TESALONIKE I
Paulo e jaŋere erâ Anutu daŋge nunumu ecnewec
1
Paulo, Siliwano â Timoteo nâŋe Tesalonike haeonec kikefuŋ, Anutu Mamac â Wofuŋ Jesu Kristo ere ŋicfâc, ŋoŋere papia ʒi râeŋgopeneŋ. Aki anonoc â wama ŋoŋerao fotâcnerâ fozejec.* 2 Nâŋe dameŋ sâc ŋoŋere erâ Anutu daŋge âzâcneeŋgopeneŋ, erâ nunumu gie bahuc sâc ŋoŋere manasu‐fâreeŋgopeneŋ.* 3 Ŋoŋe mamanasiŋ‐ŋeŋicte fârine bâfuaeŋgopieŋ â maŋjauŋte bâmec gie baeŋgopieŋ â Wofuŋ‐nâŋec Jesu Kristo paŋʒâic jaha worickeeŋgopieŋ, irec Mamac‐nâŋec Anutu ere maio hati manasurâ mufuahuc âzâcneeŋgopeneŋ.* 4 Âgofâc, nâŋe manaŋgopeneŋ, Anutuzi maŋjauŋ eŋarehuc rowosâec‐ŋopawec. 5 Iŋuc eŋarewecte Biŋebiaŋ bafârâ ŋazapene dâŋ sawa mi ewec, i tâpirihec â Tiri Mârohec â buâkecnehec ewec. Ŋoŋerao jumbeŋko ŋoŋere erâ wiac ebac embeŋ i manaŋgopieŋ.* 6 Eme nâŋe bâjâpec‐nâpombiŋ, bâjâpec‐nâpohuc Wofuŋ e jahacne mâmâc bâjâpembiŋ. Ehuc miti i fific guguriŋ faio Tiri Mârozi bufahac qaŋarehame ro maŋ embi.* 7 Ŋoŋe iŋuc ehuc Makedonia â Akaia mâreŋkonec miti mamana jaŋe micne bajarehuc fuŋne qazu‐jarembiŋ.*Tesalonike ŋic jaŋere dâŋ biŋe hae sâc rawec
8 Ŋoŋeraonec hâcne Wofuŋte dâŋzi haŋ barahuc Makedonia â Akaia mâreŋko fuawec, erâ i sawa mâcne, ŋoŋe Anutu manasiŋkembiŋ irec dâŋ biŋe i hae sâc mana‐fârepie nâŋe jajazane moc mi fuawec.* 9 Jaŋe jaŋac ŋoŋerao gie bapene fârine fuawec irec dâŋ nâzâeŋgopieŋ. Erâ ŋoŋe nemuɋâŋ râpeckerâ Anutu jujune â fârine maickerâ ŋicfâc‐ticne embiŋ,* 10 erâ Ŋokâ‐ticne Jesu hâmockonec bâɋârekicne, e juku sambâŋkonec waharâ okac dameŋko ŋezic‐nâpozokac, ere ʒawiehuc jueŋgopieŋ, irec dâŋ binaŋ‐ŋeŋic hae sâc eeŋgopieŋ.*