecte micʒonʒoŋ â Anuture qeŋfânâŋ fuahame wahaocmu. Wahame Kristo manasiŋkehuc hâmombiŋ jaŋe bâbâni fahareniŋmu.* 17 Faharepie ɋâricne junaŋmu, tiwâne hâcne, izi jaŋerao ʒuhuckepene karoraczi bafec‐nâpome sawao Wofuŋhec bâbâfuac enaŋmu. Erâ Wofuŋhec juhuc junaŋmu sanaŋ.* 18 Ŋoŋe dâŋ i hâcne muc manac ehuc maŋ bâbâmâteŋ enʒepieŋ.