Kolosai i hae ʒâŋe jaha, hae i Efeso hae ramicnao ŋewec. Mâreŋ ira Laodikea hae ŋewec wâc. Paulo e jahacne Kolosai haeo mi ra fisiwec (gaŋ 2:1). Motec‐ticne Epafara eki hae ira miti gie bame Jesure kikefuŋ fuambiŋ (gaŋ 1:7 â gaŋ 4:12). Filemoŋ e hae ijaha juwec wâc. Paulo e Roma haeo kâpâcwâru ficko ŋehame Epafara e ere busâqoc manarâ ra iqickewec. Iqickerâ hae‐ticnaonec miti ŋic ŋokac jaŋere dâŋ binaŋ ecnewec. Jaŋerao mâreŋ mockonec mitiŋic burecne fisirâ maŋ bâsifuc ejarembiŋ. Ehuc ʒiŋuc mumbiŋ: Ŋoŋe miti maine sawa bajueŋgopieŋ, râpene ine fokac. Nâŋe aŋelozi dâŋ soŋne mufua‐nârembiŋ, i qazu‐ŋarepene reŋkenʒepieŋ. Ehuc aŋelo araŋ bajarenʒepieŋ â sowa bâtâc hombaŋ sabata ŋenʒepieŋ. Jesu sawa manasiŋkepie mi sâckeocmu. Iŋuc hâcne jazapie Kolosai haeonec miti mamana jaŋe dâŋ irec maŋjahec erâ Epafara ecnepie Paulorao rarâ dâŋ binaŋ ecnewec.

Eme Paulo e dâŋ i manarâ Kolosai ŋic jaŋere papia qâreŋkewec. Ehuc mitire fuŋne kecʒiŋuc mutaniŋkewec: Jesu e wiac sasawa irec Wofuŋ. Aŋelo fekicne wahakicne jaŋe ere jujuo fuambiŋ juŋgopieŋ wâc. Â dâŋ soŋne Anuturao fowarehuc fowec, irec fârine Jesuzi bâfuawec. Eme ʒi dâŋ soŋne moc mi fokac. Erâ Jesu e hâmohuc âgo bac‐nâpome erea embeŋ. Eme irec fainao wiac ʒuhuckerâ enaŋte mi munârekicne (gaŋ 1). Gaŋ 2 ira mu qaqazuc dâŋ gâcne gâcne forakac. Mitiŋic burecne jaŋere Paulozi ʒiŋuc qâreŋkewec: Jaŋe maŋko fuac dâŋ â qâpucdâŋ ŋazapie manarâ Kristo bâsueniŋmu. Jaŋe wiac jawane ŋarehuc boreŋ fâri‐ŋeŋic ŋowac rozo muŋgopieŋ. Iŋuc muhuc kime dopec ejarewec. Dâŋ i erâ Efeso ŋic qâreŋke‐jarewec irec dâŋ tucne mâmâc qâreŋkehuc âkesiŋ‐jopawec (gaŋ 3 erâ 4:1–5). Eme ʒâhec e jahacne dâŋ binaŋ ehuc papia qâreŋke tarawec (gaŋ 4:6-18). Eme Tikiko râcneme barawec.