Paulo e jaŋere manabâc erâ Timoteo soreme rawec
3
Ŋoŋere maŋhâhâŋ boc enârekume nâŋe gâcnezi sifu Ateŋ haeo buc juhuc* 2 Timoteo sorepene behec‐nâporâ ŋoŋerao fâwec. E âgo‐nâŋec â Anuture gieŋic juhuc Kristore Biŋebiaŋ muekaczi fârâ mitio hume keteŋ eŋarehuc faŋ qaŋareocte mucnembeŋ.* 3 Ŋoŋe ʒârâ hâriŋ faio juhuc dockenʒipiŋte iŋuc embeŋ. Ŋoŋe manaŋgopieŋ, miti mâteŋne juhuc mananaŋte mi munârekicne.* 4 Nâŋe ŋoŋerao juhuc qanaŋ dâŋ ʒiŋuc ŋazambeŋ: “Ʒika biac fai‐nâŋecko feocmu.” Eme dâŋ i sanaŋkewec, i manaŋgopieŋ.* 5 Eme eesâic runezi bârokawec‐ŋopame gie‐nanere fârine omaezacte maŋ kukumbuc boc enareme jupe bape sâqoreme ŋic e miti babaju‐ŋeŋicte fuŋne manaocte sorepe fâwec.*
Timoteozi risierâ dâŋ binaŋ ewec
6 Eme ʒi Timoteo e risie warerâ mamanasiŋ â maŋjauŋ‐ŋeŋicte biŋe biaŋ nâzâwec. Erâ nâŋere boc manasueŋgopieŋ, â nâŋe ŋoŋe honec‐ŋopazo muhapene ŋoŋe iŋuc jaha nâŋe honec‐nâpozo mueŋgopieŋ, dâŋ i nâzâ‐fârewec.* 7 Âgofâc, nâŋe ʒârâ hâriŋ â buʒâiczi maŋnâŋec hehâriŋkeme juhapene miti babaju‐ŋeŋicte dâŋzi bunâŋec bâuruewec.* 8 Ŋoŋe Wofuŋ heme hariŋ ecnehuc sanaŋkeeŋgopieŋ i manahuc maŋnâŋec fie ruruckekac.
Miti jaŋerao fua biaŋ erâ fosanaŋkeocte Paulozi numuwec
9 Ŋoŋere erâ Anuture maio bubiaŋ sâko manaeŋgopeneŋte Anutu daŋge mo iŋucne ecnepene sâckeocmu? 10 Mâc mana‐nâreha ŋoŋerao fârâ hohonec erâ miti gâcne forakac i moc ʒuhucke‐ŋarenaŋte ŋafe furec mu wâwâsic ecneeŋgopeneŋ. 11 Mamac‐nâŋec Anutu â Wofuŋ‐nâŋec Jesu e jahac hata bâfua‐nâreme ŋoŋerao fânʒepeneŋ.* 12 Ŋoŋerao ine Wofuŋzi maŋjauŋ‐ŋeŋic bâŋɋârâŋkeme ŋedâmâreme ŋaŋackoaŋ â gâcne jaŋehec eec enʒepieŋ; nâŋe iŋuc jaha ŋoŋe eŋareeŋgopeneŋ. 13 Erâ Anutuzi maŋŋeŋic keteŋkeme ŋoŋe Mamac‐nâŋecte maio bahacmâc â maŋfuru juhapie Wofuŋ‐nâŋec Jesu tiŋnefâc‐ticne sasawa jaŋehec fisizejec.*