Yuus chagkinnum numi nere aimkamun Amósan iwaintukmau
8
Amós chichaak: Yuus, numi nere tsamaku aina chikichik chagkinnum atatmaun iwainturkamai. 2 Nuna iwainturak chichartak:“¿Amósa, warimpa wainme?” tusa turutmayi.
“Tusa turutkai numi nere tsamaku aina chagkinnum aun wainjai”, tusan timajai.
“Tusa tama numi nere tsamak uminkamtai shuar juuwa numamtuk, Israel shuar aina waitat jukitnurisha tsawan uminkayi. Turasha yamaika tsagkurashtatjai. 3 Nu tsawantinka nita yuusrin eme anentas iiyainak ememattasa iruuntai jeanam nuwa aina kantamainak pujuinasha, shuar jinawarmatai útainak nita kantammaunka inaisartatui. Shuar aina nukap jinaawartatui. Tumawarmatai shuar jakacharu aina nu jakau ainanka takamtak aa utsagkartatui. Wii taja nuka metek uminkattawai Yuus turutmayi”, tusa Amós tinaiti.
Yuus israelita ainan waittan susatnuka tsawan jeawai timau
4 Amós nina patai ainan chicharuk: Atum shuar kakakchau aina waitkatiram, tura kuitrinchau aina waitkatirmesha ju antuktarma. 5 Atum ainatirmeka chichakrum: “¡Nantu yamaram takamtai jiistamtaiya jusha wári nagkamastaj tawash, tumamtai trigo aina surukaj! ¡Sábado tsawanta jusha wári nagkamastaj tawash, tumamtai trigo kijintri metekchau aig metek nemayi tusar tsanuma surakur kuit nukap jukiaj! tusarum imattrume. 6 Atumka trigo ainaka seapejai surumain nekapearme, imania asarum kuitrinchau ainaka inaku waitkatai atii tusarum akikchau suruktasrum wakerarme. Nuiyasha sandaliajai yapajiattsarum wakerarme”. 7 Nu tumaina asaakrumin Jacob umiru jakmau Yuus atumin chichartamuk: “Wika kuitrinchau ainan pegkerchau amajaina nunaka pegkesha kajinmatkishtinaitjai tawai.
8 Atum nu tura asaakrumin nugka senchi urtinaiti.
Imania asa entsa Nilo nujagkrak pakarin amur ataksha kuyua,
nujagkrak pakarin amur ataksha kuyua jawa numamtuk jatnaiti.
Imaniakai ashamainak shuar ainaka útiartinaiti.
9 Nu tumatin tsawan jeamtaigka,
etsa tutupnira ai etsa etsantsuk káshi jastinaiti.
Nunaka wii turattajai”, tusa Yuus tinaiti.
10 Nita jiistamainak pujuinasha,
tura shir anenak kantamainak pujuinasha
wake mesemar pujaku nugkutain nugkurartinaiti.
Tura awamarar, shuar uchiri chikichik aramu
jakamtai shir senchi wake mesemar nekapeak
útmaina imanikar útiartatui.
Tumaina asar nita jiistamainamuncha
shir wake mesemar inagkasartinaiti.
11 Israelita aina tsukai waittsatin tsawan jeattawai.
Turasha nuka yumain atsakaigsha tumachartatui.
Kitakai waittsartatui,
turasha nuka umumain atsakaigsha tumachartatui.
Antsu nunaka wina chichamrun antukartasa senchi
wakeniartinaiti.
12 Tumaina asar shuar waak wekamaina numamtuk,
wina chichamrun etsermaun antukartasa
chikich nayantsanam wear,
chikich nayantsanam wear jartinaiti. Nunaka nujinmanisha tura etsa akatainmasha we jartinaiti.
Tumainaksha wina chichamrun etserun wainkachartinaiti.
Wii taja nuka metek uminkattawai, tusa Yuus tawai Amós tinaiti.
13 Nu tsawan jeamtaigka
nuwa tsakat pegkesha jamamtinchau aina
tura aishmag tsakat kakaram ainasha
kitamainak wetak jaka iyainiartinaiti.
14 Tura nuiyasha yaakat Samarianam, Dannum,
tura Beersebanam antra yuusrimtai aina
iruna nuna eme anentas iiyainak emematiaru ainaka,
aantar juarartin ainawai.
Tura atakea nuisha eme anentam achartinaiti.